ភ្នំពេញ៖ ប្រជាពលរដ្ឋ និងមន្ត្រីរាជការថ្នាក់ទាប រស់នៅមូលដ្ឋានខណ្ឌទួលគោក រាជធានីភ្នំពេញ បានអះអាងថា មូលដ្ឋាននេះមានទីតាំងបទល្មើសល្បែងស៊ីសងជាច្រើន និងចាក់ភ្នាល់យកឈ្នះចាញ់មានចំនួនរាប់ម៉ឺនដុល្លារសហរដ្ឋអាមេរិក ក្នុងមួយដៃ ឬមួយទូរៗ។
ផ្តល់សម្ភាសដល់អ្នកយកព័ត៌មានគេហទំព័រ CEN.COM.KH នៅថ្ងៃអាទិត្យ ទី២២ ខែមេសា ឆ្នាំ២០១៨នវ ប្រជាពលរដ្ឋមួយចំនួនរស់នៅខណ្ឌទួលគោគ បានចោទថា បទល្មើសល្បែងស៊ីសងទាំងនោះ គឺមិនឃើញមានសមត្ថកិច្ចពីស្ថាប័នពាក់ព័ន្ធណាមួយ ចុះបង្ក្រាប ឬទប់ស្កាត់ ឲ្យស្របតាមគោលនយោបាយភូមិឃុំ មានសុវត្ថិភាពទាំង ៩ចំណុច ដែល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ឲ្យអនុវត្តឲ្យមានប្រសិទ្ធភាពនោះទេ។
ត្រង់ចំណុចនេះ ប្រជាពលរដ្ឋ និងមន្ត្រីរាជការថ្នាក់ទាប បានរិះគន់ លោក ឯក ឃុនឌឿន អភិបាលខណ្ឌទួលគោក ថាកំពុងផ្គើនបទបញ្ជា របស់ សម្តេចតេជោ ហ៊ុន សែន ដោយសារតែបានបណ្តោយឲ្យមូលដ្ឋានខ្លួន កើតមានទីតាំងល្បែងស៊ីសង ឬល្បែងភ្នាល់គ្រប់ប្រភេទមានដូចជា៖ បៀ អាប៉ោង និងភ្នាល់បាល់ជាដើម ហើយការចាក់ភ្នាល់ឈ្នះចាញ់មានចំនួនរាប់ម៉ឺនដុល្លារ។
ប្រជាពលរដ្ឋ អះអាងថា រាល់ថ្ងៃនេះ មានទីតាំងល្បែង បៀ អាប៉ោង និងភ្នាល់បាល់ ចាក់ភ្នាល់ស៊ីសងចាញ់ឈ្នះរាប់ម៉ឺនដុល្លារ ដោយជ្រកក្រោម «តារាងបាល់ ឬកន្លែងហាត់កីឡា» មានទីតាំងនៅទល់មុខអតីតភោជនីដ្ឋាន ស៊ីធីខេត នៅតាមបណ្តោយផ្លូវចូលវត្តនាគវ័ន្ត ស្ថិតនៅក្នុងសង្កាត់ផ្សារដេប៉ូ៣ ខណ្ឌទួលគោក គឺនៅជាប់ព្រំប្រទល់ សង្កាត់ស្រះចក ខណ្ឌដូនពេញ កំពុងបើកលេងល្បែងស៊ីសងខុសច្បាប់យ៉ាងគគ្រឹកគគ្រេង និងគ្មានសមត្ថកិច្ចចុះបង្ក្រាបទេ។ ហើយថា ទីតាំងល្បែងភ្នាល់ខាងលើនេះ គឺក្រុមអ្នកញៀនល្បែងស៊ីសងទាំងនោះ បានចាក់ភ្នាល់ស៊ីសងចាញ់ឈ្នះក្នុងមួយដៃ ឬមួយទូៗ រាប់ម៉ឺនដុល្លារ។
ផ្តើមពីបញ្ហានេះ មន្ត្រីរាជការ និងប្រជាពលរដ្ឋរស់នៅខណ្ឌទួលគោក បានសំណូមពរដល់ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ឲ្យជួយអន្តរាគមន៍ទៅ លោក ឯក ឃុនឌឿន អភិបាលខណ្ឌទួលគោក ត្រូវចុះបិទទីតាំងលេងល្បែងស៊ីសងជ្រកក្រោមស្លាក «តារាងបាល់ ឬកន្លែងហាត់កីឡា» មានទីតាំង ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក ឲ្យបានឆាប់ និងមានប្រសិទ្ធភាព។
