ខេត្តព្រះសីហនុ៖ ប្រជាពលរដ្ឋមួយចំនួនរស់នៅភូមិសុខសាន្ដ សង្កាត់កោះរ៉ុង ក្រុងខេត្តព្រះសីហនុ បានត្រៀមប្រមូលផ្តុំគ្នាស្នើជួប សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា ដើម្បីស្នើឲ្យសម្តេច ជួយអន្តរាគមន៍ទៅរដ្ឋ បាលខេត្តព្រះសីហនុ និងក្រសួងរៀបចំដែន ដីនគររូបនីយកម្ម និងសំណង់ ឲ្យចេញប្លង់កម្មសិទ្ធិដីធ្លីជូនពួកគាត់ប្រើប្រាស់ឲ្យបានស្របច្បាប់។
គម្រោងស្នើជួបសម្តេច ហ៊ុន សែន របស់ប្រជាពលរដ្ឋភូមិសុខសាន្តនៅពេលនេះ គឺបានកើតមានក្រោយពេលប្រជាពលរដ្ឋមួយចំនួន មិនមានឈ្មោះឬមិនត្រូវបានអាជ្ញាធរពាក់ព័ន្ធ មិនព្រមចេញប្លង់កម្មសិទ្ធិដីធ្លីជូនពួកគាត់ទេ។ ជាពិសេសនៅគ្រាពួកគាត់បានទទួលព័ត៌មានមកថា សម្តេច ហ៊ុន សែន មានគម្រោងអញ្ចើញមកបើកសម្ភោធសណ្ឋាគារផ្កាយប្រាំ ឬបឹងហ្គាឡូ ក្រុមហ៊ុនរ៉ូយ៉ាល់សេន របស់លោកឧញ៉ា គិត ម៉េង នៅថ្ងៃទី២៣-២៤ ខែមេសា ឆ្នាំ២០១៨ខាងមុខនេះ។
បញ្ហាដីធ្លីនេះដែរ កាលពីថ្ងៃទី១៣ ខែមេសា ឆ្នាំ២០១៨ ប្រជាពលរដ្ឋមួយចំនួនរស់នៅភូមិសុខសាន្ត សង្កាត់កោះរ៉ុង បាននាំយកបញ្ហារបស់ពួកគាត់ ជម្រាបជូន លោកបណ្ឌិត សុខ ទូច ប្រធានរាជ្យបណ្ឌិតសភាកម្ពុជា ម្តងរួចហើយ ដើម្បីស្នើឲ្យ លោក សុខ ទូច ជួយនាំយកកង្វល់ ដែលត្រូវអាជ្ញាធរស្ថាប័នពាក់ព័ន្ធមិនព្រមចេញប្លង់កម្មសិទ្ធិជូនពួកគាត់ នៅលើដីធ្លាប់អាស្រ័យផល ឬរស់នៅរាប់សិបឆ្នាំនោះ ឲ្យជួយនាំយកកង្វល់នេះដាក់ជូន សម្ដេចតេជោ ហ៊ុន សែន នាយករដ្ឋមន្ដ្រី ឲ្យជួយអន្តរាគមន៍ដល់ពួកគាត់។
កាលណោះ ពលរដ្ឋភូមិសុខសាន្ត បានជួប លោក សុខ ទូច ដោយចៃដន្យ នៅគ្រា លោក សុខ ទូច បាននាំក្រុមគ្រួសារធ្វើដំណើរកម្សាន្តនៅតាមឆ្នេរសុខសាន្តនៃ សង្កាត់កោះរ៉ុង ក្រុងព្រះសីហនុ កាលពីថ្ងៃទី១៣ ខែមេសា ឆ្នាំ២០១៨។ ដំណើរកម្សាន្តនោះ របស់ លោក សុខ ទូច ក៏ត្រូវពលរដ្ឋភូមិសុខសាន្តស្គាល់មុខ ហើយក៏ត្រូវប្រជាពលរដ្ឋសំណូមពរឲ្យជួយនាំយកឯកសារទាក់ទងសុវត្ថិភាពដីធ្លី ជម្រាបជូនសម្តេច ហ៊ុន សែន ឲ្យជួយអន្តរាគមន៍ចេញប្លង់កម្មសិទ្ធិជូនពួកគាត់បានប្រើប្រាស់ស្របច្បាប់ឲ្យបានឆាប់។
