ខេត្តព្រះសីហនុ៖ អាណាព្យាបាល រស់នៅខេត្តព្រះសីហនុ បានបន្តព្រួយបារម្ភ អំពីបទល្មើស ឬសកម្មភាពជួយដូរគ្រឿងញៀន
នាមូលដ្ឋានខេត្តទេសចរណ៍មួយនេះ ថាអាចនាំឲ្យប៉ះពាល់ដល់ធ្ងន់ធ្ងរដល់អនាគតកូនចៅនាថ្ងៃអនាគត ព្រោះសង្កេតឃើញរាល់ថ្ងៃនេះ សមត្ថកិច្ចស្ថាប័នពាក់ព័ន្ធបង្ក្រាបមិនទាន់មានប្រសិទ្ធភាពទេ។
អាណាព្យាបាលមួយចំនួន រស់នៅខេត្តព្រះសីហនុ ដែលបារម្ភចំពោះសកម្មភាពជួញដូរ ឬប្រើប្រាស់គ្រឿងញៀន បាអំពាវនាវសមត្ថកិច្ចស្ថាប័នពាក់ព័ន្ធ មានកងរាជអាវុធហត្ថ និងកម្លាំងនគរបាលជាដើម ស្នើឲ្យចុះបង្ក្រាបបទល្មើសទាំងនោះឲ្យមានប្រសិទ្ធភាព និងជៀសឲ្យផុតពីអំពើពុករលួយដែលអាចនឹងកើតមានឡើង។
ប្រជាពលរដ្ឋស្នើមិនបង្ហាញអត្តសញ្ញាណមួយចំនួនមានលំនៅឋាននៅម្តុំផ្សារលើ និងផ្សារពាណិជ្ជកម្ម នាខេត្តព្រះសីហនុ បានផ្តល់សម្ភាសឲ្យអ្នកយកព័ត៌មានគេហទំព័រ cen.com.kh ប្រចាំខេត្តព្រះសីហនុ កាលពីព្រឹកថ្ងៃសុក្រ ទី២០ ខែមេសា ឆ្នាំ២០១៨ថា បទល្មើសគ្រឿងញៀននៅមូលដ្ឋាននេះ គឺមានសកម្មភាពជួញដូរយ៉ាងអនាធិបតេយ្យ ហើយជនល្មើសមិនខ្លាចញញើតកម្លាំងសមត្ថកិច្ចខេត្តនេះទេ។ ប្រជាពលរដ្ឋ បានអះអាងថា ទីតាំងលក់ថ្នាំញៀនទាំងនោះ គឺមានស្ទើរគ្រប់ទីកន្លែងនៃមូលដ្ឋានខេត្តព្រះសីហនុ ចាបប់តាំងពីទីប្រជុំន រហូតដល់ទីជនបទ។ ក្នុងនោះទីតាំងមួយចំនួនមានដូចជា៖ នៅតាមទីតាំងមានបនពេស្យាចារ ក្លឹបកម្សាន្តរាត្រី តាមតំបន់ឆ្នេរជាប់មាត់សមុទ្រ និងនៅតាមហាងផឹកស៊ី ដែលមានម្ចាស់ជាជនបរទេស និងមានទីតាំងនៅតាមបណ្តាកោះជាដើម។
អាណាព្យាបាលមួយចំនួនបង្ហាញកង្វល់ថា ហេតុអ្វីបានជាសមត្ថកិច្ចអនុញ្ញាតឲ្យមានបទល្មើសគ្រឿងញៀន ទីតាំងបនពេស្យាចារ ទីតាំងចាក់ភ្នាល់បាល់ ឬកន្ទុយលេខជាដើម អាចបន្តធ្វើសកម្មភាពរីកដូចផ្សិតនាខេត្តព្រះសីហនុ ប៉ុន្តែបែរជាសមត្ថកិច្ចស្ថាប័នពាក់ព័ន្ធគ្មានវិធានការបង្ក្រាបឲ្យមានប្រសិទ្ធភាពទៅវិញ។
