រូបភាពដែលត្រូវបានអ្នកដំណើរម្នាក់លើយន្តហោះដែលផ្ទុះម៉ាស៊ីនមួយរបស់ Southwest Airlines បង្ហាញឲ្យឃើញថាមនុស្សមួយចំនួនបានពាក់ម៉ាស់ផ្តល់អុកស៊ីហ្សែនខុសរបៀប ។
តាមបណ្តាអ្នកជំនាញការបទកំណត់ក្នុងការពាក់ម៉ាស់មុខផ្តល់អុកស៊ីហ្សែន ទាមទារត្រូវគ្របជិតទាំងមាត់ និងច្រមុះ បំណងផ្តល់អុកស៊ីហ្សែន ដល់អ្នកដំណើរបានគ្រប់គ្រាន់ គ្រាដែលសម្ពាធនៅក្នុងយន្តហោះធ្លាក់ចុះប្រថុចញ៉ុចនៅពេលដែលយន្តហោះបន្ថយរយៈកម្ពស់ហោះហើរ ។
ប៉ុន្តែពេលដែលយន្តហោះ Boeing 737 មានលេខសម្គាល់ ១៣៨០ របស់ Southwest Airlines បានផ្ទុះម៉ាស៊ីននៅលើមេឃបង្ខំឲ្យអាកាសយានិកត្រូវបង្ខំចិត្តចុះចតជាបន្ទាន់នោះ អ្នកដំណើរស្ទើរតែទាំងអស់លើយន្តហោះបានពាក់ម៉ាស់មុខអុកស៊ីហ្សែននេះ ខុសពីបទកំណត់ទាំងស្រុង ។
រូបភាពនេះបង្ហាញឲ្យឃើញថា អ្នកដំណើរបានពាក់ម៉ាស់ផ្តល់អុកស៊ីហ្សែនខុសរបៀប។
ជាក់ស្តែងពួកគេបានយកម៉ាស់មកគ្របតែលើមាត់ ដោយពុំបានគ្រប់លើច្រមុះឡើយ។ លើផ្នែកទ្រឹស្តីទង្វើនេះអាចបណ្តាលឲ្យអ្នកដំណើរទាំងនោះត្រូវស្លាប់ដោយខ្វះអុកស៊ីហ្សែន ឬរងការពុលឧស្ម័ន CO2 ព្រោះថា នៅគ្រាមានអាសន្នម៉ាស់មុខនេះឯងជាឧបករណ៍ទប់ស្កាត់បណ្តាមូលហេតុបណ្តាលឲ្យស្លាប់បាន។
សំណាងល្អណាស់ដែលក្នុងករណីនេះ អ្នកដំណើរទាំងអស់ពុំបានរងគ្រោះថ្នាក់ដោយសារទង្វើខុសឆ្គងរបស់ពួកគេ ។ គួរណាស់ពេលនោះ ពួកគេត្រូវត្រងត្រាប់ស្តាប់ការព្រមានពីសំណាក់ក្រុមហោះហើរ ពុំមែននាំគ្នាឈ្ងោកមើលទូរស័ព្ទរបស់ខ្លួននោះទេ ៕ សូយន