ខេត្តព្រះសីហនុ៖ មន្ត្រីនគរបាលចរាចរណ៍ នៃស្នងការដ្ឋាននគរបាលខេត្តព្រះសីហនុ បានឲ្យដឹងថា គ្រោះថ្នាក់ចរាចរណ៍បានបន្តកើតមានស្ទើរជារៀងរាល់ថ្ងៃ នាមូលដ្ឋានខេត្តនេះ ពិសេសនៅតាមបណ្តោយផ្លូវជាតិលេខ៤ បណ្តាលឲ្យមានមនុស្សស្លាប់ និងរងរបួសធ្ងន់ស្រាលជាច្រើននាក់។
មន្ត្រីនគរបាលចរាចរណ៍ផ្លូវគោក ខេត្តព្រះសីហនុអំពាវនាវដល់អ្នកប្រើប្រាស់ផ្លូវ ឬអ្នកបើកបរគ្រប់ៗរូបទាំងរថយន្ត និងម៉ូត ព្រមទាំងមធ្យោបាយធ្វើដំណើរផ្សេងៗទៀត ត្រូវប្រុងប្រយ័ត្នពីគ្រោះថ្នាក់ចរាចរណ៍ ដែលអាចកើតមានឡើងគ្រប់ពេល និងស្នើឲ្យចូលរួមគោរពច្បាប់ចរាចរណ៍ផ្លូវគោកឲ្យបានទាំងអស់គ្នា ដើម្បីជៀសឲ្យផុតពីគ្រោះថ្នាក់ចរាចរណ៍ដែលអាចនឹងកើតមានឡើង។
មន្ត្រីនគរបាលចរាចរណ៍ បានឲ្យដឹងថា ក្នុង១ថ្ងៃ យ៉ាងហោចមានគ្រោះថ្នាក់ចរាចរណ៍ ១ករណីដែរ នៅតាមបណ្តោយផ្លូវជាតិលេខ៤ និងទីប្រជុំជន ក្នុងក្រុងព្រះសីហនុ។ ជាក់ស្តែង កាលពីម៉ោងជាង ១២ រសៀលថ្ងៃអាទិត្យ ទី២២ ខែមេសា ឆ្នាំ២០១៨ នៅលើផ្លូវជាតិលេខ៤ ត្រង់ចំណុចផ្លូវ ចូលរម្មនីយដ្ឋានក្បាលឆាយ ស្ថិតក្នុងភូមិ១ សង្កាត់១ ក្រុងព្រះសីហនុ មានគ្រោះថ្នាក់ចរាចរណ៍១ករណីកើតឡើង។
គ្រោះថ្នាក់នេះ បង្កដោយរថយន្តបែនដឹកដី ពាក់ស្លាកលេខ ភ្នំពេញ 3B-1406 បើកបរដោយឈ្មោះ ប៉ុក ភាក់ ភេទប្រុស អាយុ២៧ឆ្នាំ មុខរបរអ្នកបើកបររថយន្ត មានទីលំនៅភូមិអង្គសុភី ស្រុកកំពង់ត្រាច ខេត្តកំពត មានទិសដៅចេញពី ក្រុងព្រះសីហនុ។
នគរបាលឲ្យដឹងថា ពេលរថយន្តបើកមមកដល់ចំណុចកើត រថយន្តដឹកដីនោះ បានបត់ឆ្លងផ្លូវទៅឆ្វេងដៃ បម្រុងចូលទៅតាមផ្លូវក្បាលឆាយ ក៏បានបុកម៉ូតូ ១គ្រឿងម៉ាក HONDA ZOOMER ពាក់ស្លាកលេខព្រះសីហនុ1G-2753 បើកបរដោយឈ្មោះ សុខ ទៀង ភេទប្រុស អាយុ ២៨ឆ្នាំ មានទីលំនៅឃុំស្រែអំបិល ស្រុកស្រែអំបិល ខេត្តកោះកុង និងអ្នករួមដំណើរម្នាក់ទៀត ឈ្មោះ សុខ ហេង ភេទប្រុស អាយុ ២៦ឆ្នាំ មុខរបរ កម្មករ មានទីលំនៅក្នុងភូមិឃុំខាងលើដូចគ្នា។
ម៉ូតូជនរងគ្រោះ និងរថយន្តបង្កគ្រោះថ្នាក់ចរាចរណ៍ មានទិសដៅផ្ទុយគ្នា ហើយគ្រោះថ្នាក់នេះ បានបណ្តាលឲ្យបុរស ជាអ្នកបើកបរម៉ូតូស្លាប់ នៅកន្លែងកើតហេតុ រីឯបុរសអ្នករួមដំណើរជាមួយរងរបួសធ្ងន់។
នគរបាលចរាចរណ៍ខេត្តព្រះសីហនុ បានឲ្យដឹងថា ក្រោយកើតហេតុ អ្នករបួសត្រូវបានបញ្ជូនទៅសង្គ្រោះព្យាបាលនៅមន្ទីរពេទ្យ។ ក្នុងនោះកម្លាំងនគរបាលចរាចរណ៍ ក៏បានឃាត់ខ្លួនអ្នកបើកបររថយន្តព្រមទាំងនាំយកវត្ថុតាង រថយន្ត និងម៉ូតូ ទៅការិយាល័យ នគរបាលចរាចរណ៍ផ្លូវគោក ដើម្បីអនុវត្តនីតិវិធីតាមផ្លូវច្បាប់ជាបន្តទៀត៕ ដែន សីមា
