ភ្នំពេញ ៖ ឃ្លីបវីដេអូមួយមានរយៈពេលជិតមួយនាទី ដែលថតពីសកម្មភាពបុរសម្នាក់ប្រើហិង្សាវាយទាត់ធាក់តាមអំពើចិត្តទៅលើបុរសម្នាក់ ត្រូវបានគេបាញ់បង្ហោះតាមបណ្តាញសង្គមអនឡាញនានាធ្វើការរិះគន់នូវសកម្មភាពហិង្សានេះ ។
យោងតាមប្រភពព័ត៌មានដែលគេផ្សព្វផ្សាយបានអោយដឹងថាករណីហិង្សាខាងលើនេះ បានកើតឡើងកាលពីវេលាម៉ោង១១យប់ ថ្ងៃទី១៦ ខែមេសា ឆ្នាំ២០១៨ កន្លងទៅនេះ ដែលជាថ្ងៃចូលឆ្នាំបង្ហើយ ស្ថិតនៅចំណុចផ្សារកុងតឺន័រ តាមបណ្តោយផ្លូវហ្សាដឺហ្គូល ខាងកើតអតីតស្តាតចាស់ ជាប់សណ្ឋាគារសូហ្វីថែលអង្គរ ទល់មុខសណ្ឋាគារតារាអង្គរ ក្រុងសៀមរាប ខេត្តសៀមរាប។ ក្នុងនោះគេអះអាងថាជនបង្កហិង្សាខាងលើមានឈ្មោះភ័ណ្ឌ ហើយតាមការស្ដាប់សំលេងជនបង្កនៅក្នុងឃ្លីបវីដេអូ ជនបង្ក ទំនងជាម្ចាស់ឬអ្នកមើលការខុសត្រូវផ្សារកុងតឺន័រនេះទៀតផង។
យោងតាមការស្ដាប់សំឡេងនៅក្នុងឃ្លិបវីដេអូ ករណីហឹង្សានេះ ទំនងផ្ដើមចេញពីជនបង្កបានចោទថាជនរងគ្រោះដែលគេសង្ស័យថាជាជនវិកលចរិតនេះ ទៅបន្ទោបង់លាមកនៅក្បែររបងផ្សារ និងមុខបន្ទប់ដេករបស់ខ្លួន ពេលជនបង្កចេញមកឃើញក៏ធ្វើសកម្មភាពវាយតប់ទាត់ធាក់ទាំងកម្រោលតែម្ដងទៅ។
ជាមួយករណីនេះ នគរបាលព្រហ្មទណ្ឌ នៃអធិការដ្ឋាននគរបាល ក្រុងសៀមរាប កាលពីថ្ងៃទី២១ ខែមេសា ឆ្នាំ២០១៨ បានបញ្ជាក់ឲ្យដឹងថា បន្ទាប់ពីមានករណីចែកចាយ វីដេអូឃ្លីប នៅលើបណ្តាញសង្គម ហ្វេសប៊ុក (Facebook) ករណីហិង្សាមួយ ដែលសង្ស័យ កើតមានឡើង កាលពីថ្ងៃទី១៦ ខែមេសា ឆ្នាំ២០១៨ វេលាម៉ោង ២៣យប់ នៅចំណុច ផ្សារកុងទីន័រ តាមបណ្តោយផ្លូវហ្សាដឺហ្គូល ខាងកើតស្តាតចាស់ ជាប់សណ្ឋាគារសូហ្វីថែលអង្គរ ទល់មុខសណ្ឋាគារតារាអង្គរ ក្រុងសៀមរាប ខេត្តសៀមរាប នោះ ។
ដោយមានការយកចិត្តទុកដាក់ ដ៏ខ្ពង់ខ្ពស់ ពីលោកឧត្តមសេនីយ៍ត្រី ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប បានធ្វើការណែនាំឲ្យលោកឧត្តមសេនីយ៍ត្រីភឹង ចិន្តារ៉េត ស្នងការរទទួលផែនព្រហ្មទណ្ឌ សហការជាមួយ លោកវរសេនីយ៍ឯក ទេព ចាន់ណា អធិការនៃអធិការដ្ឋាននគរបាលក្រុងសៀមរាប បើកការស៊ើបអង្កេត រកហេតុផលជាក់ស្តែង នៃករណីនេះ។
នគរបាលព្រហ្មទណ្ឌ នៃអធិការដ្ឋាននគរបាល ក្រុងសៀមរាប បានឲ្យដឹងថា “ជាលទ្ធផល យើងបានធ្វើការស្រាវជ្រាវរកឃើញ កន្លែងកើតហេតុនិងកោះហៅ ជនដែលមានការសង្ស័យពាក់ព័ន្ធ មកបំភ្លឺនៅថ្ងៃទី២១ ខែមេសា ឆ្នាំ២០១៨ ម្សិលមិញ នៅអធិការដ្ឋាននគរបាលក្រុងសៀមរាប ដែលដំណើររឿងមានដូចតទៅ៖ មុនពេលកើតហេតុ នៅចំណុចផ្សារកុងទីន័រ តាមបណ្តោយផ្លូវហ្សាដឺហ្គូល ខាងកើតស្តាតចាស់ ជាប់សណ្ឋាគារសូហ្វីថែលអង្គរ ទល់មុខសណ្ឋាគារតារាអង្គរ ស្ថិតក្នុងភូមិសាលាកន្សែង ក្រុងសៀមរាប បុរសម្នាក់ឈ្មោះ ណាំ ហោ ភេទប្រុស អាយុ៦០ឆ្នាំ មុខរបរដើររើសអេតចាយ មានទីលំនៅ នៅភូមិគោកត្នោត សង្កាត់គោកចក ក្រុងសៀមរាប បានជិះកង់ទាំងស្រវឹងស្រា ហើយចូលទៅអង្គុយបន្ទបង់ (បត់ជើងធំ) នៅខាងមុខការិយាល័យ ធ្វើការបុគ្គលិកផ្សារសៀមរាប ខនធែនន័រ ណាយម៉ាកឃីត ពេលនោះឈ្មោះ សយ សោភ័ណ្ឌ ហៅប៊ី អាយុ៣៨ឆ្នាំ មុខរបរ ជាប្រធានគ្រប់គ្រោងផ្សារ បានឃើញហើយស្រែកជេរ ឈ្មោះ ណាំ ហោ ដោយខឹងឈ្មោះ សយ សោភ័ណ្ឌ ក៏បានរើសយកកំណាត់ឈើ ដែលនៅក្បែរកន្លែងកើតហេតុ វ៉ៃទៅលើឈ្មោះសយ សោភ័ណ្ឌ ត្រូវផ្នែកខ្នងមួយដំបង ឈ្មោះសយ សោភ័ណ្ឌ ក៏បានវ៉ៃតបត និងស្រែកជេរ ទៅលើឈ្មោះ ណាំ ហោ ដោយឲ្យបុរសម្នាក់ទៀតឈ្មោះ ស៊ី សាវឿន ភេទប្រុស អាយុ២៧ឆ្នាំ ជាសន្តិសុខ ឈរកាន់ទូរស័ព្ទរបស់ខ្លួន ថតជាវិដេអូឃ្លីប ទុកផងដែរ ។ ដោយឈឺបត់ជើងធំ ហើយស្រវឹងស្រាផង នឹងត្រូវគេវាយទាត់ធាក់ទៀតផងនោះ ឈ្មោះ ណាំ ហោ បានដួលដេកទៅលើដី ដោយឃើញដូចច្នោះ ឈ្មោះ សយ សោភ័ណ្ឌ ក៏បានឲ្យលុយចំនួន៥ម៉ឺនរៀលទៅឈ្មោះ ស៊ី សាវឿន និងសន្តិសុខម្នាក់ទៀត ដើម្បីហៅ រ៉ឺម៉កម៉ូតូមួយគ្រឿង ដឹកឈ្មោះ ណាំ ហោ នឹងកង់មួយគ្រឿង ទៅមន្ទីរពេទ្យ ក៏ប៉ុន្តែពេលទៅដល់ចំណុចរង្វង់មូលព្រះរាជដំណាក់ ឈ្មោះណាំ ហោ ក៏បានស្រែកប្រាប់អ្នកបើករ៉ឺម៉កម៉ូតូ ឲ្យឈប់ ហើយគាត់ក៏បានលើកកង់ដែលនៅលើរ៉ឺម៉កចុះហើយឡើងជិះកង់ ចេញទៅបាត់ទៅ”។
លោកវរសេនីយ៍ត្រី នួន សក្តិចំរើនរិទ្ធ អធិការរងទទួលព្រហ្មទណ្ឌ បានឲ្យដឹងថា នៅចំពោះមុខមន្ត្រីនគរបាល ផ្នែកព្រហ្មទណ្ឌ នៃអធិការដ្ឋាននគរបាលក្រុងសៀមរាប អ្នកដែលមានវត្តមាន នៅក្នុងហេតុការណ៍នេះ បានឆ្លើយបំភ្លឺដំណើររឿង មានភាពស្របប្រហាក់ប្រហែលគ្នា ដូចបានរៀបរាប់ខាងលើ ដោយឡែក ឈ្មោះ ណាំ ហោ និងឈ្មោះ សយ សោភ័ណ្ឌ ក៏មិនព្រមដាក់ពាក្យបណ្តឹង ប្តឹងគ្នាទៅវិញទៅមកនោះទេ។ ហើយពាក់ព័ន្ធនឹងករណីហិង្សារនេះដែរ លោកព្រះរាជអាជ្ញារង អមសាលាដំបូងខេត្តសៀមរាប ក៏បានណែនាំ និង អនុញាតឲ្យមានការធានា ភាគីទាំងសងខាង ត្រឡប់ទៅលំនៅស្ថានវិញ ជាបណ្តោះអាសន្ន ។ ចំណែកឯសំណុំរឿង ត្រូវបាននគរបាល ផ្នែកព្រហ្មទណ្ឌក្រុងសៀមរាប កសាងនិងបញ្ជូន ទៅការិយាល័យជំនាញ ដើម្បីចាត់ការបន្តតាមនីតិវិធី ។
ជាមួយគ្នានេះ នគរបាលក្រុងសៀមរាប ក៏សូមការអធ្យាស្រ័យ ផងដែរ ដល់បងប្អូនប្រជាពលរដ្ឋ និងសាធារណជន នៅលើបណ្តាញសង្គមហ្វេសប៊ុក និងអង្គភាពសារព័ត៌មាន ចំពោះការយឺតយ៉ាវ បកស្រាយជូនមហាជន ពីព្រោះករណីនេះ គ្មានពាក្យបណ្តឹង ហើយឈ្មោះ ណាំ ហោ នេះមិនមានអ្នកណាស្គាល់ ទីលំនៅរបស់គាត់ផងដែរ៕ ដោយ៖បញ្ញាស័ក្តិ