ខេត្តព្រះសីហនុ៖ មន្ត្រីសង្គមស៊ីវិលធ្វើការងារពាក់ព័ន្ធគ្រោះថ្នាក់ចរាចរណ៍ផ្លូវគោក បានបង្ហាញការព្រួយបារម្ភពីអត្រាគ្រោះថ្នាក់ចរាចរណ៍កើតមាន
នៅតាមបណ្តោយផ្លូវជាតិលេខ៤ គឺផ្លូវចេញចូលទៅខេត្តព្រះសីហនុ ដែលបានបណ្តាលឲ្យមានមនុស្សស្លាប់ និងរបួសស្ទើរជារៀងរាល់ថ្ងៃ។
ចំណុចនេះ មន្ត្រីអង្គការជនពិការ ធ្វើការងារពាក់ព័ន្ធគ្រោះថ្នាក់ចរាចរណ៍ បានកត់សម្គាល់ថា គ្រោះថ្នាក់ចរាចរណ៍តែងកើតមានស្ទើរជារៀងរាល់ថ្ងៃនៅតាមផ្លូវជាតិលេខ៤ និងនៅទីប្រជុំជនក្នុងក្រុងព្រះសីហនុ ដែលទាមទារឲ្យអ្នកបើកបរ ឬអ្នកប្រើប្រាស់ផ្លូវថ្នល់ទាំងអស់មានការប្រុងប្រយ័ត្នជាប្រចាំ។
ក្រុមមន្ត្រីអង្គការជនពិការ ឲ្យដឹងបន្តទៀតថា គ្រោះថ្នាក់ចរាចរណ៍ដែលបានកើតមាននៅខេត្តព្រះសីហនុ គឺបានបណ្តាលឲ្យមានមនុស្សស្លាប់ និងរបួសធ្ងន់ស្រាលជាច្រើនករណី ពិសេសបាននាំឲ្យខាតបង់ចំណូលថវិកាគ្រួសារ និងថវិកាជាតិអស់ជាច្រើនថែមទៀត។
ផ្តើមពីបញ្ហានេះ មន្ត្រីអង្គការសង្គមស៊ីវិលធ្វើការងារពាក់ព័ន្ធជនពិការ បានរំលឹកដល់អ្នកបើកបរយានយន្តផ្សេងៗ មានរថយន្ត និងម៉ូតូជាដើម ត្រូវគោរពច្បាប់ចរាចរណ៍ផ្លូវគោក ឲ្យបានជាប្រចាំ និងមិនត្រូវបើកបរក្នុងល្បឿនលឿនខុសច្បាប់បានកំណត់នោះទេ។
ជាងនេះត្រូវមានសុជីវធ៌មក្នុងការបើកបរ ឬត្រូវមានការយោគយល់អធ្យាស្រ័យឲ្យគ្នាទៅវិញទៅមក ប្រយោជន៍ ដើម្បីជៀសផុត ពីអត្រាគ្រោះថ្នាក់ចរាចរណ៍ ដែលអាចនឹងកើតមានឡើងជាយថាហេតុណាមួយ។
ប្រជាពលរដ្ឋរស់នៅខេត្តព្រះសីហនុ ទទួលស្គាល់ថា ខេត្តទេសចរណ៍ជាប់ឆ្នេរសមុទ្រមួយនេះ ពិតជាកើតមានករណីគ្រោះថ្នាក់ចរាចរណ៍ស្ទើរជារៀងរាល់ថ្ងៃពិតមែន ហើយគ្រោះថ្នាក់ភាគច្រើន បានបណ្តាលឲ្យមានមនុស្សស្លាប់ របួសធ្ងន់ និងខូចខាតទ្រព្យសម្បត្តិទាំងឯកជន និងទ្រព្យសម្បត្តិសាធារណៈ របស់រដ្ឋថែមទៀតផង។
ពួកគេស្នើដល់អ្នកបើកបរ ឬអ្នកប្រើប្រាស់ផ្លូវ ដែលធ្វើដំណើរចេញចូលតាមផ្លូវជាតិលេខ៤ ត្រូវប្រុងប្រយ័ត្នខ្ពស់ ពីគ្រោះថ្នាក់ចរាចរណ៍ និងស្នើឲ្យអ្នកបើកបរទាំងអស់ត្រូវគោរពច្បាប់ចរាចរណ៍ផ្លូវគោកឲ្យបានទាំងអស់គ្នា និងជាប្រចាំ។ ពិសេសអ្នកបើកបរ ដែលមិនស្គាល់ស្ថានភាពផ្លូវ មិនត្រូវបើកបរក្នុងល្បឿនលឿន ឬវ៉ាជែងខ្វះការប្រុងប្រយ័ត្ននោះទេ។
ជាក់ស្តែង នៅថ្ងៃសុក្រ ទី២០ ខែមេសា ឆ្នាំ២០១៨ នៅទីប្រជុំជនក្នុងក្រុងព្រះសីហនុ នៅមានពេលភ្លៀងធ្លាក់មួយមេធំ គឺបានកើតមានគ្រោះថ្នាក់ចរាចរណ៍រថយន្តបុកខឿន ឬរបាំងចែកផ្លូវ និងបុកបង្គោលភ្លើង ចំនួន ២ករណីផ្សេងគ្នា នៅត្រង់ចំណុចចំណោតលោកយាយម៉ៅ និងនៅចំណោតសាលាបឋមសិក្សារហ៊ុន សែនក្រុង បណ្តាលឲ្យខូចខាតរថយន្ត និងទ្រព្យសម្បត្តិរដ្ឋមួយចំនួនទៀត៕ ដែន សីមា