ផ្តើមពីបញ្ហានេះ ប្រជាពលរដ្ឋរស់នៅទីប្រជុំជនក្នុងក្រុងព្រះសីហនុ បានទទូចដល់ថ្នាក់ដឹកនាំខេត្តព្រះសីហនុ ឲ្យជួយជម្រុញទៅមន្ត្រីជំនាញពាក់ព័ន្ធ មានកម្លាំងរាជអាវុធហត្ថខេត្ត និងកម្លាំងនគរបាលស្នងការខេត្តព្រះសីហនុជាដើម ឲ្យជួយបង្កើនសកម្មភាពទប់ស្កាត់បទល្មើសជួញដូរ ឬប្រើប្រាស់គ្រឿងញៀនឲ្យបានច្រើនថែមទៀត។
បញ្ហានេះ ក្រុមប្រជាពលរដ្ឋ បង្ហាញកង្វល់ថា មិនគួរអាជ្ញាធរទុកបណ្ដោយឲ្យមានបទល្មើសគ្រឿងញៀន ឬអនុញ្ញាតឲ្យមានទីតាំងបនពេស្យាចារ ទីតាំងល្បែចាក់ភ្នាល់បាល់ កន្ទុយលេខ និងសង្វៀនជល់មាន់ជាដើម អាចបន្តកើតមាននៅមូលដ្ឋានខេត្តព្រះសីហនុ រីករាលដាលរហូតមកដល់ពេលនេះទៀតទេ។
អាណាព្យាបាល សង្ស័យថា ទំនងជាដោយសារទីតាំងល្បែងស៊ីសងកើតមានរីកដូចផ្សិត គឺមានទាំងទីតាំងស្របច្បាប់ និងខុសច្បាប់ បានរីកដូចផ្សិតនាមូលដ្ឋានខេត្តព្រះសីហនុ អាចជាមូលហេតុនាំឲ្យបញ្ហាអសន្តិសុខ មានដូចជាបទល្មើសចោរលួច ចោរឆក់ ពិសេសបទល្មើសគ្រឿងញៀនជាដើម បានបន្តកើតមានជាច្រើនករណី និងមានសញ្ញាគួរឲ្យព្រួយបារម្ភពីមួយថ្ងៃទៅមួយថ្ងៃ ពិសេសបទល្មើសគ្រឿងញៀន។
ត្រង់ចំណុចនេះ អាណាព្យាបាលរស់នៅខេត្តព្រះសីហនុ បានអំពាវនាវដល់ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ជួយបញ្ជូនមន្ត្រីជំនាញស្អាតស្អំ ចុះស្រាវជ្រាវរាល់បទល្មើសផ្សេងៗ មានដូចជាបទល្មើសល្បែងស៊ីសង ពិសេសសកម្មភាពចរាចរណ៍គ្រឿងញៀននាខេត្តព្រះសីហនុ ដើម្បីឈានដល់បើកយុទ្ធនាការបង្ក្រាបឲ្យមានប្រសិទ្ធភាព។
ពលរដ្ឋអះអាងថា រាល់ថ្ងៃនេះសមត្ថកិច្ចនគរបាល និងកងរាជអាវុធហត្ថខេត្តព្រះសីហនុ ចុះបង្ក្រាបបទល្មើសផ្សេងៗ ពិសេសបទល្មើសគ្រឿងញៀន មិនទាន់មានប្រសិទ្ធភាពទេ ពោលគឺ បទល្មើសបានបន្តកើតមានស្ទើរជារៀងរាល់ថ្ងៃ។
ប្រជាពលរដ្ឋអះអាងថា រាល់ថ្ងៃនេះ ភាពអនាធិបតេយ្យនៃការប្រើប្រាស់គ្រឿងញៀន នាខេត្តព្រះសីហនុ គឺសេង្កេតឃើញមានជនបរទេសមួយចំនួន បានប្រើប្រាស់ហួសកម្រិត និងមានអ្នកប្រើប្រាស់គ្រឿងញៀនខ្លះ បានគាំងបេះដូងស្លាប់ និងបានដើរស្រែកឡូឡា ឬបង្កហិង្សាតាមទីសាធារណៈជាដើម។
