នារីម្នាក់បានសម្រេចចិត្តចែករំលែករឿងរ៉ាវរបស់នាង នៅលើបណ្តាញសង្គមហ្វេសប៊ុក ដើម្បីដាស់តឿនមនុស្សគ្រប់គ្នា កុំសូវទុកចិត្តជាមួយមនុស្សជិតស្និទ្ធខ្លួនខ្លាំងពេក ដើម្បីបញ្ចៀសករណីដូចជារូបនាងដែលត្រូវបានមិត្តភក្តិស្រី «ក្បត់ចិត្ត» ដែលនាងពុំនឹកស្មានថាជា «ចោរ» លួចទូរស័ព្ទ iPhone 6 Plus របស់នាងបែបនេះឡើយ ។
យោងតាមនារីរងគ្រោះឈ្មោះ Christine Dapiton បានរៀបរាប់នៅលើហ្វេសប៊ុកថា នាង និងមិត្តភក្តិស្រីឈ្មោះ Maria Angela Licayan ពុំមែនជាជនចម្លែកនឹងគ្នានោះទេ ពោលគឺពួកនាងជាមិត្តភក្តិដ៏ល្អនឹងគ្នាបំផុតតាំងតែពីមុនៗមក ។ ប៉ុន្តែ នៅថ្ងៃមួយ Christine ទើបតែដឹងថា Licayan បានក្បត់ចិត្តនាង បន្ទាប់ពីនាងបានបាត់ទូរស័ព្ទដៃពីក្នុងកាបូប ដែលទុកនៅជាមួយ Licayan ដោយសារតែនាងគិតថា ពួកគេទាំងពីរគឺជា «មិត្តភក្តិ» ។ ហើយ Christine ពិតជាមានការភ្ញាក់ផ្អើលយ៉ាងខ្លាំង នៅពេលនាងស្នើសុំក្រុមហ៊ុនរបស់នាង បង្ហាញកាមេរ៉ាសុវត្ថិភាព ។
តាមរយៈវីដេអូពីកាមេរ៉ាសុវត្ថិភាព Licayan ត្រូវបានឃើញស្ថិតក្នុងកាយវិការក្រឡេកឆ្វេង-ស្តាំ រួចលួចដកយកទូស័ព្ទ iPhone 6 Plus ពីក្នុងកាបូបរបស់ Christine និងយកវាទៅដាក់បង្កប់នៅក្នុងកាបូបរបស់ខ្លួនតែម្តង ខណៈនាងដើរចេញទៅកាន់បន្ទប់ទឹក ៕ ចន្ទី
