ភ្នំពេញ ៖ មានការរិះគន់ជាច្រើនពីប្រជាពលរដ្ឋថា លោកឧកញ៉ា ហួរ ចំរើន ទើបតែត្រូវបានព្រះមហាក្សត្រចេញព្រះរាជក្រឹត្យត្រាស់បង្គាប់តែងតាំងមានងារជាឧកញ៉ាទាំងរូបលោក និងភរិយា ក៏បានទាញកាំភ្លើងបាញ់លេងនៅភូមិគ្រឹះរបស់លោកឧកញ៉ាយ៉ាងរំភើយ។
លោកឧញ៉ា ហួរ ចំរើន និងភរិយា
នៅរសៀលថ្ងៃទី២១ ខែមេសា ឆ្នាំ២០១៨នេះ មានករណីផ្ទុះអាវុធជាច្រើនគ្រាប់ ស្ថិតនៅបរិវេណផ្ទះឧកញ៉ា ហួរ ចំរើន ទីតាំងភូមិរកា សង្កាត់ព្រៃស ដែលករណីនេះសង្ស័យជម្លោះគ្រួសារឬអាចការបាញ់គំរាមប្រពន្ធ។
សមត្ថកិច្ចមូលដ្ឋាន បានឲ្យដឹងថា “មន្ត្រីយោធាជាន់ខ្ពស់មួយរូបគឺ លោកឧត្ដមសេនីយ៍ឯក ហូ ចំរើន ដែលព្រះមហាក្សត្រទើបនឹងតែងតាំងជាឧកញ៉ា មិនដល់ ១០ ថ្ងៃផង បានបាញ់បោះអាណាធិបតេយ្យ ៦-៧ គ្រាប់ នៅភូមិគ្រឹះរបស់ខ្លួនស្ថិតនៅក្នុងសង្កាត់ព្រៃស ខណ្ឌដង្កោ ។ ហេតុការណ៍បានកើតឡើងនៅថ្ងៃសៅរ៍ទី២១ ខែមេសា ឆ្នាំ២០១៨ វេលាម៉ោង១៥:៣៥នាទី នៅចំណុចផ្ទះវីឡាគ្មានលេខ ស្ថិតក្នុងភូមិព្រៃសកើត សង្កាត់ព្រៃស ខណ្ឌដង្កោ រាជធានីភ្នំពេញ ។ ជនបង្ករគឺលោកឧត្ដមសេនីយ៍ឯក ហូ ចំរើន ភេទប្រុស អាយុ៣៨ ស្នាក់នៅទីតាំងកើតហេតុខាងលើ មុខរបរ យោធា ។
ជនរងគ្រោះមានឈ្មោះ ១-យិន គារ ភេទប្រុស អាយុ៥៦ឆ្នាំ ស្នាក់នៅទីតាំកើតហេតុខាងលើ ២-ផន ទៀង ភេទស្រី អាយុ៥១ឆ្នាំ ស្នាក់នៅទីតាំងកើតហេតុខាងលើ ៣-គារ សុខគាង ភេទស្រី អាយុ១៩ឆ្នាំ ស្នាក់នៅទីតាំងកើតហេតុខាងលើ ។ មូលហេតុទំនាស់ក្នុងគ្រួសារ ហើយក្នុងករណីនេះមិនបណ្តាលឲ្យជនរងគ្រោះខាងលើរងបួសឬបាត់បងជីវិតឡើយ ក្រោយមកទៀតជនរងគ្រោះបានទៅដាក់ពាក្យបណ្តឹងនៅកងរាជអាវុធហត្ថរាជធានីភ្នំពេញ “។
ភាពភ្ញាក់ផ្អើលមួយ បានកើតមានឡើង ខណៈគេបានឮស្នូរកាំភ្លើង បានផ្ទុះចេញពីក្នុងផ្ទះរបស់លោកឧកញ៉ា ហួរ ចំរើន។ ក្រោយកើតហេតុ ត្រូវបានសមត្ថកិច្ចមូលដ្ឋានដោយមានការសហការគ្នារវាងមន្ត្រីប៉ូលិសនិងកងរាជអាវុធហត្ថក៏បានចុះទៅដល់កន្លែងកើតហេតុភ្លាមៗដើម្បីសួរនាំនិងធ្វើកំណត់ហេតុ។ គិតមកដល់ម៉ោង៩និង៣០នាទីយប់ថ្ងៃដដែលនេះ កម្លាំងកំពុងឡោមព័ទ្ធទីតាំងកើតហេតុនៅឡើយ ដើម្បីរង់ចាំបញ្ជាក់ពីថ្នាក់លើ។
បើយោងតាមប្រភពបានរាយការណ៍ថា ចំពោះករណីនៃការផ្ទុះអាវុធនេះគឺបង្កឡើងដោយលោកឧកញ៉ា ហួរ ចំរើន បំណងបានបាញ់គំរាមប្រពន្ធ និងម្តាយក្មេក។ ខណៈមានការលើកឡើងថាកើតចេញពីជម្លោះនៅក្នុងគ្រួសារទើបបានជាឧកញ៉ា ហួរ ចំរើន សម្រេចចិត្តបាញ់បោះជាការសប្បាយដើម្បីគំរាមប្រពន្ធ និងម្តាយក្មេក។ ពិសេសចង់អួតថាកាំភ្លើងរបស់ខ្លួនអាចមានប្រសិទ្ធភាពសម្លាប់មនុស្សបាន។
មានការរិះគន់ជាច្រើនពីប្រជាពលរដ្ឋថា លោកឧកញ៉ា ហួរ ចំរើន ទើបតែត្រូវបានព្រះមហាក្សត្រចេញព្រះរាជក្រឹត្យត្រាស់បង្គាប់តែងតាំងមានងារជាឧកញ៉ាទាំងរូបលោក និងភរិយា ឈ្មោះ គារ សុខគាង កាលពីថ្ងៃទី១២ខែមេសា ប៉ុន្តែបែរជាមកប្រព្រឹត្តទង្វើបំពុលសង្គមយ៉ាងដូច្នេះ៕ ដោយ៖បញ្ញាស័ក្តិ
ផ្ទះវីឡា និងឡានទំនើបៗរបស់ឧកញ៉ា ហួរ ចំរើន ទីតាំងភូមិរកា សង្កាត់ព្រៃស ។