ចំណុចនេះ ប្រជាពលរដ្ឋ បានរិះគន់ថា ថ្នាក់ដឹកនាំខណ្ឌទួលគោក នៅមិនទាន់ចូលរួមអនុវត្តគោលនយោបាយភូមិឃុំមានសុវត្ថិភាព ដែល សម្តេចតេជោ ហ៊ុន សែន នាយករដ្ឋមន្ត្រី បានដាក់ឲ្យអនុវត្ត គឺមិនទាន់មានប្រសិទ្ធភាពទេ ព្រោះរាល់ថ្ងៃនេះ មូលដ្ឋានខណ្ឌទួលគោក ឃើញមានទីតាំងល្បែងស៊ីសង និងល្បែងហ្គេមអនាធិបតេយ្យជាច្រើនកន្លែង ប៉ុន្តែសមត្ថកិច្ចគ្មានវិធានការចុះបង្ក្រាបនោះទេ។
ជាបន្តបន្ទាប់មកនេះ មូលដ្ឋានខណ្ឌទួលគោក រាជធានីភ្នំពេញ ត្រូវបានអាណាព្យាបាល ឬប្រជាពលរដ្ឋរស់នៅក្នុងមូលដ្ឋាននេះ បានរិះគន់ថ្នាក់ដឹកនាំរដ្ឋបាលខណ្ឌនេះជារឿយៗ ដោយចោទថា បានទុកបណ្តោយឲ្យមានទីតាំងលែងល្បែងស៊ីសងគ្រប់ប្រភេទ ជ្រកក្រោមស្លាកបើកបំរើ Internet ២៤ម៉ោង និងតារាងបាល់ ឬទីកន្លែងសម្រាប់ហាត់កីឡាជាដើម។
ចំណុចនេះ ប្រជាពលរដ្ឋ និងមន្ត្រីរាជការថ្នាក់ទាប បានបញ្ជាក់ថា ទីតាំងបើកបំរើ អ៊ីនធើណេត ២៤ម៉ោងភាគច្រើន គឺមានលួចបង្កប់ល្បែងស៊ីសងចាក់ភ្នាល់បាល់ Live បន្តផ្ទាល់ពីកាស៊ីណូ និងមានបង្កប់ល្បែងកន្ទុយលេខខុសច្បាប់ថែមទៀត ប៉ុន្តែមិនមានសមត្ថកិច្ចចុះបង្ក្រាបឲ្យមានប្រសិទ្ធភាពទេ។
ផ្តើមពីបញ្ហានេះ អាណាព្យាបាល និងមន្ត្រីរាជការមួយចំនួន បានរិះគន់អាជ្ញាធរខណ្ឌទួលគោកថា អសមត្ថភាព ក្នុងការទប់ស្កាត់បទល្មសល្បែងស៊ីសង ដែលជាដើមហេតុបង្កើតឲ្យមាន អំពើចោរកម្ម លួច ឆក់ ប្លន់ កើតឡើងជាបន្តបន្ទាប់ និងបង្កអសន្តិសុខ ដល់ប្រជាពលរដ្ឋ គួរឲ្យព្រួយបារម្ភបំផុត។
ប្រជាពលរដ្ឋចោទថា ចំពោះទីតាំងបើកលេងល្បែងភ្នាល់ខុសច្បាប់ ដែលអាចបើកធ្វើសកម្មភាពបានដោយរលូន នៅមូលដ្ឋានខណ្ឌទួលគោក ទំនងជាអាចមានជាប់ពាក់ព័ន្ធ បុគ្គលមានតួនាទីជាមន្ត្រីសមត្ថកិច្ច ក្នុងស្ថាប័នជំនាញខ្លះ នៃរដ្ឋបាលខណ្ឌទួលគោក ជាអ្នកកាងការពារ ឬនៅពីក្រោយខ្នងទីតាំងបើកលេងល្បែងភ្នាល់ទាំងនោះ ជាថ្នូរទទួលបានសំណូកពុករលួយជាលុយកាក់ប្រចាំថ្ងៃឬប្រចាំខែ ហើយមើលទៅ ទើបសមត្ថកិច្ចមិនចុះបង្ក្រាបបែបនេះ។
