ខេត្តមណ្ឌលគិរី៖ សត្វដំរី ដែលចុះប្រេងជិត ១ខែកន្លងទៅនេះ បច្ចុប្បន្នកំពុងប្រឈមបាត់បង់ជីវិត ដោយសារតែម្ចាស់បង្អត់អាហារយូរថ្ងៃពេកពេលចុះប្រេង។
អ្នកជំនាញនិយាយថា បើសត្វដំរីមួយក្បាលនេះត្រូវស្លាប់ពិតមែន គឺនៅខេត្តមណ្ឌលគិរី ទំនងជាអាចមិនមានសត្វដំរីឈ្មោល សម្រាប់បន្តពូជជាបន្តទៀតទេ ព្រោះដំរីឈ្មោល ដែលនៅសេសសល់ចាស់ ឬមានអាយុច្រើនអស់ទៅហើយ។
នាយកអង្គការសត្វដំរីប្រចាំ ខេត្តមណ្ឌលគិរី លោក ឃុន ឌីយ៉ូន បានឲ្យដឹងថា សត្វដំរីឈ្មោលឈ្មោះ «បឹក គុក» (ភាសារព្នង) ត្រូវម្ចាស់ចាប់ចងកាលពីជាង ១ខែមុន ហើយពេលនេះបានដួលសន្លប់ក្នុងល្បាប់កាលពីព្រឹកថ្ងៃទី២១ ខែមេសាឆ្នាំ២០១៨។
សត្វដំរីឈ្មោលមួយក្បាលនោះ ត្រូវម្ចាស់ចងបង្អត់អាហារនៅចំណុចអូរតេ ភូមិពូតាំង ឃុំសង្កាត់រមនា ក្រុងសែនមនោរម្យខេត្តមណ្ឌលគិរី ដោយសារតែវាចុះប្រេង ហើយដើររាតត្បាតអុកឡុកអ្នកភូមិ។
លោក ឃុន ឌីយ៉ូន បានបន្តថា ពេលនេះ សត្វដំរីឈ្មោល ១ក្បាលឈ្មោះ «បឹក គុក» បានដេកដួលក្រោកមិនរួចពីដីទេ ព្រោះតែកង្វះចំណីអាហារ។ លោកថា ដំរី១ក្បាលនេះ មានអាយុ ៣៥ឆ្នាំនេះ គឺជាដំរីក្មេងជាងគេ និងជាក្តីសង្ឃឹម ឬអាចមានលទ្ធភាពបន្តពូជ ក្នុងចំណោមដំរីសរុបទូទាំងខេត្តមណ្ឌលគិរី មានចំនួន ៤១ក្បាល។
ប្រធានអង្គការការពារសត្វដំរីលោក ឃុន ឌីយ៉ូន បានឲ្យដឹងទៀតថា បច្ចុប្បន្ននេះ សភាពជំងឺ របស់សត្វដំរីឈ្មោលមួយក្បាលនោះ មានភាពធ្ងន់ធ្ងរ ហើយទំនងជាគ្មានសង្ឃឹមរស់នោះទេ។
ទោះជាយ៉ាងណាម្ចាស់ឈ្មោះ «ចុច ចេល» ជាជនជាតិដើមភាគតិចព្នង ក្រោយពីដំរីមានសភាពបែបនេះ បានរាយការណ៍ទៅសមត្ថកិច្ចចុះពិនិត្យ និងស្នើឲ្យជួយក្នុងការព្យាបាលជាបន្ទាន់ដែរ។
គួររំលឹកថា ដំរីឈ្មោលឈ្មោះ «បឹកគុក» ត្រូវបានមន្ត្រីអង្គការវាយអេត បាញ់ថ្នាំឲ្យសន្លប់ ដើម្បីបន្សាបការចុះប្រេង របស់សត្វដំរី ១ក្បាលនេះ កាលពីថ្ងៃទី២៨ ខែមីនា២០១៨ បន្ទាប់ពីសត្វដំរីឈ្មោះ ១ក្បាលនេះ បានរើដាច់ចំណង និងបានចូលទៅសំងំនៅក្នុងព្រៃ ត្រង់ចំណុចអូរតេ រយៈពេល២ថ្ងៃ។ ប៉ុន្តែក្រោយមកក៏ត្រូវចាប់បានវិញ ហើយត្រូវម្ចាស់ចងបង្អត់អាហារ ដើម្បីបន្សាបភាពកាចសាហាវពេលសត្វដំរីឈ្មោល ១ក្បាលនេះចុះប្រេង៕ ដោយ៖ សមុទ្រឈើ