Forrest Fenn បានកប់កេសមួយដែលមានផ្ទុកនូវកំណប់ទ្រព្យ នៅលើភ្នំ ប៉ុន្តែពុំមានអ្នកណាដឹងទីតាំងពិតប្រាកដរបស់វា លើកលែងតែលោកចេញ។
លោក Forrest Fenn នៅគេហដ្ឋានរបស់ខ្លួននៅរដ្ឋ New Mexico នាឆ្នាំ ២០១៤។
តាម CNBC លោក Fenn អាយុ ៨៦ឆ្នាំ គឺជាអតីតអ្នកបើកបរយន្តហោះម្នាក់ ក្រោយមកលោកជាអ្នកជំនួញគំនូរ ។ លោកបានប្រកាសថា លោកបានកប់កេសមួយដែលមានផ្ទុកវត្ថុដែលមានតម្លៃរាប់លានដុល្លារនៅឆ្នាំ ២០១០ នៅលើកំពូលភ្នំមួយស្ថិតក្នុងជួរភ្នំ Rocky ដែលមានចម្ងាយប្រមាណ ១៦០០Km ស្ថិតនៅចន្លោះទីក្រុង Santa Fe, New Mexico និងព្រំដែនកាណាដា ។ លោក Fenn ពោល ៖ ប្រសិនបើថ្ងៃស្អែកខ្ញុំស្លាប់ទីតាំងឃ្លាំងទ្រព្យក៏នឹងទៅជាមួយខ្ញុំ ។
លោកប៉ាន់ប្រមាណថា មានមនុស្សប្រមាណ ៣៥០.០០០នាក់ បានតាមប្រមាញ់រកឃ្លាំងទ្រព្យនេះ ហើយលោកក៏ពុំដឹងថា មានអ្នកណារកឃើញវាហើយឬនៅទេ ។ លោកពោលបន្ថែម វាអាចត្រូវបានរកឃើញក្នុងពេលឆាប់ៗ ឬក៏អាចដល់ទៅ ១០០០ឆ្នាំទៀតក៏ថាបាន។
តម្រុយនៃកន្លែងកប់កំណប់នេះ ស្ថិតនៅក្នុងកំណាព្យ ២៤បន្ទាត់ ដែលលោក Fenn បានសរសេរក្នុងកំណត់ហេតុដែលបោះពុម្ពផ្សាយដោយខ្លួនឯង ។ ក្នុងនោះមានពាក្យពេចន៍ជាអាទិ៍ ៖ ចាប់ផ្តើមពីកន្លែងមានចរន្តទឹកក្តៅឈប់ហូរ រួចឆ្ពោះចុះទៅច្រកភ្នំ ។ មិនឆ្ងាយ ប៉ុន្តែមិនអាចធ្វើដំណើរដោយថ្មើរជើងបាន ។ ដាក់នៅក្រោមផ្ទះរបស់ Brown….. លោកបញ្ជាក់ប្រាប់ថា ៖ “គប្បីអានឲ្យបានច្រើនដងនូវតម្រុយក្នុងកំណាព្យរបស់ខ្ញុំ ហើយសិក្សាផែនទីរបស់ភ្នំ Rocky ចូរអ្នកគួបផ្សំកត្តាទាំងពីរនេះ ។
នៅក្នុងកេសកំណប់ទ្រព្យនេះ មានទំហំជិត១ម៉ែត្រការ៉េ និងមានទម្ងន់ ១៨គីឡូក្រាម ។ នៅក្នុងនោះមានផ្ទុកត្បូងថ្មមានតម្លៃ កាក់មាស ត្បូងទទឹម និងពេជ្រ។ របស់ទាំងនោះត្រូវបានលោក Fenn ជាអ្នកច្នៃ ហើយសន្សំបានមកក្នុងដំណើររកស៊ីផ្សងគ្រោះថ្នាក់នៅតំបន់និរតី ប្រទេសអាមេរិក ។
