ភ្នំពេញ៖ ជម្លោះស្នេហាត្រីកោណ រវាងនារីរងគ្រោះ បានឈ្លោះពាក្យសម្តីគ្នាជាមួយបុរសម្នាក់ ជាជនបង្ក ចោទប្រកាន់ថានារីរងគ្រោះបែកចិត្ត មានប្រុសថ្មី នាំគ្នាមកអង្គុយ លេងនៅមុខកាស៊ីណូណាហ្គាវើល ក៏បានទាញកាំភ្លើងខ្លី បាញ់នារីរងគ្រោះ ហើយជនដៃដល់ត្រូវបាន ភាគីខាងតស្រី ចាប់បានវាយបែកមុខហូរឈាមជោកខ្លួន។
ហេតុការណ៍នេះបានកើតឡើង កាលពីម៉ោង៣យប់ ថ្ងៃទី២២ ខែមេសា ឆ្នាំ២០១៨ នៅចំណុចមុខសួន កាស៊ីណូណាហ្គាវើល ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
សមត្ថកិច្ចបានឲ្យដឹងថា នារីរងគ្រោះ ដែលត្រូវគេបាញ់ឲ្យរងរបួស មានឈ្មោះ គីម សុជាតា អាយុ២៣ឆ្នាំ ស្នាក់នៅផ្ទះជួល ក្រោយវត្តស្ទឹងមានជ័យ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ចំណែកជនដៃដល់មានឈ្មោះ ឡុង សម្បត្តិ អាយុ៣០ឆ្នាំ មុខរបរលក់ដូរតាមអនឡាញ មានស្រុកកំណើតនៅស្រុកគងពិសី ខេត្តកំពង់ស្ពឺ បច្ចុប្បន្នស្នាក់នៅជាមួយបងប្រុស ផ្ទះលេខ២៨ ផ្លូវ២២៩ សង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ។
នារីរងគ្រោះ ប្រាប់ឲ្យដឹងថា នៅមុនពេលកើតហេតុ រូបនាងមានទំនាស់ជាមួយជនដែលបាញ់នោះតាំងពីល្ងាច ស្រាប់តែយប់ជ្រៅនាងកំពុងតែផឹកស៊ីជុំគ្នានៅលើសួនមុខកាស៊ីណូ ណាហ្គា វើល ហើយឃើញបុរសខាងលើ ជិះម៉ូតូពីរបីជុំសួន។ ឃើញដូច្នេះ នាងក៏ប្រាប់បងៗធម៌ថា “បុរសនឹងហើយ ដែលរករឿងខ្ញុំពីល្ងាចមិញហ្នឹង”។
បន្ទាប់ពីបានឮប្អូននិយាយប្រាប់បែបនេះ បងៗធម៌របស់នារីរងគ្រោះ ក៏បានទៅកាក់ម៉ូតូរបស់បុរសខាងលើ ដើម្បីសួរនាំរហូតឈ្លោះគ្នា និងវាយទៅលើបុរសនោះជាច្រើនដៃ ទើបធ្វើឲ្យបុរសនោះខឹង ក៏ដកកាំភ្លើងខ្លីបាញ់ត្រូវនារីរងគ្រោះចំកំភួនជើងមួយគ្រាប់។ក្រោយពីបាញ់នារីរងត្រូវហើយ ជនបង្កក៏ប្រុងគេចខ្លួនតែត្រូវក្រុមស្ទាវៗដែលនៅជិតនោះ នាំគ្នាដេញចាប់ និងវាយស្ទើរស្លាប់ ទើបប្រគល់ឲ្យសមត្ថកិច្ច និងដកហូតបានកាំភ្លើងខ្លីម៉ាក K59 មួយដើម នៅសល់គ្រាប់ ចំនួនប្រាំគ្រាប់ទៀត។
សមត្ថកិច្ចកំពុងធ្វើការស្រាវជ្រាវ ដើម្បីរកមូលនៃរឿងទំនាស់បាញ់បោះសេរីបណ្តាលឲ្យមានមនុស្សរងរបួសនេះ៕ ដោយ ៖ បញ្ញាស័ក្តិ