ភ្លាមៗនោះ ប្រជាពលរដ្ឋភូមិសុខសាន្តមួយចំនួន បានផ្តល់ឯកសារ នៃការកាន់កាប់ដី របស់ខ្លួន ដែលទទួលស្គាល់ពីអាជ្ញាធរភូមិសង្កាត់ យកទៅប្រគល់ជូន លោកបណ្ឌិត សុខ ទូច ដោយនៅគ្រានោះ គេសង្កេតឃើញ លោក សុខ ទូច ហាក់មិនចង់ទទួលឯកសារ របស់ប្រជាពលរដ្ឋទេ ប៉ុន្តែបន្តិចក្រោយមក ដោយមានប្រជាពលរដ្ឋទាំងក្មេងចាស់បានលើកដៃសំពះសុំអង្វរមិនដាច់ពីមាត់ និងបានចោមរោមរូបលោក និងក្រុមគ្រួសារ មិនអាចបន្តដំណើរទៅមុខទៀតបាន លោកបណ្ឌិត សុខ ទូច ក៏ព្រមទទួលយកឯកសារ របស់ប្រជាពលរដ្ឋភូមិសុខសាន្ត ហើយសន្យាថា នឹងរាយការណ៍ជូនសម្តេចប្រមុខដឹកនាំរាជរដ្ឋាភិបាលពិនិត្យសម្រេចនៅពេលក្រោយ។
សំណើរជាថ្មីទៀត របស់ពលរដ្ឋភូមិសុខសាន្តខាងលើនេះ បានកើតឡើងបន្ទាប់ពី ប្រជាពលរដ្ឋក្មេងចាស់ជាច្រើនគ្រួសារ បានអស់សង្ឃឹម ចំពោះអាជ្ញាធររដ្ឋបាលខេត្តព្រះសីហនុ ជាពិសេសមន្ត្រីជំនាញសុរិយោដី ដែលមិនព្រមចេញប្លង់កម្មសិទ្ធិជូនពួកគាត់ ឬមិនបានបំរើប្រជាពលរដ្ឋឲ្យបានល្អ ឲ្យស្របតាមអនុសាសន៍ របស់សម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិត ដែលជាថ្នាក់ដឹកនាំស្ថិតក្នុងបេះដូងគោរពស្រាញ់ របស់ពួកគាត់ ជារហូតមកនោះទេ។
ករណីនេះ ប្រជាពលរដ្ឋមួយចំនួនរស់នៅភូមិសុខសាន្ត នៃសង្កាត់កោះរ៉ុង ក៏បានចោទអាជ្ញាធរ និងមន្ត្រីជំនាញពាក់ព័ន្ធមួយចំនួនថា បានឃុបឃិតគ្នាភូតកុហក សម្តេចតេជោ ហ៊ុន សែន ដោយចេញប្លង់កម្មសិទ្ធិដីធ្លី ជូនតែបក្ខពួក របស់ខ្លួនតែប៉ុណ្ណោះ។
