ស្ត្រីម្នាក់នៅក្នុងប្រទេសចិន ខណៈកំពុងដើរតាមផ្លូវនៅក្នុងទីក្រុង Hangzhou នៅពេលនោះនាងក៏បានប្រទះឃើញទូរស័ព្ទស្មាតហ្វូន១គ្រឿងនៅលើដី ។
នាងបានរើសវាឡើង និងរំភើបចិត្តយ៉ាងខ្លាំង ខណៈបានឃើញទូរស័ព្ទនោះពុំត្រូវបានការពារដោយពាក្យលេខសម្ងាត់ (password) ។ ភ្លាមៗនោះ នាងបានរកឃើញថាទូរស័ព្ទនេះ ត្រូវបាន Log ចូលទៅក្នុងគណនី Alipay រួចទៅហើយ ។
Alipay គឺជាកម្មវិធីទូទាត់ប្រាក់នៅលើទូរស័ព្ទចល័ត និងអ៊ិនធឺណិតភាគីទីបី ដែលបង្កើតឡើងដោយក្រុមហ៊ុន Alibaba Group និងស្ថាបនិករបស់ខ្លួនគឺ Jack Ma ។
ស្ត្រីរូបនោះដែលមានឈ្មោះថា Pei បានឆ្លៀតយកឱកាសមាសនេះ ឡើងផ្សារទំនើប ដើម្បីដើរទិញឥវ៉ាន់ម៉ាអស់ដៃតែម្តង ។
ប៉ូលីសបានបញ្ចេញវីដេអូពីកាមេរ៉ាឃ្លាំមើលនៅតាមបណ្តាហាងជាច្រើន ដោយបង្ហាញឲ្យឃើញ Pei ដើរទិញឥវ៉ាន់តែម្នាក់ឯង ។
នាងបានទៅហាងជាច្រើនដែលនៅជិតៗនោះ ជាកន្លែងដែលនាងបានរបស់របរផ្សេងៗជាច្រើន ។ នៅពេលឥវ៉ាន់ទាំងនោះច្រើនហួសប្រមាណ ធ្វើឲ្យពិបាកក្នុងការដោះស្រាយនាំយកទៅផ្ទះ, Pei ក៏បានហៅម្តាយ និងប្តីរបស់នាង ដែលក្រោយមក ត្រូវបានឃើញនៅក្នុងវីដេអូជួយយូរឥវ៉ាន់ឡើងសំពីងសំពោងតែម្តង ។
ចំណែកម្ចាស់ទូរស័ព្ទដែលអស់សង្ឃឹម នៅតែបន្តផ្ញើសារមកកាន់ Pei ដើម្បីស្នើសុំនាងឈប់ឡើង ដោយប្រើប្រាស់ទឹកប្រាក់របស់គាត់ទៀតទៅ ។ នៅពេលនាងពុំអើពើនឹងសំណើរបស់ជនរងគ្រោះ គាត់ក៏ធ្វើការព្រមានថា គាត់នឹងរាយការណ៍ទៅប៉ូលីស ។
ទោះយ៉ាងណា Pei នៅតែមិនខ្វល់ និងបន្តឡើងផ្ញើទិញឥវ៉ាន់ ។ ហេតុដូច្នេះ ប៉ូលីសក៏បានប្រកាសស្នើសាធារណជនជួយកំណត់អត្តសញ្ញាណស្ត្រីនេះ និងទីបំផុត នៅថ្ងៃបន្ទាប់ ប៉ូលីសបានរកឃើញកន្លែងស្នាក់នៅរបស់ Pei និងចាប់ខ្លួននាងតែម្តង ៕ ចន្ទី
