ភ្នំពេញ ៖ រថយន្តដឹកទំនិញធុនធ្ងន់មួយគ្រឿរបស់ក្រុមហ៊ុន H.C ដែលគេដាក់សង្ស័យថាផ្ទុកទម្ងន់លើសកំណត់នោះ បានបើកឆ្លងកាត់ស្ពានអ្នកលឿង រួចធ្វើឲ្យខូចស្រុតប៉ោងកៅស៊ូស្ពាននៅផ្នែកកង់ខាងមុខ ដោយសារតែរថយន្តនោះដឹកលើសទំនិញធ្ងន់។
ស្ពាន “ត្សឹបាសា” អ្នកលឿង ទទួលរងរគ្រោះទៀតហើយ ដោយសារតែរថយន្តធុនធំដឹកស៊ីម៉ងត៍ពេញមិនដឹងលើស ប៉ុន្មានសិបតោនទេ បានបើកចុះចំណោត រ៉េចង្កូតកៀបជាប់នឹងចិញ្ចើមខឿនស្ពាន ផុងដាច់ថ្នល់កៅស៊ូ ចំនួន២កន្លែង កាលពីម៉ោង១និង២០នាទី រសៀល ថ្ងៃទី២០ ខែមេសា ឆ្នាំ២០១៨ ស្ថិតក្នុងភូមិព្រែកខ្សាយ ឃុំព្រែកខ្សាយ(ក) ស្រុកពាមរក៍ ខេត្តព្រៃវែង។
សមត្ថកិច្ចមូលដ្ឋានបានឲ្យដឹងថា នៅមុនពេលកើតហេតុគេឃើញរថយន្តធុនធំ១គ្រឿងម៉ាកហ៊ិនដាយ ពណ៌ខៀវ ពាក់ស្លាកលេខ ព្រះសីហនុ 3A-1787 បើកបរដោយបុរសម្នាក់ ឈ្មោះ ង៉ែត សុភ័ក្រ អាយុ៣៣ឆ្នាំ រស់នៅភូមិពស់ពង ឃុំនរាយ ស្រុកឈូក ខេត្តកំពត ដែលបានបើកដឹកស៊ីម៉ងត៍ ក្នុងទិសដៅពី ភ្នំពេញទៅស្វាយរៀង។ លុះពេលបើកមកដល់ចំណុចខ្សែកាបខាងលើ ចុះចំណោត រថយន្តបានដាច់ទុយោខ្យល់បណ្តាលឲ្យរ៉េចង្កូត កៀបជាប់នឹងចិញ្ចើមខឿនស្ពាន កូតដាច់ថ្នល់កៅស៊ូ ចំនួន២កន្លែង។
ការអនុញាតឲ្យរថយន្តធុនធំដឹកស៊ីម៉ងត៍ពេញមិនដឹងលើស ប៉ុន្មានសិបតោនបើកឆ្លងស្ពានអ្នកលឿង ដែលជាជំនួយ របស់រាជរដ្ឋាភិបាលជប៉ុននេះ ត្រូវបានមហាជនរិះគន់ទៅលើស្ថានីយ៍ថ្លឹងរថយន្ត សង្ស័យខូចភ្នែកជញ្ជីញទេដឹង បានជា អនុញាតឲ្យរថយន្ត ដឹកលើសទម្ងន់បំផ្លាញស្ពាន។ នេះជាលើកទីពីរហើយដែលមានរថយន្តធុនធ្ងន់ ធ្វើឲ្យខូចស្ពានអ្នកលឿង។
សមត្ថកិច្ចបានឲ្យដឹងថា ក្រោយទទួលបានព័ត៌មានកម្លាំងនគរបាលស្រុក សហការជាមួយមន្ត្រីសាធារណៈការ និងដឹងជញ្ជូនខេត្ត ក៏បានចុះទៅពិនិត្យ ឃើញថា រថយន្តនេះ មិនបានបង្កឲ្យមានមនុស្សគ្រោះថ្នាក់ទេ គឺគ្រាន់តែដាច់ផ្ទុះថ្នល់កៅស៊ូ ដែលជាសម្បត្តិសាធារណៈ ទើបមន្ត្រីសាធារណការ ឲ្យសមត្ថកិច្ចអូសយកទៅរក្សាទុក នៅប៉ុស្តិ៍នគរបាលរដ្ឋបាល ព្រែកខ្សាយ(ក) ដើម្បីដោះស្រាយសងសំណង ដែលខូចខាតសម្បត្តិសាធារណៈ។
អាជ្ញាធរបានដាក់ស្ថានីយថ្លឹងរថយន្ត នៅសងខាងស្ពានអ្នលឿនលឿន ចុះហេតុអ្វីបានថ្លឹងមិនឃើញលើសទាល់តែសោះ ជញ្ជីងទាំងពីរខូចភ្នែកបាត់ហើយក៏មិនដឹង បើចឹងទេ សុំណូមពរដល់លោករដ្ឋមន្ត្រី ជួយជួសជុលស្ថានីយ៍ជញ្ជីងទាំងពីរនោះឡើងវិញផង។ រថយន្តដឹកលើសចំណុះប្រភេទនេះ លើសប្រវែង ដែលសម្តេចតេជោ បានហាមកន្លងមកទេ ហើយកាត់ទ្រុងចោល បើលើសមែនមានន័យថា ចៅហ្វាយខេត្តព្រៃវែង និង កណ្តាល មិនស្តាប់បទបញ្ជាសម្តេចទេ ។ សម្តេចនាយករដ្ឋមន្ត្រី ព្រមានថា បើរកឃើញរថយន្ត វែង លើសប្រវែង ផ្ទុកលើសទម្ងន់ បើកនៅលើទឹកដីខេត្តណា ខេត្តនោះ ជាអ្នកទទួលខុសត្រូវ ។
ទោះយ៉ាងណា តំណាងក្រុមហ៊ុន H.Cបានប្រាប់ថា ឡានដែលចតលើស្ពានអ្នកលឿង ហើយបង្កឲ្យខូចថ្នល់កៅស៊ូនេះ មិនមែនមកពីឡានដឹកលើសទម្ងន់ទេ គឺមកពីឡានខូច ហើយខ្លាចរអិលថយក្រោយ ខ្លាចបង្កគ្រោះថ្នាក់ដល់អ្នកដទៃ ក្រុមការងារក៏បានយកឈើមកកល់កង់ ហើយធ្វើឲ្យខូចថ្នល់កៅស៊ូបន្តិចបន្តួច ប៉ុន្តែក្រុមហ៊ុនធានាថា នឹងចេញសងវិញគ្រប់យ៉ាង ធ្វើយ៉ាងណាឲ្យថ្នល់កៅស៊ូដែលខូចនោះ ស្អាតឡើងវិញ ៕ ដោយ៖បញ្ញាស័ក្តិ
