ត្បូងឃ្មុំ៖ សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយខេត្តត្បូងឃ្មុំ នៅព្រឹកថ្ងៃទី២១ ខែមេសា ឆ្នាំ២០១៨នេះ អញ្ជើញជាអធិបតី បើកកិច្ចប្រជុំផ្សព្វផ្សាយ សេចក្តីសម្រេចស្តីពី ផែនការឆ្ពោះទៅកាន់ការបោះឆ្នោត ជ្រើសរើសតំណាងរាស្ត្រ នីតិកាលទី៦ ឆ្នាំ២០១៨ របស់គណបក្សខេត្តត្បូងឃ្មុំ នៅមន្ទីរគណបក្សប្រជាជនខេត្តត្បូងឃ្មុំ។
មានប្រសាសន៍ក្នុងកិច្ចប្រជុំនោះ សម្តេច ហេង សំរិន បានលើកផែនការពិភាក្សា ជូនសមាជិកសមាជិកា ដើម្បីអនុវត្តន៍ឲ្យបានម៉ឺងម៉ាត់ ទៅតាមផែនការ ក្នុងនោះមាន៖ ការងារជាយុទ្ធសាស្ត្ររបស់គណបក្ស ការប្តេជ្ញាចិត្តនិងការងារជាយុទ្ធសាស្ត្រ ដែលត្រូវយកចិត្តទុក ដាក់ការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ការងារមហាជន ការងារឃោសនា ការពង្រឹងកម្លាំងរបស់គណបក្សសម្រាប់ការបោះឆ្នោត ពេលយុទ្ធនាការឃោសនាបោះឆ្នោត ថ្ងៃបោះឆ្នោត និងក្រោយពេលបោះឆ្នោត ។
ជាមួយគ្នានោះ សម្តេចអគ្គមហាពញាចក្រី បានដាក់ចេញ នូវគោលគំនិតជាវិជ្ជមាន មាន៣ចំណុច ដែលបានកំណត់ក្នុងផែនការ សំដៅបង្កើនប្រសិទ្ធភាពការងារមួយចំនួន រួមមាន៖
១. គណបក្សគ្រប់ថ្នាក់ត្រូវរៀបចំបង្កើតឲ្យមានគណៈបញ្ជាការយុទ្ធនាការបោះឆ្នោតនៅថ្នាក់ខ្លួន។ វិធានការនេះ ដើម្បីធានាបានប្រសិទ្ធភាពក្នុងការទទួលខុសត្រូវដឹកនាំអនុវត្តន៍ការងារសំខាន់ៗដូចជា ការងារទាក់ទងនឹងផ្នែកច្បាប់ ប្រសិទ្ធភាពនៃការឃោសនា ឥទ្ធិពលនៃចលនាមហាជន ប្រជាជន ក៏ដូចជាលទ្ធភាពនៃការដោះស្រាយថវិកា បំពេញតម្រូវការផ្សេងៗ ។ ២.ចំពោះថ្នាក់ដឹកនាំគណបក្សថ្នាក់នីមួយៗ គប្បីទទួលជាអនុប្រធានប្រចាំការ គណៈបញ្ជាការយុទ្ធនាការបោះឆ្នោតថ្នាក់ខ្លួន ។ សំខាន់នោះគឺការដឹងមុន អំពីឧបាយកលប៉ុនប៉ង ធ្វើឲ្យរាំងស្ទះដល់ការបោះឆ្នោត ក៏ដូចជា ខ្លឹមសារបរិហារិះគន់របស់បក្សប្រឆាំង ឬ ជនអគតិមកលើគណបក្សប្រជាជន ។ ៣. ស្មារតីសាមគ្គីភាពផ្ទៃក្នុង ពិតជាធានាបានល្អប្រសើរ យុទ្ធសាស្ត្រគណបក្សដែលបានបញ្ជាក់ថា “សមាជិកគណបក្ស ១ រូប គឺជាសន្លឹកឆ្នោត ១ សន្លឹក ” ។
សម្តេច បានបញ្ជាក់ថា ជាមួយនឹងទិសដៅភារកិច្ច ត្រូវអនុវត្តន៍តាមផែនការ នាពេលខាងមុខនេះ គឺពិតជាមានសារសំខាន់ណាស់ នោះគឺការប្តេជ្ញាចិត្ត យុទ្ធសាស្ត្ររបស់គណបក្សយើង ឆ្ពោះទៅកាន់ការបោះឆ្នោតជ្រើសតាំង តំណាងរាស្ត្រនីតិកាលទី៦ នាខែកក្កដា ឆ្នាំ២០១៨ ខាងមុខនេះ ដើម្បីទទួលបានជោគជ័យ ។
ជាចុងក្រោយ សម្តេចអគ្គមហាពញាចក្រី ហេង សំរិន បានផ្តាំផ្ញើរដល់ ថ្នាក់ដឹកនាំ និងក្រុមការងារគណបក្ស គ្រប់ថ្នាក់ក្នុងខេត្តត្បូងឃ្មុំ ទាំងអស់ ត្រូវបំពេញភារកិច្ច ប្រកបដោយមនសិកា និងការទទួលខុសត្រូវខ្ពស់ សាមគ្គីគ្នាជាធ្លុងមួយ ដើម្បីសម្រេចបាននូវជោគជ័យ សម្រាប់គណបក្សនាពេលបោះឆ្នោតខាងមុខ តាមការប្តេជ្ញាជាយុទ្ធសាស្ត្ររបស់គណបក្សប្រជាជនកម្ពុជា ៕ ដោយ ៖ បញ្ញាស័ក្តិ
