ខេត្តព្រះសីហនុ៖ ភ្ញៀវទេសចរចម្រុះជាតិសាសន៍ ពិសេសភ្ញៀវជាតិ បង្ហាញការព្រួយបារម្ភខ្លាចទៅថ្ងៃអនាគត ខេត្តព្រះសីហនុ មិនមានឆ្នេរខ្សាច់
ឬឆ្នេរសមុទ្រសម្រាប់សម្រាកលំហែ ឬចុះងូតទឹកកម្សាន្តឲ្យបានទូលំទូលាយទៀតទេ ព្រោះពេលនេះឆ្នេរសមុទ្រភាគច្រើន ត្រូវរដ្ឋបាលខេត្តព្រះសីហនុ និងរាជរដ្ឋាភិបាលកម្ពុជា បានវិនិយោគទៅឲ្យក្រុមហ៊ុនអភិវឌ្ឍសង់សណ្ឋាគារធំៗ និងហ៊ុមព័ទ្ធរបងបិទឆ្នេរសកមុទ្រ មិនឲ្យមនុស្សដើរឆ្លងកាត់ជាចំហទៀតទេ។
ភ្ញៀវទេសចរជាតិ ដែលចូលទៅទស្សនាខេត្តព្រះសីហនុ ក្នុងអំឡុងពេលពិធីបុណ្យចូលឆ្នាំថ្មីឆ្នាំនេះ បានឲ្យដឹងថា ឃើញឆ្នេរសមុទ្រភាគច្រើននាខេត្តទេសចរណ៍មួយនេះ ត្រូវក្រុមហ៊ុនឯកជនសំណង់សំណង់ធំស្កឹមស្កៃប្រណិតៗជាច្រើន និងសង់នៅជាប់ឆ្នេរសមុទ្រ ហើយបានហ៊ុមព័ទ្ធរបងមិនឲ្យប្រជាពលរដ្ឋ ឬភ្ញៀវទេសចរដើរឆ្លងកាត់នោះទេ។
បញ្ហានេះ លោក យន្ត មីន អភិបាលខេត្តព្រះសីហនុ មានប្រសាសន៍ថា រាល់សំណង់សណ្ឋាគារខ្នាតធំ ឬលំដាប់ផ្កាយទំនើបៗ ដែលកំពុងសាងសង់នៅតាមឆ្នេរសមុទ្រនាមូលដ្ឋាននេះ នឹងជួយឲ្យប្រជាពលរដ្ឋ ពិសេសយុវជនមានការងារធ្វើ និងមានប្រាក់បៀវត្សន៍ខ្ពស់ជួយបង្កើនប្រាក់ចំណូលគ្រួសាររបស់ពួកគេ ឲ្យមានភាពរីកចំរើននាថ្ងៃអនាគត។
យ៉ាងនេះក្តី ក្រុមអ្នកឃ្លាំមើលសង្គម ព្រួយបារម្ភថា ខ្លាចទៅថ្ងៃអនាគត ខេត្តព្រះសីហនុ នឹងមិនមានឆ្នេរសមុទ្រ សម្រាប់ផ្តល់ជូនភ្ញៀវទេសចរជាតិអន្តរជាតិ ដែលចូលទៅទស្សនា ឬសម្រាកលំហែ និងងូតទឹកសមុទ្រឲ្យបានធំទូលំទូលាយទៀតទេ។
ចំណុចនេះ ក្រុមអ្នកឃ្លាំមើលសង្គម បានកត់សម្គាល់ថា បច្ចុប្បន្នភាព នៃឆ្នេរសមុទ្រ ឬឆ្នេរខ្សាច់ភាគច្រើននាខេត្តព្រះសីហនុ ដែលត្រូវបាន លោក យន្ត មីន អភិបាលខេត្តព្រះសីហនុអាណត្តិនេះ បានបើករបងហ៊ុំព័ទ្ធឆ្នេរសមុទ្រប្រមាណ ២ឆ្នាំមុននេះ ប៉ុន្តែបច្ចុប្បន្នត្រូវបានបិទរបង និងត្រូវរាជរដ្ឋាភិបាល ក៏ដូចជារដ្ឋបាលខេត្តព្រះសីហនុ បានវិនិយោគ ទៅឲ្យក្រុមហ៊ុនឯកជន ដើម្បីអភិវឌ្ឍសង់សណ្ឋាគារធំៗ មានរយៈពេលវែង ដែលនាំឲ្យឆ្នេរសមុទ្រនាខេត្តទេសចរណ៍មួយនេះរួមតូចចង្អៀត។
