គ្លីនិកកែសម្ផស្សមួយនៅក្រុងប៉េកាំងបានត្រូវកូនប្រុសរបស់អតិថិជនវ័យ ៧៨ឆ្នាំម្នាក់ របស់ខ្លួនចោទប្រកាន់ថា បានបោកបញ្ឆោតម្តាយរបស់គាត់ឲ្យចំណាយលុយយ៉ាងច្រើន ដើម្បីទទួលសេវាកែកុនសម្រស់នៅទីនេះ។
តាម SCMP ស្ត្រីចំណាយរូបនេះបានចំណាយអស់ ៤៤.០០០ដុល្លារ ព្រោះជឿលើពាក្យបោកបញ្ឆោតរបស់គ្លីនិកនេះក្នុងអំឡុងពេល ៨ខែមកហើយ ។
គ្លីនិកកែសម្ផស្សនៅប៉េកាំងកន្លែងដែលកំពុងរងការចោទប្រកាន់ថាបោកប្រាស់មនុស្សចំណាស់ ៧៨ឆ្នាំ ។
រឿងរ៉ាវកើតឡើងកាលពីខែឧសភាឆ្នាំ ២០១៧ ខណៈពេលស្ត្រីចំណាយរូបនេះ បានត្រូវបុរសម្នាក់ក្នុងផ្សារទំនើបស្ទាក់ផ្លូវ រួចឃោសនាអំពីគ្លីនិកកែសម្ផស្សថាកំពុងមានកម្មវិធី Free ព្រមទាំងប័ណ្ណម៉ាស្សាជើង ។ ពួកគេបានអូសទាញគាត់ឲ្យម៉ាស្សាជើងពុំយកកម្រៃ ៤០នាទី ហើយអ្នកទាំងនោះ១ក្រុម បានប្តូរវេនគ្នាប្រើពាក្យផ្អែមល្ហែមទាក់ទាញឲ្យគាត់ទិញប័ណ្ណសមាជិកមានតម្លៃដល់ទៅ ២.៣០០ដុល្លារ ។
២ខែក្រោយស្ត្រីរូបនេះ បានត្រូវនារីម្នាក់ស្លៀកពាក់ឯកសណ្ឋានជាវេជ្ជបណ្ឌិតធ្វើការនៅគ្លីនិកកែសម្ផស្សនោះ និយាយថា ថាមពលក្នុងរាងកាយរបស់គាត់ខ្សោយខ្លាំងណាស់ ហើយលំហូរឈាមពុំបានល្អឡើយ ។ បន្ទាប់មកក៏បញ្ចុះបញ្ចូលឲ្យគាត់ទទួលការព្យាបាលដើម្បីបញ្ចៀស “ផលវិបាកធ្ងន់ធ្ងរ” ដោយត្រូវចំណាយជាង ១១.០០០ដុល្លារ ដោយបញ្ជាក់ប្រាប់ថា តម្លៃនេះថ្លៃព្រោះត្រូវប្រើប្រាស់បរិក្ខាររបស់ជប៉ុន។ ទន្ទឹមនោះស្ត្រីវ័យចំណាស់រូបនេះនៅត្រូវទូទាត់ដល់សេវាផ្សេងទៀតក្នុងការកែសម្រួលស្នាមជ្រីវជ្រួញនៅភ្នែក ផស្បែក និង detox ។
ក្រោយមកកូនប្រុសរបស់គាត់បានដឹងរឿងរ៉ាវនេះ ហើយក៏ទៅទាមទារយកលុយបានមកវិញចំនួនពាក់កណ្តាលពីគ្លីនិកនោះ ។ បន្ទាប់មកទើបគាត់ដាក់ពាក្យបណ្តឹងទៅកាន់នាយកដ្ឋានគ្រប់គ្រងពាណិជ្ជកម្ម និងឧស្សាហកម្មទីក្រុងប៉េកាំង។
ស្ថាប័ននេះ បានសន្យានឹងសហការណ៍ជាមួយអាជ្ញាធរផ្សេងទៀតធ្វើការស៊ើបអង្កេតចំពោះគ្លីនិកកែសម្ផស្សមួយនេះ ៕ លីសា
