ពិតជារឿងមួយដ៏ភ្ញាក់ផ្អើលនិងគួរឲ្យហួសចិត្តខ្លាំងតែម្តង ខណៈបានដឹងថា នារីម្នាក់គ្រាដែលសមត្ថកិច្ចឲ្យវាស់កម្ពស់ នៅពេលមកធ្វើអត្តសញ្ញាណបណ្ណ ប៉ុន្តែ បែរជាមានការយល់ច្រឡំថា សមត្ថកិច្ចចាត់ទុកខ្លួនដូចអ្នកទោស លុះពេលទៅដល់ផ្ទុះវិញ ក៏ចេញវីដេអូដៀ-លសមត្ថកិច្ចកប់ៗមាត់តែម្តង។
ក្រោយវីដេអូដៀ-លសមត្ថកិច្ចមិនសំចៃមាត់របស់នារីខាងលើ ត្រូវបានរីករាលរួចមក ទើបនៅថ្ងៃទី២៣ ខែវិច្ឆិកា ឆ្នាំ២០២១ លោកវរសេនីយ៍ឯក ហួត ចាន់ធី អធិការនគរបាលស្រុក បានឲ្យកម្លាំងជំនាញចុះស្រាវជ្រាវភ្លាមៗ ទៅលើករណីប្រេីពាក្យសម្តីអ.សុរោះ មកលេីសមត្ថកិច្ចនគរបាលស្រុកកំពង់សីលា ខេត្តព្រះសីហនុ តាមរយ:បណ្តាញសង្គមហ្វេបុក។
បើតាមសមត្ថកិច្ចបានឲ្យដឹងថា កាលពីថ្ងៃទី២២ ខែវិច្ឆិកា ឆ្នាំ២០២១ នារីឈ្មោះ វី ស្រីហន អាយុ១៩ឆ្នាំ មានទីលំនៅបច្ចុបបន្នភូមិស្ទឹងសំរោង ឃុំអូរបាកទេះ ស្រុកកំពង់សីលា ខេត្តព្រះសីហនុ ដែលប្រើប្រាស់គណនីហ្វេសប៊ុកឈ្មោះ សុខ លីន និង TikTok ឈ្មោះ ម៉ីម៉ីរៀល បានមកអធិការដ្ឋាននគរបាលស្រុកកំពង់សីលា ដេីម្បីសុំផ្តល់អត្ត-សញ្ញា-ណបណ្ណសញ្ជាតិខ្មែរ។
ប្រភពសមត្ថកិច្ចបន្តថា បន្ទាប់មន្ត្រីជំនាញបានរៀបចំបំពេញព័ត៌មានរួចរាល់ ក៏បានឲ្យនាងទៅវាស់កម្ពស់ ដើម្បីតម្រូវតាមលក្ខខណ្ឌដែលត្រូវផ្តល់។ ប៉ុន្តែ អ្វីដែលមិននឹកស្មានដល់ និងគួរឲ្យហួសចិត្តខ្លាំងនោះ គឺនារីខាងលើបែរជាយល់ច្រឡំគិតក្នុងផ្លូវអាក្រក់ថា អ្នកដែលឈរវាស់កម្ពស់ គឺសុទ្ធតែជាអ្នកទោសទៅវិញ ហើយពេលទៅដល់ផ្ទះវិញ ក៏បានចេញវីដេអូ ប្រើពាក្យសម្តីដ៏គួរមិនគប្បីចំពោះសមត្ថកិច្ច រួចបង្ហោះតាមបណ្តាញសង្គមទាំងហ្វេសប៊ុក និង TikTok តែម្ដង។
តែទោះយ៉ាងណា ក្រោយសមត្ថកិច្ចហៅមកសួរនាំ និងក៏ដូចណែនាំអប់រំ ពន្យល់ឲ្យបានយល់ច្បាស់ពីករណីនេះ នារីខាងលើក៏បានដឹងពីកំហុសរបស់ខ្លួន បានសាររភាពថា ខ្លួនពិតជាបានប្រព្រឹត្តដូច្នេះពិតប្រាកដមែន ហើយសមត្ថកិច្ចក៏បានឲ្យនាងសុំទោសជាសធារណៈតាមរយៈវីដេអូ និងធ្វេីកិច្ចសន្យាឈប់ប្រព្រឹត្តបែបនេះតទៅទៀត មុនពេលសមត្ថកិច្ចអនុញ្ញាតឲ្យវិលត្រឡប់ទៅផ្ទះវិញ៕ រក្សាសិទ្ធិដោយ៖ លឹម ហុង