ផ្តើមពីបញ្ហានេះ ក្រុមប្រជាពលរដ្ឋភូមិសុខសាន្ត ដែលមិនទាន់មានឈ្មោះ ទទួលបានប្លង់កម្មសិទ្ធិស្របច្បាប់ពីអាជ្ញាធរ ជាថ្មីម្តងទៀត បានសំណូមពរជាមួយកាយវិកាលុតជង្គង់ និងលើកដៃសំពះ ទទូចស្នើសុំ សម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិត ប៊ុន រ៉ានី លាយឡំជាមួយដំណត់ទឹកភ្នែករលីងរលោង ផងនោះ បានស្នើឲ្យសម្តេចទាំងពីរ មេត្តាជួយអន្តរាគមន៍ទៅ រដ្ឋបាលខេត្តព្រះសីហនុ និងមន្ត្រីជំនាញសុរិយោដី ពាក់ព័ន្ធ ឲ្យចេញប្លង់កម្មសិទ្ធិដីជូនពួកគាត់ឲ្យបានឆាប់ដោយអនុគ្រោះ។ ត្បិតអីពេលនេះ ពួកគាត់ត្រូវការប្លង់ដីកម្មសិទ្ធិដីធ្លីចាំបាច់ ដើម្បីយកទៅសុំច្បាប់ពីអាជ្ញាធរមានសមត្ថកិច្ចពាក់ព័ន្ធ សម្រាប់បង្កើតមុខរបរផ្សេងៗ ចិញ្ចឹមជីវិតឲ្យបានស្របច្បាប់ ប៉ុន្តែបើពួកគាត់មិនមានប្លង់កម្មសិទ្ធិដីធ្លីស្របច្បាប់ទេ គឺអាជ្ញាធរមិនអនុញ្ញាតឲ្យធ្វើការសាងសង់សំណង់ផ្សេងៗ ដើម្បីប្រកបរបរចិញ្ចឹមជីវិតបានទេ។
ចំពោះការសេសេរលិខិតសុំអន្តរាគមន៍គោរពជូន សម្តេចតេជោ ហ៊ុន សែន របស់ប្រជាពលរដ្ឋមួយចំនួន រស់នៅភូមិសុខសាន្ត សង្កាត់កោះរ៉ុង ក្រុង-ខេត្តព្រះសីហនុខាងលើនេះ គឺកើតមានបន្ទាប់ពី កាលពីថ្ងៃទី៤ ខែមេសា ឆ្នាំ២០១៨ សម្តេច ហ៊ុន សែន បានចេញអនុក្រឹត្យកាត់ដីទំហំ ៥២៨,៣៧ហិកតា នៅសង្កាត់កោះរ៉ុង និងសង្កាត់កោះរ៉ុងសន្លឹម ចេញពីដីឯកជន របស់រដ្ឋ ប្រគល់ជូនពលរដ្ឋកាន់កាប់ស្របច្បាប់ ប៉ុន្តែទន្ទឹមគ្នានេះ ក៏មានប្រជាពលរដ្ឋមួយចំនួននៅភូមិសុខសាន្ត មិនមានឈ្មោះ ឬត្រូវអាជ្ញាធរក្រសួងស្ថាប័នពាក់ព័ន្ធ បង្កកមិនឲ្យចេញប័ណ្ណកម្មសិទ្ធិដីធ្លីជូនពួកគាត់ទេ។
អនុក្រឹត្យចុះថ្ងៃពុធ រោច ខែចែត្រ ឆ្នាំរកា នព្វស័ក ព.ស២៥៦១ ធ្វើនៅរាជធានីភ្នំពេញ ថ្ងៃទី៤ ខែមេសា ឆ្នាំ២០១៨ មានចុះហត្ថលេខា និងបោះត្រា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ អនុក្រឹត្យនោះបានសម្រេច៖
មាត្រា១: កាត់ដីទំហំ ៥២៨៣៧ហិកតា នៅសង្កាត់កោះរ៉ុង និងសង្កាត់កោះរ៉ុងសន្លឹម ក្រុងព្រះសីហនុ ខេត្តព្រះសីហនុ ចេញពីដីឯកជន របស់រដ្ឋ កំណត់ដោយអនុក្រឹត្យលេខ ០៥ អនក្រ.បក ចុះថ្ងៃទី២១ ខែមករា ឆ្នាំ២០០៨ តាមប្រព័ន្ធកូអរដោណេ Project UTM Zone 48N Datum WGS 1984 និងមាននិយាមកាដូចកំណត់ក្នុងផែនទីឧបសម្ព័ន្ធ នៃអនុក្រឹត្យនេះ។
