ស្ត្រីទេសចរជនជាតិតៃវ៉ាន់ម្នាក់ បានកំពុងប្រយុទ្ធតតាំងនឹងជីវិតនៅឯមន្ទីរពេទ្យ Kuala Lumpur បន្ទាប់ពីត្រូវបានចោរឆក់កាបូបនៅជិត Masjid Negara ខណៈព្យាយាមគ្រប់គ្រងទ្រព្យសម្បត្តិរបស់នាងពីចោរ ដែលជាហេតុធ្វើឲ្យដួលបោកក្បាលនឹងកម្រាលខឿនចិញ្ចើមផ្លូវពោរពេញដោយថ្លុកឈាមគួរឲ្យអាសូរ ។
ប៉ូលីសស្រុក Dang Wangi បានឲ្យដឹងថា ស្ត្រីទេសចរតៃវាន់ដែលមានឈ្មោះ Liu Ling អាយុ ៥៥ ឆ្នាំ ទើបតែបានចាកចេញពីសារមន្ទីរសិល្បៈអ៊ិស្លាម និងកំពុងឆ្ពោះទៅកាន់ Masjid Negara នៅពេលនោះនាងបានជួបហេតុការណ៍នេះនៅវេលាម៉ោង ១២ ថ្ងៃត្រង់ ។
ស្ត្រីរងគ្រោះកំពុងធ្វើដំណើរនៅលើផ្លូវថ្មើរជើង នៅពេលនោះចោរម្នាក់បានជិះម៉ូតូដេញតាម និងធ្វើសកម្មភាពឆក់កាបូកពីក្រោយនាងតែម្តង ។ ជនរងគ្រោះបានបាត់បង់ជំហរ និងដួលបោកក្បាលទៅនឹងកម្រាលថ្ម បណ្តាលឲ្យរងរបួសក្បាលទំហំ ៤ សង់ទីម៉ែត្រ នៅផ្នែកខាងស្តាំក្បាលរបស់នាង ។
ប្រភពព័ត៌មាននៅកន្លែងកើតហេតុ បាននិយាយថា ដោយឃើញជនរងគ្រោះពោរពេញដោយឈាម ជនសង្ស័យបានរត់គេចខ្លួនពីកន្លែងកើតហេតុតែម្តង ។ ចំណែកស្ត្រីរងគ្រោះត្រូវបានគេបញ្ជូនទៅកាន់មន្ទីរពេទ្យទូទៅ Kuala Lumpur ។
ប៉ូលីសបញ្ជាក់ថា ជនរងគ្រោះត្រូវបានធ្វើការវះកាត់ ប៉ុន្តែ នៅតែសន្លប់ ។ បច្ចុប្បន្ន នាងនៅតែភ្ជាប់ម៉ាស៊ីនអុកស៊ីហ្សែន ខណៈខាងក្រុមគ្រូពេទ្យកំពុងរៀបចំស្កេនកាំរស្មី X-ray និង CT សម្រាប់ជនរងគ្រោះ ។ នេះជាករណីដ៏គួរឲ្យព្រួយបារម្ភមួយ ដែលយើងគ្រប់គ្នាត្រូវប្រុងប្រយ័ត្នខ្លួនជានិច្ច ខណៈពេលធ្វើដំណើរ ជាពិសេសនៅទីកន្លែងស្ងាត់ ៕ ចន្ទី