អ្នកឃ្លាំមើលសង្គមមួយចំនួន បានកត់សម្គាល់ថា នៅក្នុងអាណត្តិ ដែល លោក យន្ត មីន បានមកដឹកនាំជាអភិបាលខេត្តព្រះសីហនុ គឺឆ្នេរសមុទ្រភាគច្រើននាមូលដ្ឋានេះ ត្រូវបានវិនិយោគទៅឲ្យក្រុមហ៊ុនឯកជន ហើយត្រូវក្រុមហ៊ុនវិនិយោគទាំងនោះ បានហ៊ុមព័ទ្ធរបងថ្ម និងដែករឹងមាំ មិនឲ្យភ្ញៀវទេសចរ ឬមិនអនុញ្ញាតឲ្យប្រជាពលរដ្ឋខ្មែរធ្វើដំណើរឆ្លងកាត់ទៀតទេ។
ផ្តើមពីបញ្ហានេះ ទាំងប្រជាពលរដ្ឋ ពិសេសភ្ញៀវទេសចរ បានបង្ហាញការព្រួយបារម្ភថា ខ្លាចទៅថ្ងៃអនាគត ខេត្តព្រះសីហនុ នឹងមិនមានឆ្នេរខ្សាច់ ឬឆ្នេរសមុទ្រ សម្រាប់ផ្តល់ជូនភ្ញៀវទេសចរ ដែលចូលមកទស្សនាខេត្តនេះ សម្រាកលំហែលើឆ្នេរខ្សាច់ និងចុះងូតទឹកសមុទ្រ ឲ្យបានទូលំទូលាយទៀតទេ ព្រោះត្រូវបានរដ្ឋបាលខេត្តព្រះសីហនុ ពិសេសរាជរដ្ឋាភិបាល បាន វិនិយោគទៅឲ្យក្រុមហ៊ុនឯកជនស្ទើរទាំងស្រុងអស់ទៅ។
ភ្ញៀវទេសចរជាតិ ឲ្យដឹងថា បច្ចុប្បន្ននេះឃើញឆ្នេរសមុទ្រ ឬឆ្នេរខ្សាច់មួយចំនួននាខេត្តព្រះសីហនុ រួមមាន៖ ឆ្នេរសមុទ្រនៅទល់មុខបរិវេណសាលាខេត្តព្រះសីហនុ ចាប់ពីឆ្នេរថ្មី ឆ្នេរប៉ោកី ឆ្នេរមាស ឆ្នេរជ័យជំនះឆ្នេរហាវៃ ឆ្នេរលំហែកាយ ឆ្នេរឯករាជ្យ និងឆ្នេរសុខាជាដើម ត្រូវក្រុមហ៊ុនសង់សំណង់សណ្ឋាគារធំស្កឹមស្កៃ នៅជាប់ឆ្នេរសមុទ្រ និងធ្វើរបងហ៊ុមព័ទ្ធឆ្នេរមិនឲ្យមនុស្សដើរឆ្លងកាត់នោះទេ។
ចំណុចនេះ ក្រុមមន្ត្រីឃ្លាំមមើលសង្គម និងភ្ញៀវទេសចរជាតិ បានបង្ហាញទស្សនៈដ្រដៀងគ្នាថា មិនជំទាស់ផែនការអភិវឌ្ឍ របស់រាជរដ្ឋាភិបាល និងរដ្ឋបាលខេត្តព្រះសីហនុទេ ដែលបានខិតខំស្វែងរកអ្នកវិនិយោគទុនធំៗ ពិសេសអ្នកវិនិយោគទុនចិន ឲ្យចូលមកអភិវឌ្ឍមូលដ្ឋាននេះទេ ប៉ុន្តែគួរឲ្យការផ្តល់សិទ្ធិវិនិយោគទាំងនោះ កុំឲ្យប៉ះពាល់ ឬបំផ្លាញដល់ឆ្នេរសមុទ្រខេត្តព្រះសីហនុ ដែលជាប់ចំណាត់ថ្នាក់ ជាឆ្នេរស្រស់ស្អាតលំដាប់ពិភពលោក ប៉ុន្តែបែរជាឆ្នេរសមុទ្រត្រូវរួមតូចចង្អៀត ឬមិនមានឆ្នេរសមុទ្រ ឲ្យបានទូលំទូលាយ សម្រាប់ផ្តល់ជូនភ្ញៀវទេសចរ ជាតិអន្តរជាតិ ដែលចូលមកទស្សនាមូលដ្ឋាននេះនាថ្ងៃអនាគត។
ឆ្លើយតបញ្ហានេះ អភិបាលខេត្តព្រះសីហនុ លោក យន្ត មីន នាពេលកន្លងមកធ្លាប់ផ្តល់សម្ភាសឲ្យប្រព័ន្ធផ្សព្វផ្សាយថា រដ្ឋបាលខេត្ត ក៏ដូចជាសម្តេចប្រមុខដឹកនាំរាជរដ្ឋាភិបាល បានខិតខំស្វែងរកអ្នកវិនិយោគធំៗ ឲ្យចូលមកបណ្តាក់ទុន ឬបង្កើតមុខរបររកទទួលទាន សម្រាប់ប្រជាពលរដ្ឋ និងយុវជន ឲ្យមានការងារធ្វើបង្កើនប្រាក់ចំណូលគ្រួសារឲ្យរីកចំរើននាថ្ងៃខាងមុខ។
លោក យន្ត មីន បញ្ជាក់ថា អ្នកវិនិយោគធំៗភាគច្រើនបានវិនិយោគទៅលើសំណង់សណ្ឋាគារប្រណិតៗ លើគម្រោងវិនិយោគរាប់រយលានដុល្លារសហរដ្ឋអាមេរិក ដើម្បីជម្រុញឲ្យខេត្តព្រះសីហនុ មានការរីកចំរើនបានឆាប់ ឲ្យស្របតាមគោលនយោបាយ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានដាក់ចេញ។
ត្រង់ចំណុចនេះ លោក យន្ត មីន មានជំនឿមុតមាំថា តាមរយៈសំណង់អាគារធំស្កឹមស្កៃ ឬប្រណិតៗ រីកដូចផ្សិតជាច្រើនអាគារ ដែលកំពុងសាងសង់រាល់ថ្ងៃនេះ នឹងអាចជួយឲ្យប្រជាពលរដ្ឋ ពិសេសយុវជនរស់នៅខេត្តព្រះសីហនុ និងមកពីបណ្តាខេត្តផ្សេងៗ មានការងារធ្វើមានប្រាក់បៀវត្សន៍ ដើម្បីរួមចំណែកបង្កើនប្រាក់ចំណូលចិញ្ចឹមគ្រួសារមានការរីកចម្រើននៅតាមគ្រួសារនិមួយៗជាក់ជាមិនខាន។
ឆ្នេរសមុទ្រប្រទេសកម្ពុជា សរុបមានប្រវែង ៤៤០គីឡូម៉ែត្រ។ ខេត្តមានមូលដ្ឋានជាប់ឆ្នេរសមុទ្រ រួមមាន៖ ខេត្តកោះកុង ខេត្តព្រះសីហនុ ខេត្តកំពត និងខេត្តកែប។ ខេត្តទាំង ៤នេះ ត្រូវបានដាក់បញ្ចូលជាសមាជិកពេញសិទ្ធិរបស់ក្លឹបឆ្នេរសមុទ្រ ដែលស្រស់ស្អាតបំផុតនៅលើសកលលោក កាលពីថ្ងៃទី២៦ ខែឧសភា ឆ្នាំ២០១១ នៅប្រទេសសេណេហ្គាល់ (Senegal)៕ ដែន សីមា