ភ្នំពេញ ៖ តំណាងអង្គការក្រៅរដ្ឋាភិបាល ដែលធ្វើការលើវិស័យបរិស្ថានទាំងអស់ បានអបអរសាទរទទួលស្គាល់ការខិតខំប្រឹងប្រែងរបស់រាជរដ្ឋាភិបាលលើការការពារនិងអភិរក្សធនធានធម្មជាតិនៅកម្ពុជា។ នៅក្នុងសេចក្តីប្រកាសព័ត៌មានចេញផ្សព្វផ្សាយនៅថ្ងៃទី១៨ ខែមេសា ឆ្នាំ២០១៨ តំណាងអង្គការអភិរក្ស និងបរិស្ថានទាំងអស់ បានប្រកាសទទួលស្គាល់ការខិតខំប្រែងរបស់រាជរដ្ឋាភិបាលកម្ពុជា លើការការពារធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព។ ជាមួយនឹងការអបអរសាទរចំពោះកិច្ចខិតខំប្រឹងប្រែងរបស់រាជរដ្ឋាភិបាល តំណាងអង្គការក្រៅរដ្ឋភិបាល បានគាំទ្រដល់អាជ្ញាធរពាក់ព័ន្ធ ចាត់វិធានការចំពោះជនល្មើស ដែលធ្វើការទន្ទ្រានដីព្រៃធ្វើជាកម្មសិទ្ធិ ការកាប់ព្រៃឈើ និងការបរបាញ់សត្វព្រៃខុសច្បាប់ ដើម្បីធានាលើការការពារ និងគ្រប់គ្រោងធនធានធម្មជាតិដោយចីរភាពនៅតាមតំបន់ការពារធម្មជាតិ ជាពិសេសនៅតំបន់ដែនជម្រកសត្វព្រៃភ្នំត្នោត ស្ថិតនៅក្នុងភូមិសាស្ត្រ ខេត្តព្រះវិហារ។
សេចក្តីប្រកាសព័ត៌មាន បានបង្ហាញថា យើងខ្ញុំតំណាងឲ្យការអភិរក្ស និងបរិស្ថានទាំងអស់ ទទួលស្គាល់ការខិតខំប្រឹងប្រែងរបស់រាជរដ្ឋាភិបាលកម្ពុជា លើការការពារធនធានធម្មជាតិ អភិរក្សជីវចម្រុះ និងការអភិវឌ្ឍដោយចីរភាព។ ខណៈពេលដែលយើងអបអរនឹងការខិតខំប្រឹងប្រែងរបស់រាជរដ្ឋាភិបាលនេះ ពួកយើងក៏មានការព្រួយបារម្ភអំពីការបាត់បង់ធនធានធម្មជាតិយ៉ាងគំហុកដែលកំពុងតែកើតមាននាពេលបច្ចុប្បន្ន នៅក្នុងដែនជម្រកសត្វព្រៃភ្នំត្នោត ដែលស្ថិតក្នុងភូមិសាស្ត្រនៃខេត្តព្រះវិហារ ។ ដូចជាតំបន់ការពារធម្មជាតិផ្សេងទៀត ដែលស្ថិតនៅប្រទេសកម្ពុជាដែរ ដែនជម្រកសត្វព្រៃភ្នំត្នោត កំពុងទទួលរងនូវការទន្ទ្រានដីព្រៃក្នុងទ្រង់ទ្រាយធំដោយសកម្មភាព ចាប់យកដីព្រៃជាកម្មសិទ្ធិដើម្បីការលក់ដូរ ការកាប់ឈើ និងការបរបាញ់សត្វព្រៃដោយខុសច្បាប់ជាដើម។ សត្វព្រៃសំខាន់ៗជាច្រើនប្រភេទ ដែលមានវត្តមានក្នុងដែនជម្រកសត្វព្រៃភ្នំត្នោតមាន ដូចជា ទន្សោង ខ្លាពពក ខ្លាឃ្មុំ ស្វាព្រាម ទោច ពង្រូល ឆ្កែព្រៃ និងប្រភេទសត្វស្លាបទឹកធំៗ ជាច្រើន កំពុងប្រឈមនូវការគំរាមកំហែង និងការបាត់បង់ ។ ព្រៃធម្មជាតិ និងសត្វព្រៃ មិនត្រឹមតែមានតម្លៃដ៏មហាសាលប៉ុណ្ណោះទេ ប៉ុន្តែវាក៏បានផ្តល់នូវសេវាកម្មផ្នែកអេកូឡូស៊ី និងជាមូលដ្ឋានគ្រឹះសម្រាប់ការអភិវឌ្ឍដោយនិរន្តរភាព នៃការចិញ្ចឹមជីវិតរបស់សហគមន៍មូលដ្ឋាន រួមបញ្ចូលទាំងសកម្មភាព អេកូទេសចរណ៍ផងដែរ។ ប្រសិនបើគ្មានការអន្តរាគមន៍ជាបន្ទាន់ពីសំណាក់អាជ្ញាធរពាក់ព័ន្ធនានា ដើម្បីជំរុញឲ្យមានការគោរពច្បាប់លើការការពារបេតិកភណ្ឌធម្មជាតិរបស់ជាតិនេះទេ ធនធានធម្មជាតិនៅដែនជម្រកសត្វព្រៃនេះ អាចខូចខាត និងបាត់បង់ក្នុងកម្រិតដែលមិនអាចស្តារបានឡើងវិញឡើយ។ យើងខ្ញុំសូមសំណូមពរ ដល់រាជរដ្ឋាភិបាលកម្ពុជា មេត្តាចាត់វិធានការជាបន្ទាន់និងដោយគ្មានការពន្យារពេលទប់ទល់និងជនល្មើសទាំងឡាយណាដែលទន្ទ្រានដីព្រៃ ជាកម្មសិទ្ធិ អ្នកកាប់ឈើ និងអ្នកបរបាញ់សត្វព្រៃខុសច្បាប់ ដើម្បីធានាបានលើការការពារ និងគ្រប់គ្រងដោយចីរភាពនៅដែនជម្រកសត្វព្រៃនេះទុកជាផលប្រយោជន៍សម្រាប់មនុស្សជំនាន់នេះ និងកូនចៅជំនាន់ក្រោយ”៕ ដោយ៖បញ្ញាស័ក្តិ