លោក Nilesh Wankhede បានថតវីដេអូឃ្លីប នៅឯតំបន់អភិរក្សធម្មជាតិ Melghat ដែលមានទីតាំងនៅរដ្ឋ Maharashtra ប្រទេសឥណ្ឌា បន្ទាប់ប្រតិបត្តិការជួយសង្គ្រោះពស់វែក ៣ ក្បាល ដែលទើបតែធ្វើឡើងកាលពីថ្ងៃពុធ។ ប៉ុន្តែ អ្វីដែលធ្វើឲ្យគាត់ពិតជាមានការភ្ញាក់ផ្អើលយ៉ាងខ្លាំងនោះ គឺបន្ទាប់ពីត្រូវបានដោះលែងភ្លាមៗ ពស់វែកទាំង៣ក្បាល ស្រាប់តែវេញខ្លួនរបស់ពួកវាជុំវិញដើមឈើ ហើយបង្កើតជាទិដ្ឋភាពដ៏ចម្លែកតែម្តង។
លោក Nilesh បានចែករំលែកអំពីការងាររបស់គាត់ថា៖ «ខ្ញុំជំនាញក្នុងការចាប់ពស់ដែលលេចឡើងនៅក្នុងភូមិក្បែរតំបន់បម្រុង ហើយបន្ទាប់មកដោះលែងវាទៅក្នុងតំបន់ព្រៃអភិរក្សវិញ។ ខ្ញុំបានជួយសង្គ្រោះពស់រាប់រយក្បាលក្នុងរយៈពេល ២០ ឆ្នាំ កន្លងមកនេះ។ ខ្ញុំមិនដែលឃើញសត្វចម្លែកបែបនេះទេ។ ឃើញពីមុនមក ប៉ុន្តែខ្ញុំមិនដែលឃើញអ្វីដូចនេះទេ ហើយខ្ញុំពិតជាភ្ញាក់ផ្អើលនឹងអ្វីដែលខ្ញុំបានឃើញ»។
លោក Nilesh បាននិយាយថា៖ «ចម្លែកណាស់ ព្រោះពស់មិនវារលើស្មៅ ប្រញាប់ទៅរកទីជ្រកទេ តែបែរខំឡើងគល់ឈើ និងវេញខ្លួនរបស់ពួកវាជុំវិញដើម អស់រយៈពេល ១៥ នាទី។ ខ្ញុំបានរកឃើញពួកវានៅក្នុងភូមិមួយ បន្ទាប់ពីអ្នកភូមិបានរកឃើញថាមានពស់វែកលេចឡើងនៅក្នុងភូមិ។ មួយក្បាលដែលខ្ញុំរកឃើញគឺនៅក្នុងផ្ទះ មួយទៀតនៅក្នុងជង្រុក និងមួយទៀតនៅក្នុងខ្ទម។ ក្រោយចាប់បានហើយ ខ្ញុំរួមនិងសហការីក៏បាននាំយកពួកវាមកដោះលែង ក្នុងតំបន់ព្រៃអភិរក្សាភ្លាមៗប៉ុន្តែ នៅពេលគេដោះលែង ពួកយើងក៏ឃើញទិដ្ឋភាពចម្លែកបែបនេះតែម្តង»។
នៅពេលលោក Nilesh បានចែករំលែករូបភាពនៃពស់វែក៣ក្បាល កំពុងសម្តែងប្ញទ្ធីដ៏អស្ចារ្យនៅលើគល់ឈើ នៅលើបណ្តាញសង្គម ឃើញថាវីដេអូនេះបានទាក់ទាញចំណាប់អារម្មណ៍យ៉ាងខ្លាំង។
ជាមួយគ្នានេះ លោក Nilesh បាននិយាយថា គាត់មានអារម្មណ៍អស្ចារ្យណាស់ នៅពេលដែលគាត់បានឃើញទិដ្ឋភាពដ៏ចម្លែកនេះ ហើយនេះអាចចាត់ទុកថាជារូបភាពចម្លែកបំផុតដែលគាត់មិនធ្លាប់បានឃើញនៅក្នុងស្នាដៃរបស់គាត់ រហូតមកដល់ពេលនេះ។
សូមបញ្ជាក់ថា ពស់វែកអាចលូតបានប្រវែងជាង ៥ ម៉ែត្រ ហើយពិសដ៏មានឥទ្ធិពលរបស់វា អាចគ្រប់គ្រាន់ដើម្បីសម្លាប់ដំរីពេញវ័យមួយក្បាល៕ រក្សាសិទ្ធិដោយ៖ លឹម ហុង
ទស្សនាវីដេអូ => (Video)