បញ្ហាល្បែងស៊ីសងនេះដែរ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ក៏បានចេញលិខិតណែនាំ និងបានព្រមានថា បើនៅតាមគោលដៅណាមួយ សមត្ថកិច្ចពាក់ព័ន្ធ ទុកឲ្យមានបទល្មើសគ្រឿងញៀន និងល្បែងស៊ីសងកើតឡើង ប៉ុន្តែមិនមានវិធានការចុះបង្ក្រាបទេ លោកនឹងចាត់ឲ្យកម្លាំងជំនាញរបស់ ក្រសួងមហាផ្ទៃចុះទៅបង្ក្រាបជំនួស។ ប៉ុន្តែសមត្ថកិច្ចជាអ្នកទទួលខុសត្រូវនៅតាមប៉ុស្តិ៍រដ្ឋបាលឃុំសង្កាត់ និងស្រុកខណ្ឌទាំងនោះ ជាអ្នកទទួលខុសត្រូវចំពោះមុខច្បាប់ ឬវិន័យរដ្ឋបាល របស់កងកម្លាំងមានសមត្ថកិច្ច។
យ៉ាងនេះក្តី គេហទំព័រ CEN.COM.KH មិនទាន់អាចទាក់ទង លោក ឯក ឃុនឌឿន អភិបាលខណ្ឌទួកគោក និង លោក ប៉ាង លីដា អភិបាលរងខណ្ឌទួលគោក ទទួលបន្ទុករៀបចំសន្តិសុខសណ្តាប់ធ្នាប់ ដើម្បីបំភ្លឺជុំវិញការចោទប្រកាន់ របស់ប្រជាពលរដ្ឋ ដែលចោទថា ក្នុងមូលដ្ឋាននេះ មានទីតាំងល្បែងស៊ីសងអនាធិបតេយ្យ រីកដូចផ្សិត ប៉ុន្តែមិនមានសមត្ថកិច្ចពាក់ព័ន្ធផ្នែកណាមួយ ចុះបង្ក្រាប ឬទប់ស្កាត់ឲ្យមានប្រសិទ្ធភាពនោះទេ។
ប្រការនេះ ទាំងមន្ត្រីរាជការ និងប្រជាពលរដ្ឋរស់នៅមូលដ្ឋានខណ្ឌទួលគោក បានរិះគន់ថា បទបញ្ជា ឬការណែនាំ របស់ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ ពិសេសបទបញ្ជា របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់ឲ្យមន្ត្រីក្រោមឱវាទចូលរួមអនុវត្តវិធានការបង្ក្រាបល្បែងស៊ីសងខុសច្បាប់ គឺអនុវត្តមិនទាន់មានប្រសិទ្ធភាពទេ។
ជាបន្តបន្ទាប់មកនេះ សម្តេចក្រឡាហោម ស ខេង តែងបានរំលឹកដល់មន្ត្រីក្រោមឱ្យវាទ ឬកងកម្លាំងមាន សមត្ថកិច្ចពាក់ព័ន្ធទាំងអស់ នៅទូទាំងប្រទេសកម្ពុជា ត្រូវរួមសហការគ្នាអនុវត្តសេចក្តីណែនាំស្តីពីការអនុវត្ត វិធានការបង្រ្កាបល្បែងស៊ីសងខុសច្បាប់ និងតាមឃាត់ខ្លួន គ្រប់ម្ចាស់បើកល្បែងខុសច្បាប់ ពិសេសអ្នកឈរកាងការពារឬអ្នកធ្វើជាខ្នងបង្អែក និងអ្នកឃុបឃិត ឬនៅពីក្រោយបទល្មើសល្បែងស៊ីសងគ្រប់ប្រភេទ ត្រូវកសាងសំណុំរឿងបញ្ជូនទៅតុលាការផ្តន្ទាទោសទៅតាមផ្លូវច្បាប់។