មាត្រា២: ប្រទានកម្មជាកម្មសិទ្ធិជូនប្រជាពលរដ្ឋចំនួន ២៩៨គ្រួសារ ដែលរស់នៅអចិន្ត្រៃយ៍ លើកោះរ៉ុង និងទំហំ ១២,១៣ហិកតា ស្មើនឹង ១២ក្បាលដី សម្រាប់សាលារៀន ៦ក្បាលដី, ប៉ុស្តិ៍រដ្ឋបាល ២ក្បាលដី, សាលាឃុំ ១ក្បាលដី, ទីស្នាក់ការភូមិ ១ក្បាលដី, អង្គភាពកងរាជអាវុធហត្ថ ១ក្បាលដី, និងវត្ត ១ក្បាលដី ស្ថិតនៅសង្កាត់កោះរ៉ុង និងសង្កាត់កោះរ៉ុងសន្លឹម ក្រុងខេត្តព្រះសីហនុ ដែលមានទីតាំងស្ថិតនៅភូមិដូចខាងក្រោម៖
ភូមិដើមថ្កូវ សរុបទំហំ ១២៥,៣១ហិកតា ស្មើ ១៧០ក្បាលដី ក្នុងនោះ ១៦៩ក្បាលដី ជូនប្រជាពលរដ្ឋ ៦៣គ្រួសារ និងសាលាឃុំ ១ក្បាលដី
ភូមិព្រែកស្វាយ សរុបទំហ ១៦៧,៤៥ហិកតា ស្មើ២០០ក្បាលដី ក្នុងនោះចំនួន ១៩៨ក្បាលដី ជូនប្រជាពលរដ្ឋ ៩៦គ្រួសារ វត្ត ១ក្បាលដី និងសាលារៀន ១ក្បាលដី
ភូមិសុខសាន្ត សរុបទំហំ ២០០,៤១ហិកតា ស្មើ ១២៨ក្បាលដី ក្នុងនោះ ១២៤ក្បាលដី ជូនប្រជាពលរដ្ឋ ៦៤គ្រួសារ និងសាលារៀន ៤ក្បាលដី
ភូមិកោះតូច សរុបទំហំ ៣៥២០ហិកតា ស្មើ ១៣៩ក្បាលដី ក្នុងនោះ ១៣៤ក្បាលដី ជូនប្រជាពលរដ្ឋ ៧៥គ្រួសារ និង ៥ក្បាលដី សម្រាប់ សាលារៀន ១ក្បាលដី ប៉ុន្តិ៍រដ្ឋបាល ២ក្បាលដី ទីស្នាក់ការភូមិ ១ក្បាលដី និងអង្គភាពកងរាជអាវុធហត្ថ ១ក្បាលដី។
មាត្រា ៣ : បទបញ្ញត្តិទាំងឡាយណា ដែលផ្ទុយនឹងអនុក្រឹត្យនេះ ត្រូវទុកជានិរាករណ៍។
មាត្រា ៤ : រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រដ្ឋមន្ត្រីក្រសួងបរិស្ថាន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ រដ្ឋមន្ត្រី រដ្ឋលេខាធិការគ្រប់ក្រសួងស្ថាប័នពាក់ព័ន្ធ និងអភិបាល នៃគណៈអភិបាលខេត្តព្រះសីហនុ ត្រូវអនុវត្តអនុក្រឹត្យនេះ ចាប់ពីថ្ងៃចុះហត្ថលេខាតទៅ៕ ដែន សីមា
class=”alignnone size-full wp-image-42303″ />
