ខេត្តព្រះសីហនុ៖ ប្រជាពលរដ្ឋមួយចំនួន រស់នៅភូមិសុខសាន្ត សង្កាត់កោះរ៉ុង ក្រុង-ខេត្តព្រះសីហនុ បានអះអាងថា ពួកគាត់ត្រូវអាជ្ញាធរសង្កាត់ កោះរ៉ុង ហាមមិនមកជួប សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាទេ នាឱកាសសម្តេច នឹងអញ្ជើញចូលរួមបើកសម្ភោធសណ្ឋាគារផ្កាយប្រាំ ក្រុមហ៊ុនរ៉ូយាល់គ្រុប របស់ លោក គិត ម៉េង នៅថ្ងៃចន្ទ ទី២៣ ខែមេសា ឆ្នាំ២០១៨ មានទីតាំងនៅឆ្នេរសុខសាន្ត ភូមិសុខសាន្ត សង្កាត់កោះរ៉ុង ក្រុង-ខេត្តព្រះសីហនុទេ។
ប្រជាពលរដ្ឋមួយចំនួនរស់នៅភូមិសុខសាន្ដ សង្កាត់កោះរ៉ុង ដែលមិនមានឈ្មោះទទួលបានប្លង់កម្មសិទ្ធិដីធ្លី បានអះអាងថា គម្រោងប្រមូលផ្តុំគ្នាអបអរសាទរ សម្តេច ហ៊ុន សែន ដើម្បីស្នើឲ្យជួយអន្តរាគមន៍ទៅអាជ្ញាធរសង្កាត់ ថ្នាក់ដឹកនាំរដ្ឋបាលខេត្តព្រះសីហនុ និងក្រសួងរៀបចំដែន ដីនគររូបនីយកម្ម និងសំណង់ ឲ្យចេញប្លង់កម្មសិទ្ធិដីធ្លីជូនពួកគាត់ នៅព្រឹកថ្ងៃចន្ទ ទី២៣ ខែមេសា ឆ្នាំ២០១៨នេះ ត្រូវបរាជ័យ ព្រោះត្រូវបានចៅសង្កាត់កោះរ៉ុង និងកោះរ៉ុងសន្លឹមបានមកហាមឃាត់។
ប្រជាពលរដ្ឋមួយចំនួនរស់នៅភូមិសុខសាន្ត ឲ្យដឹងថា គម្រោងស្នើជួប សម្តេច ហ៊ុន សែន នៅថ្ងៃចន្ទ ទី២៣ ខែមេសានេះ កើតឡើងក្រោយពេលពួកគាត់ មិនមានឈ្មោះទទួលបានប្លង់កម្មសិទ្ធិ ឬមិនត្រូវបានអាជ្ញាធរពាក់ព័ន្ធ មិនព្រមចេញប្លង់កម្មសិទ្ធិដីធ្លីជូនពួកគាត់។
យោងតាមលិខិតសុំកិច្ចអន្តរាគមន៍គោរពជូន សម្តេច ហ៊ុន សែន នាយករដ្ឋមន្ត្រី ដែលអ្នកយកព័ត៌មានគេហទំព័រ CEN.COM.KH ទទួលបានតាមបណ្តាញសង្គម នៅវេលាម៉ោង ១០ និង៣០នាទី យប់ថ្ងៃអាទិត្យ ទី២២ ខែមេសា ឆ្នាំ២០១៨ និងមានភ្ជាប់ស្នាមមេដៃ របស់ប្រជាពលរដ្ឋមួយចំនួន រស់នៅភូមិសុខសាន្ត សង្កាត់កោះរ៉ុងផងនោះ មានខ្លឹមសារទាំងស្រុងថា ៖
ព្រះរាជាណាចក្រកម្ពុជា
ជាតិ សាសនា ព្រះមហាក្សត្រ
លិខិតសុំកិច្ចអន្តរាគមន៍
សូមគោរពជូន សម្តេច ហ៊ុន សែន នាយករដ្ឋមន្ត្រី ជាទីគោរពដ៏ខ្ពង់ខ្ពស់
