ក្មេងប្រុសម្នាក់ឈ្មោះថា Ryusei “Ryuji” Imai អាយុ ៨ ឆ្នាំ មកពី Nara ប្រទេសជប៉ុន បានកំពុងល្បីយ៉ាងខ្លាំងនៅលើអ៊ីនធើរណេត ចំពោះសមត្ថភាពដ៏អស្ចារ្យរបស់គេ «ចម្លង» ដូចបេះបិទពីស្ទៃល៍សម្តែងក្បាច់គុនកុងហ្វ៊ូរបស់ លី សៀវឡុង (Bruce Lee) ដែលលោកបានថតនៅក្នុងភាពយន្តពីររឿង “Way of the Dragon” និង “Enter the Dragon” ។
Ryuji បានចែករំលែកវីដេអូដែលកំពុងរីករាលបច្ចុប្បន្ននេះ រយៈពេលពីរបីថ្ងៃមកហើយ មុនពេលខួបកំណើតរបស់គេ ទៅកាន់អ្នកតាមដានជាង ២៩២ ពាន់នាក់ នៅលើហ្វេសប៊ុក ដែលបានបង្ហាញពីជំនាញសម្តែងក្បាច់ «ត្រាប់តាម» ម្ចាស់សេ្តចគុនកុងហ្វ៊ូដ៏ល្បីល្បាញនេះនៅលើពិភពលោក ។
Ryuji ត្រូវបានមនុស្សជាច្រើនចាត់ទុកថាជា លី សៀវឡុង ចាប់ជាតិ នៅពេលបានឃើញការបញ្ចេញសមត្ថភាពសម្តែងរបស់គេដ៏ល្អឥតខ្ចោះ ដែលមើលទៅដូច លី សៀវឡុង បេះដាក់យ៉ាងនេះ ។
យោងតាម Daily Mail Ryuji បានឲ្យដឹងថា រូបគេបានមើលភាពយន្តរបស់ លី សៀវឡុង ចាប់តាំងពីនៅវ័យកុមារម្លេះ ជាមួយក្រុមគ្រួសារដែលជាអ្នកគាំទ្រ លី សៀវឡុង ជំនាន់ទី៣ដ៏ខ្លាំងក្លាបំផុត ។
ដោយសារតែស្រលាញ់ចូលចិត្តខ្លាំងពេក Ryuji បានសម្រេចចិត្តហ្វឹកហាត់តាម idol របស់ខ្លួន នៅពេលដែលរូបគេទើបតែមានអាយុ ៤ ឆ្នាំ ។
Ryuji បានហ្វឹកហាត់រៀងរាល់ពេលព្រឹករយៈពេល ៩០ នាទី ដោយចាប់ផ្តើមនៅម៉ោង ៦ និងបន្តហ្វឹកហាត់ម្តងទៀត នៅពេលគេវិលត្រឡប់ពីសាលារៀនវិញ ។ Ryuji ក៏បានរត់ជិត១ម៉ោងផងដែរ ដើម្បីកម្តៅសាច់ដុំ មុនពេលអនុវត្តហាត់ទាត់ និងប្រើប្រាស់ដំបង២កំណាត់រយៈពេល២ម៉ោងបន្ថែម តាមរយៈការណែនាំរបស់ឪពុករបស់គាត់ ។ សរុបទៅគឺគាត់ហ្វឹកហាត់ក្នុង១ថ្ងៃ ៤ម៉ោងកន្លះ ។
បន្ទាប់ពីហ្វឹកហាត់យ៉ាងខ្លាំងអស់រយៈពេលជាច្រើនឆ្នាំមក ជាលទ្ធផល ក្មេងប្រុសមានការតស៊ូអំណត់នេះ អាចទាត់មនុស្សពេញវ័យឲ្យខ្ទាតចេញពីកៅអីបាន ។ សូមមើលវីដេអូខាងក្រោម៖
ចំណែកវីដេអូខាងក្រោមនេះ Ryuji ព្យាយាមហាត់អាវ៉ង់៖
សូមបញ្ជាក់ថា នេះមិនមែនជាលើកទី១ទេ ដែល Ryuji ត្រូវបានគេចាប់អារម្មណ៍ ។ ក្នុងឆ្នាំ២០១៥ រូបគេបានបង្ហាញវត្តមានជាបេក្ខជនបញ្ចេញទេពកោសល្យសម្រាប់កុមារដែលហៅថា «កំពូលក្មេង (Superkids)» ផងដែរ ៕ ចន្ទី