ភ្នំពេញ ៖ យោងតាមដីការបស់លោក រៀល សុភិន តំណាងអយ្យការអមសាលាដំបូងរាជធានីភ្នំពេញ នៅម៉ោង១០និង៣០នាទីព្រឹកថ្ងៃទី២០ មេសា ២០១៨នេះ កម្លាំងសមត្ថកិច្ចនគរបាលព្រហ្មទណ្ឌ បានឃាត់ខ្លួន អគ្គនាយកស្ថាប័នមីក្រូហិរញ្ញវត្ថុប្រតិបត្តិករឥណទានប្រសិទ្ធ នៅចំណុចផ្លូវវេងស្រេងម្តុំលូ៥ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
សមត្ថកិច្ចនគរបាលព្រហ្មទណ្ឌនៃក្រសួងមហាផ្ទៃ បានឲ្យដឹងថា ជនសង្ស័យមានឈ្មោះ ទួន សុវណ្ណា ភេទប្រុស ជាអគ្គនាយកស្ថាប័នមីក្រូហិរញ្ញវត្ថុប្រតិបត្តិករឥណទានប្រសិទ្ធ មានទីលំនៅផ្ទះលេខ៤៥អេហ្វ១ ផ្លូវវត្តអង្គតាមិញ ភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។ សមត្ថកិច្ច បានបញ្ជូនខ្លួនជនសង្ស័យ ទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី៕