យើងខ្ញុំប្រជាពលរដ្ឋទាំងអស់គ្នា ដែលរស់នៅលើកោះរ៉ុង និងជាម្ចាស់ដី ដែលជាប្រជាពលរដ្ឋ របស់សម្តេចសូមគោរពជំរាបជូនសម្តេចថា យើងខ្ញុំទាំងអស់គ្នា កើតទុក្ខមិនសុខចិត្តដោយសារ អាជ្ញាធរចៅសង្កាត់លើកោះរ៉ុងមាន លោក សេង ហួរលាង និង លោក ឈឺន ចន្ថា បានទប់ស្កាត់ និងហាមឃាតយ៉ាងដាច់ខាត់មិនអោយពួកខ្ញុំ ដែលជាប្រជាពលរដ្ឋមិនទាន់បានទទួលប័ណ្ណកម្មសិទិ្ធទៅចូលរួមអបអរសាទរនូវវត្តមាន របស់សម្តេច ក្នុងការអញ្ចើញចូលរួមពិធីសម្ពោធសណ្ឋាគារបឹងកាឡូផ្កាយប្រាំ របស់ លោក គិត ម៉េង ដោយខ្លាចពួកយើងខ្ញុំរាយការណ៍រឿងពិតជូនសម្តេច។ យើងខ្ញុំសូមជំរាបជូន សម្តេច មេត្តាជ្រាបថា ប្រជាពលរដ្ឋ របស់សម្តេចទាំង ៤ភូមិ (រួមមានភូមិសុខសាន្ត ភូមិកោះតូច ភូមិព្រែកស្វាយ និងភូមិដើមថ្កូវ) ដែលត្រូវក្រុមហ៊ុនរ៉ូយ៉ាលគ្រុប របស់ លោក គិត ម៉េង សហការគ្នាធ្វើការទប់ស្កាត់ជាមួយគណៈកម្មការរដ្ឋបាលខេត្ត ហាមឃាត់មិនអោយចេញប័ណ្ណកម្មសិទិ្ធ ទូទាំងកោះមានចំនួន ៥៨៤ក្បាលដី និងក្បាលដីផ្សេងទៀត ដែលបានវាស់វែងរួចរាល់ និងបានបិទផ្សាយចប់តាមច្បាប់រួចហើយ ដែលប្រការនេះធ្វើអោយយើងខ្ញុំជាប្រជាពលរដ្ឋទូទាំងកោះរ៉ុង មានការឈឺចាប់ខ្លាំងណាស់ ចំពោះ លោក គិត ម៉េង និង អាជ្ញាធរចៅសង្កាត់ទាំងពីររូបនេះមាន លោក សេង ហួរលាង និង លោក ឈឺន ចន្ថា ដែលមិនអោយពួកខ្ញុំមកទទួលអបអរសាទរវត្តមាន របស់ សម្តេច ដែលជាព្រឹត្តការណ៍ប្រវត្តិសាស្ត្រលើកទី១ ប្រចាំប្រទេសកម្ពុជា ដែលសម្តេច បានសម្រេចចិត្តផ្តល់ប័ណ្ណកម្មសិទិ្ធដីធ្លី នៅលើទឹកដីកោះផ្តល់អោយប្រជាពលរដ្ឋយើងខ្ញុំ។
សូមសម្តេចមេត្តា អន្តរាគមន៍ដល់ពួកយើងខ្ញុំ ដើម្បីបានចូលរួមក្នុងកម្មវិធីជាប្រវត្តិសាស្ត្រនេះផង ព្រោះយើងខ្ញុំទាំងអស់គ្នា មានការជឿជាក់ថា មានតែសម្តេចទេ ដែលមើលឃើញនូវទុក្ខលំបាក របស់ប្រជាពលរដ្ឋ ព្រោះនៅទីណាប្រជាពលរដ្ឋមានទុក្ខលំបាក គឺនៅទីនោះពិតជាមាន សម្តេច ជួយដោះស្រាយទុក្ខលំបាកគ្រប់បែបយ៉ាង។
យើងខ្ញុំសូមសំនូមពរ សម្តេចមេត្តា ជួយអន្តរាគមន៍ទៅអាជ្ញាធរ មេត្តាផ្តល់ប័ណ្ណកម្មសិទិ្ធស្របច្បាប់ដល់ពួកយើងខ្ញុំ ដែលជាម្ចាស់ដីនៅលើកោះ បន្ទាប់ពីបានធ្វើការវាស់វែងចប់សព្វគ្រប់តាមនិតិវិធីច្បាប់៕ ដែន សីមា