លោក Fenn ចាប់ផ្តើមប្រមែប្រមូលវត្ថុមានតម្លៃដូចពោលខាងលើដាក់ចូលក្នុងកេសនោះ ក្រោយពេលលោកដឹងថា ខ្លួនមានជំងឺមហារីកនៅឆ្នាំ ១៩៨៨ ។ លោកមានបំណងនឹងបញ្ចុះវានៅលើភ្នំជាមួយខ្លួនលោក ។ ប៉ុន្តែក្រោយមកជំងឺលោកត្រូវបានព្យាបាលជា ហើយលោកក៏ទុកកេសនោះ នៅក្នុងបន្ទប់ក្រោមដីនាគេហដ្ឋានរបស់ខ្លួន ។ មានប្តីប្រពន្ធមួយគូ បានបញ្ជាក់ថា ពួកធ្លាប់ឃើញវត្ថុមានតម្លៃយ៉ាងច្រើន ក្នុងកេសនោះ ។
ទិដ្ឋភាពឧទ្យានជាតិភ្នំ Rocky
ក្រោយមកលោក Fenn សម្រេចយកវាទៅលាក់ទុក រួចប្រកាសជាសាធារណៈឲ្យគេតាមរកនៅអំឡុងពេលផ្ទុះឡើងវិបត្តិសេដ្ឋកិច្ចឆ្នាំ ២០០៩ ។ លោកបកស្រាយថា ៖ មនុស្សជាច្រើនពុំមានការងារធ្វើភាពអស់សង្ឃឹមបានគ្របដណ្តប់ពេញផ្ទៃសារព័ត៌មាន ហើយខ្ញុំគ្រាន់តែប៉ងប្រាថ្នា ផ្តល់ឲ្យមនុស្សគ្រប់រូបនូវក្តីសង្ឃឹមមួយទោះបីតិចតួចក៏ដោយចុះ ។
ជាការពិតណាស់ចរន្តមនុស្សតាមប្រមាញ់រកឃ្លាំងទ្រព្យរបស់ Fenn បានកើនឡើងពីមួយថ្ងៃទៅមួយថ្ងៃ ។ ក្នុងអំឡុងពេលនោះ លោក Fenn ប្រាប់ថា ៖ មានមនុស្សជាច្រើនបានទូរស័ព្ទមកជួបខ្ញុំ ហើយគំរាមឲ្យខ្ញុំប្រាប់ពីកន្លែងលាក់កំណប់ ពុំនោះសោតគេនឹងសម្លាប់ខ្ញុំ ។ មកទល់ពេលនេះ មានមនុស្សយ៉ាងតិច ៤នាក់ បានស្លាប់ក្នុងដំណើរស្វែងរកកំណប់របស់ Fenn ។ ប្រការនេះ បានធ្វើឲ្យមានចរន្តអំពាវនាវឲ្យលោកបញ្ចប់បញ្ហាកំណប់នេះទៅ ។ ប៉ុន្តែ Fenn បានបដិសេធ ដោយគ្រាន់តែបង្ហើបប្រាប់បន្ថែមពីតម្រុយខ្លះៗទៀត ក្នុងប្លុករបស់ខ្លួន ដើម្បីជួយឲ្យអ្នកតាមរុករកមានសុវត្ថិភាព ។
លោកពោលប្រាប់បន្ថែមថា ៖ កេសកំណប់នេះមិនស្ថិតនៅក្រោមទឹក ហើយក៏មិននៅកៀកទន្លេ Rio Grande ។ អ្នកពុំចាំបាច់គាស់កកាយដុំថ្មធំៗ ឬតោងឡើងទួលចំណោតធ្វើអ្វី ចូរគិតថាខ្ញុំមានអាយុជាង ៨០ឆ្នាំហើយ ។ នៅពេលដែលខ្ញុំបើកឡាននាំយកកេសគ្រាប់នោះទៅលាក់ទុក។ ខ្ញុំជឿថា ការតាមប្រមាញ់រកនេះពិតជានាំមកនូវភាពរីករាយសម្រាប់អ្នកទាំងអស់គ្នា ៕