កំពង់ស្ពឺ ៖ យោងតាមពាក្យបណ្តឹងតាមទូរស័ព្ទរបស់ម្ចាស់រថយន្ត កម្លាំងនគរបាលស្រុកឧដុង្គ បានចេញប្រតិបត្តិការបង្ក្រាបបុរសម្នាក់ ជាមុខសញ្ញាចោរលួចរថយន្ដទួរីស Sangyung ពីខេត្ដព្រះសីហនុដែលមានបំពាក់ប្រព័ន្ធការពារសុវត្ថិភាព GPS ។
ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា នៅថ្ងៃសៅរ៍ ទី២១ខែមេសាឆ្នាំ២០១៨ វេលាម៉ោង ៣៖៣០ នាទី បានទទួលបណ្តឹងតាមទូរស័ព្ទ របស់ឈ្មោះ អ៊ា សុខគាង ភេទប្រុស អាយុ ៥៤ឆ្នាំ នៅភូមិមួយ សង្កាត់លេខ៤ ក្រុងព្រះសីហនុ ខេត្តព្រះសីហនុ ថាមានជនសង្ស័យ លួចរថយន្តរបស់ខ្លួន ម៉ាកសាំងយ៉ុង ពណ៌ស ពាក់ស្លាកលេខព្រះសីហនុ 2B.4435 ប្រហែលនៅម៉ោង ២២៖៣០ នាទី ថ្ងៃទី២០ខែមេសាឆ្នាំ២០១៨។ លុះដល់ថ្ងៃទី២១ខែមេសាឆ្នាំ២០១៨ វេលាម៉ោង៣៖៣០ នាទី កម្លាំងអធិការដ្ឋាននគរបាលស្រុកឧដុង្គ ទទួលបានព័ត៌មានថា មានរថយន្ដមួយគ្រឿងម៉ាក Sangyung ភិនភាគស្រដៀងដូចរថយន្ដបាត់ ក៏មានការសង្ស័យ កម្លាំងដឹកនាំដោយវរសេនីយ៍ឯក ខឹម សាម៉ុន អធិការស្រុក បានចុះ និងឃាត់មុខសញ្ញាសង្ស័យម្នាក់ ឈ្មោះ អឿន សុខគីម ភេទប្រុស អាយុ ៤១ឆ្នាំ រស់នៅភូមិ១ សង្កាត់បួន ក្រុងព្រះសីហនុ ខេត្តព្រះសីហនុ រថយន្តមួយគ្រឿង នៅចំណុចភូមិព្រៃជុំ ឃុំយុទ្ធសាមគ្គី ស្រុកឧដុង្គ ខេត្តកំពង់ស្ពឺ យកមកសាកសួរ។ ជនសង្ស័យបានឆ្លើយសារភាពថា រថយន្ដខាងលើ ខ្លួនបានលួចពីខេត្ដព្រះសីហនុ ពិតប្រាកដមែន ។
តាមការបញ្ជាក់ពីលោក ខឹម សាម៉ុន អធិការស្រុក បានឲ្យដឹងបន្ថែមថា ករណីខាងលើ ដោយបានកិច្ចការល្អ ពីម្ចាស់រថយន្ដ ក្នុងការផ្ដល់តម្រុយអំពីព័ត៌មាននៃរថយន្ដដែលមានបំពាក់ ( GPS ) មកជាបន្ដបន្ទាប់ ទើបកិច្ចប្រតិបត្ដិការ ទទួលបានលទ្ធផលល្អ។
បច្ចុប្បន្នជនសង្ស័យ និង វត្ថុតាងខាងលើ ត្រូវបានកម្លាំងផ្នែកព្រហ្មទណ្ឌ កសាងសំណុំរឿង បញ្ជូនទៅការិយាល័យជំនាញនៃស្នងការដ្ឋាននគរបាលខេត្ដកំពង់ស្ពឺចាត់ការតាមនីតិវិធី៕ ដោយ៖បញ្ញាស័ក្តិ