ទាក់ទិនបញ្ហានេះ លោក ជួន ណារិន្ទ ស្នងការនគរបាលខេត្តព្រះសីហនុ និងលោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ធ្លាប់បានឲ្យប្រព័ន្ធផ្សព្វផ្សាយដឹងថា សមត្ថកិច្ចស្ថាប័នខ្លួន បានយកចិត្តទុកដាក់ថែរក្សាសន្តិសុខសណ្តាប់ធ្នាប់ជូនប្រជាពលរដ្ឋ និងភ្ញៀវទេសចរ ដោយយកចិត្តទុកដាក់។ ក្នុងនោះ ក៏បានបញ្ជូនកម្លាំងជំនាញចុះស្រាវជ្រាវ ដើម្បីទប់ស្កាត់រាល់បទល្មើសផ្សេងៗ ពិសេសបទល្មើសគ្រឿងញៀន ដោយការទទួលខុសត្រូវខ្ពស់។
ត្រង់ចំណុចនេះ ថ្នាក់ដឹកនាំស្ថាប័នកងកម្លាំងប្រដាប់អាវុធទាំងពីរ ក៏តែងបានរំលឹកជារឿយៗដល់កងកម្លាំងក្រោមឱវាទ របស់ខ្លួន ឲ្យបន្តចុះអនុវត្តតាមគោលនយោបាយភូមិឃុំមានសុវត្ថិភាពទាំង ៩ចំណុច របស់សម្តេចប្រមុខដឹកនាំ ដែលបានដាក់ចេញឲ្យបានជាប្រចាំដូចភ្លៀងរលឹម។
ទោះជាបែបនេះក្តី ប្រជាពលរដ្ឋខេត្តព្រះសីហនុ បានចោទថា សមត្ថកិច្ចពាក់ព័ន្ធខេត្តនេះ ហាក់គ្មានឆន្ទៈក្នុងការងារចុះបង្ក្រាបបទល្មើសគ្រឿងញៀន ទីតាំងបនពេស្យាចារជ្រកក្រោមស្លាកម៉ាស្សា កោសជប់ ទីតាំងបើកចាក់ភ្នាល់បាល់ ទីតាំងកត់កន្ទុយលេខ និងល្បែងស៊ីសងជ្រកក្រោមស្លាកទីតាំងអ៊ីនធើណេតជាដើម ដែលកំពុងធ្វើសកម្មភាពរីកដូចផ្សិត នាមូលដ្ឋានខេត្តព្រះសីហនុនោះទេ ទើបទីតាំងល្មើសទាំងនោះ បានបន្តកើតមាន ហើយនៅក្បែរច្រមុះ ឬកន្លែងធ្វើការរបស់សមត្ថកិច្ចជំនាញថែមទៀត។
ចំណុចនេះ ក្រុមអាណាព្យាបាល ឬប្រជាពលរដ្ឋខេត្តព្រះសីហនុ បានរិះគន់ថា រាល់ថ្ងៃនេះ សមត្ថកិច្ចជំនាញពាក់ព័ន្ធ មានកម្លាំងកងរាជអាវុធហត្ថខេត្តព្រះសីហនុ និងស្នងការនគរបាលខេត្តនេះ ពិសេសថ្នាក់ដឹកនាំ នៃរដ្ឋបាលខេត្តព្រះសីហនុ នៅមិនទាន់អនុវត្តគោលនយោបាយភូមិឃុំមានសុវត្ថិភាពទាំង ៩ចំណុច ដែល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ឲ្យអនុវត្ត គឺអនុវត្តមិនទាន់មានប្រសិទ្ធភាពនៅឡើយទេ៕ ដែន សីមា