ស្វាយរៀង ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភានិងអធិការកិច្ច និងជាប្រធានក្រុមការងារចុះជួយ ខេត្តស្វាយរៀង នៅព្រឹកថ្ងៃទី២១ ខែមេសា ឆ្នាំ២០១៨នេះ បានមានប្រសាសន៍ថា ៖ នៅប្រទសកម្ពុជាយើងរាជរដ្ឋាភិបាលបាលបានចាត់ទុកវិស័យព្រះពុទ្ទសាសនាជាសាសនារបស់រដ្ឋ ហើយព្រះពុទ្ធសាសនាគឺពុំអាចខ្វះបានឡើយដើម្បីចូលរួមអភិវឌ្ឍន៍ប្រទេសឱ្យមានភាពរីកចម្រើនជឿនលឿននិងក៍ពុំអាចផ្តាច់ចេញពីវិស័យអាណាចក្របានដែរ ។
លោកជំទាវ ម៉ែន សំអន បានមានប្រសាសន៍ដូច្នេះក្នុងឱកាសដែលលោកស្រីបានអញ្ជើញជាអធិបតីនៅក្នុងពិធីកាត់ឫសសីមានៅវត្តទ្រា ស្ថិតក្នុងភូមិស្នាយគ្រាងឃុំធ្លក ស្រុកស្វាយជ្រំ ខេត្តស្វាយរៀង។ ក្នុងឱកាសនោះលោកស្រី ក៏បាននាំនូវការសាកសួរសុខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាតក្រហមកម្ពុជា ដែលជានិច្ចកាលសម្តេចទាំងទ្វេរតែងនឹករលឹកដល់បងប្អូន ប្រជាពលរដ្ឋនៅគ្រប់ទីកន្លែង។ លោកជំទាវ ក៏បានធ្វើការជំរុញឱ្យមន្ត្រីនៅក្នុងមូលដ្ឋានទាំងអស់ ត្រូវបង្កើតសមត្ថភាព ឱ្យខ្លាំងក្លាបន្ថែមទៀត ដើម្បីដោះស្រាយទុក្ខលំបាករបស់ពលរដ្ឋ ជាពិសេសត្រូវបម្រើសេវាសាធារណៈឱ្យបានឆាប់រហ័សជូនពួកគាត់។ ការផ្តល់សេវាសាធារណៈជូនប្រជាពលរដ្ឋ ការផ្ដល់នូវតម្រូវការប្រចាំថ្ងៃ ជូនពួកគាត់ដូចជាការដោះស្រាយ លិខិតស្នាមផ្សេងៗ គឺត្រូវតែធ្វើឱ្យបានឆាប់រហ័សទាន់ចិត្ត ប្រកបដោយតម្លាភាពត្រឹមត្រូវ និងមានអាកប្បកិរិយារួសរាយរាក់ទាក់ទន់ភ្លន់ ទាំងនេះជាក្រមសីលធម៌ របស់មន្ត្រី ហើយនឹងប្រាកដជាទទួលបាននូវការគាំទ្រមកវិញ ពីសំណាក់ប្រជាពលរដ្ឋ ដែលជាម្ចាស់ឆ្នោត ជាក់ជាមិនខាន។
លោកជំទាវ ម៉ែន សំអន ក៏បានរំលឹកពីប្រវត្តិរបស់ប្រទេសកម្ពុជា ដែលធ្លាប់ឆ្លងកាត់របបប្រល័យពូជសាសន៍ ប៉ុល ពត បានកាប់សម្លាប់មនុស្សស្លូតត្រង់ អស់ជិត៣លាននាក់ ហើយបានបំផ្លិចបំផ្លាញហេដ្ឋារចនាសម្ព័ន្ធដល់ឫសគល់។ ថ្ងៃ៧មករាឆ្នាំ១៩៧៩ ជាថ្ងៃកំណើតទី២ បានរំដោះប្រទេសតាំងពីបាតដៃទទេ ហើយបានធ្វើឱ្យមានការរីកចម្រើនលើគ្រប់វិស័យ ដែលជាការដឹកនាំដ៏ត្រឹមត្រូវ របស់រាជរដ្ឋាភិបាលកម្ពុជា និងគណបក្សប្រជាជនកម្ពុជា មានសម្តេចតេជោ ហ៊ុន សែន ជានាយកដ្ឋមន្ត្រី បាននាំមកសុខសន្តិភាព និងការអភិវឌ្ឍឥតឈប់ឈរ និងនយោបាយឈ្នះ-ឈ្នះ ដែលបានដាក់ចេញទទួលបានជោគជ័យ គឺខ្មែរតែមួយ។
លោកជំទាវ ម៉ែន សំអន ក៏បានអំពាវនាវដល់សមាជិកបក្សទាំងអស់ ត្រូវទៅចូលរួមបោះឆ្នោតបោះជ្រើសរើសតំណាងរាស្ត្រ នៅថ្ងៃទី២៩ ខែកក្កដា ឆ្នាំ២០១៨ ឱ្យបានគ្រប់ៗគ្នា ជាពិសេសត្រូវគៀងគរ សមាជិកថ្មី ឱ្យបានច្រើនបន្ថែមទៀតបោះឆ្នោតជូនគណបក្សប្រជាជនកម្ពុជា គាំទ្របេក្ខភាពសម្តេចតេជោ ហ៊ុន សែន ធ្វើជានាយករដ្ឋមន្ត្រី គ្រប់អណត្តិដើម្បីបានកសាងប្រទេស ឱ្យរីកចម្រើនជាបន្តបន្ទាប់ទៀតផងដែរ៕ វ៉ៃកូ