ព្រមជាមួយគ្នានេះ សម្តេចក្រឡាហោម បានបញ្ជាក់ថា ល្បែងស៊ីសងនៅក្នុងប្រទេសកម្ពុជាសព្វថ្ងៃនេះ គឺត្រូវបានគេបែងចែកជា ២សណ្ឋាន គឺល្បែងស៊ីសងស្របច្បាប់ និង ល្បែងស៊ីសងមិនស្របច្បាប់។
ត្រង់ចំណុចនេះ សម្តេចក្រឡាហោម បានពន្យល់ថា នៅក្នុងសេចក្តីណែនាំ របស់ក្រសួងមហាផ្ទៃ គឺតម្រូវឲ្យមន្ត្រីមានសមត្ថកិច្ច ឬកងកម្លាំងនគរបាលទាំងអស់ ចុះបង្រ្កាបល្បែងស៊ីសង ដែលខុសច្បាប់ ហើយបង្កផលប៉ះពាល់ ដល់សណ្តាប់ធ្នាប់សាធារណៈ ប៉ះពាល់ដល់សីលធម៌សង្គម និងជីវភាពរស់នៅ របស់ ប្រជាពលរដ្ឋ ជាពិសេស ជម្រុញការអនុវត្តគោលនយោបាយ ភូមិ ឃុំ មានសុវត្ថិភាព របស់រាជដ្ឋាភិបាលកម្ពុជា ឲ្យមានប្រសិទ្ធភាព។
បន្ថែមលើនេះ សម្តេចក្រឡាហោម ស ខេង បានព្រមានថា ចំពោះល្បែងស៊ីសងខុសច្បាប់ ដែលបានលបលួច បើក និងបានបើកជាចំហរ នៅតាមបណ្តាមូលដ្ឋានមួយចំនួនមានដូចជា៖ ល្បែងភ្នាល់ជ្រកក្រោម ស្លាកល្បែងស្របច្បាប់ ឆ្នោត ឡូតូ ភ្នាល់បាល់តាមអនឡាញ ល្បែងស៊ីសងលេងតាមអ៊ិនធឺណេត ២៤ម៉ោង ឆ្នោតកន្ទុយ លេខ ល្បែងជល់មាន់ ល្បែងភា្នល់ទឹកភ្លៀង ល្បែងបាញ់ត្រី និងល្បែងជាច្រើនប្រភេទទៀត ដែលជ្រក ក្រោមល្បែងក្មេងលេង ដែលបើកធ្វើអាជីវកម្មខុសច្បាប់ គឺត្រូវបិទទាំងស្រុង។
យ៉ាងណាក៏ដោយចុះ ចំពោះបទល្មើសល្បែងស៊ី ដែលកំពុងកើតមានអនាធិបតេយ្យ ក្នុងទឹកដីខណ្ឌទួលគោករាល់ថ្ងៃនេះ ប្រជាពលរដ្ឋ និងមន្ត្រីរាជការថ្នាក់ទាប នឹងរង់ចាំមើល លោក ឯក ឃុនឌឿន អភិបាលខណ្ឌទួលគោក និងជា ប្រធានគណៈបញ្ជាការឯកភាពខណ្ឌ នឹងមានវិធានការបែបណា?។ ជាពិសេស ចំពោះទីតាំងល្បែងស៊ីសង ជ្រកក្រោមស្លាក «តារាងបាល់ ឬកន្លែងហាត់កីឡា» មានទីតាំងនៅទល់មុខអតីតភោជនីដ្ឋាន ស៊ីធីខេត នៅតាមបណ្តោយផ្លូវចូលវត្តនាគវ័ន្ត ស្ថិតនៅក្នុងសង្កាត់ផ្សារដេប៉ូ៣ ខណ្ឌទួលគោក ដែលកំពុងបើកលេងជារៀងរាល់ថ្ងៃមកនេះ។
ជាងនេះទៀត ទាំងមន្ត្រីរាជការ និងប្រជាពលរដ្ឋរស់នៅខណ្ឌទួលគោក ក៏នឹងចាំមើលថា តើអភិបាលរាជធានីភ្នំពេញ លោក ឃួង ស្រេង នឹងមាន ចំណាត់ការបែបណា ចំពោះទីតាំងល្បែងស៊ីសងខុសច្បាប់ ដែលពលរដ្ឋចោទថា កំពុងកើតមានអនាធិបតេយ្យនៅក្នុងមូលដ្ឋានខណ្ឌទួលគោក ដែលមាន លោក ឯក ឃុនឌឿន ដឹកនាំជាអភិបាលខណ្ឌនោះ៕ ដែន សីមា