តារាសម្តែងកូរ៉េខាងត្បូង Choi Eun-hee ដែលជាតារា១ដួង ក្នុងចំណោមល្បីល្បាញបំផុតនៅក្នុងប្រទេសនេះ ក្នុងកំឡុងឆ្នាំ ១៩៦០ និង ១៩៧០ បានស្លាប់កាលពីថ្ងៃចន្ទ នៅអាយុ ៩២ ឆ្នាំ ។
លោក Shin Jeong-gyun ដែលជាកូនប្រុសច្បងរបស់លោកយាយ Choi បានបញ្ជាក់ពីព័ត៌មាននេះទៅកាន់ភ្នាក់ងារព័ត៌មាន Yonhap ថា៖ «ម្តាយរបស់ខ្ញុំបានស្លាប់នៅពេលគាត់ត្រូវបានបញ្ជូនទៅកាន់មន្ទីរពេទ្យ ដើម្បីព្យាបាលជំងឺតម្រងនោមនៅរសៀល» ។
Choi ដែលកើតនៅ Gwangju ខេត្ត Gyeonggi នៅថ្ងៃទី២០ ខែវិច្ឆិកា ឆ្នាំ១៩២៦ បានចាប់ផ្តើមអាជីពជាតារាសម្តែងនៅក្នុងខ្សែភាពយន្តឆ្នាំ ១៩៤៧ “A New Oath” ។ លោកយាយបានដើរតួក្នុងរឿង “The Sun Of Night” នៅឆ្នាំ 1948 ។ បន្ទាប់មកនៅឆ្នាំ ១៩៤៧ សម្តែងរឿង “A Hometown in Heart” ដែលជួយឱ្យគាត់ក្លាយជាតារាល្បីមួយរូប ។
បន្ទាប់មក លោកយាយបានក្លាយជាតារាសម្តែង១ដួង ក្នុងចំណោមតារាសម្តែងដែលមានប្រជាប្រិយភាពបំផុត៣ដួង ក្នុងជំនាន់របស់លោកយាយ ដែលរួមមាន Um Aing-ran និង Kim Ji-mi ។
លោកយាយ Choi បានទទួលការចាប់អារម្មណ៍ពីអន្តរជាតិ នៅពេលដែលព័ត៌មានត្រូវបានគេបញ្ចេញថា លោកយាយត្រូវបានចាប់ពង្រត់ដោយមេដឹកនាំកូរ៉េខាងជើង Kim Jong-il នៅឆ្នាំ ១៩៧៨ ។
អតីតប្តីរបស់លោកយាយដែលជាអ្នកដឹកនាំ និងជាអ្នកផលិតរឿង លោក Shin Sang-ok ត្រូវបានចាប់ពង្រត់ ៦ ខែក្រោយមក ។ ប្តីប្រពន្ធនេះត្រូវបានគេចាត់ទុកថាជា “Brangelina កូរ៉េខាងត្បូងក្នុងទសវត្សរ៍៧០” រហូតដល់ពួកគេលែងលះគ្នានៅក្នុងឆ្នាំ ១៩៧៦ ។
ពួកគេត្រូវបានគេបង្ខំឱ្យផលិតខ្សែភាពយន្តជាច្រើនរឿង នៅកូរ៉េខាងជើងអស់រយៈពេលជិតមួយទសវត្សរ៍ ។ ប៉ុន្តែលោកយាយ Choi និងស្វាមី Shin បានគេចផុតពីការចាប់ខ្លួនរបស់មេដឹកនាំកូរ៉េខាងជើងនេះ បន្ទាប់ពីស្វែងរកជំនួយពីស្ថានទូតសហរដ្ឋអាមេរិក ខណៈពេលស្ថិតនៅក្នុងទីក្រុង Vienna, ប្រទេសអូទ្រីស នៅឆ្នាំ១៩៨៦ និងបានស្នើសុំសិទ្ធិជ្រកកោននយោបាយ ។
បន្ទាប់ពីបានគេចចេញពីកូរ៉េខាងជើងដោយជោគជ័យ ប្តីប្រពន្ធនេះបានរស់នៅទីក្រុង Reston រដ្ឋ Virginia មុនពេលផ្លាស់ទៅ Beverly Hills រដ្ឋកាលីហ្វ័រនីញ៉ា និងទីបំផុតត្រឡប់ទៅកូរ៉េខាងត្បូងវិញនៅឆ្នាំ ១៩៩៩ ។
លោក Shin បានស្លាប់ក្នុងឆ្នាំ ២០០៦ ហើយសុខភាពរបស់លោកយាយ Choi ត្រូវបានគេរាយការណ៍ថា បានចាប់ផ្តើមធ្លាក់ចុះយ៉ាងឆាប់រហ័សបន្ទាប់ពីពេលនោះមក ៕ ចន្ទី