ប្រព័ន្ធផ្សព្វផ្សាយនៅតំបន់ភាគខាងលិចរដ្ឋធានី Kabul ឲ្យដឹងថា នៅព្រឹកថ្ងៃទី ២២ ខែមេសា ម្សិលមិញនេះ (ម៉ោងតំបន់) នៅតំបន់សាលរៀន ១ ត្រូវបានយកធ្វើជាកន្លែងចុះឈ្មោះបោះឆ្នោតរបស់សង្កាត់ Dashti Barchi បានកើតឡើងករណីបន្ទុះគ្រាប់អត្តឃាតមួយចំពេលដែលមនុស្សកំពុងប្រមូលផ្តុំច្រើន ជាហេតុនាំឲ្យមនុស្សយ៉ាងតិច ៤១នាក់ ស្លាប់និងរាប់សិបនាក់រងរបួស ។
ទិដ្ឋភាពកន្លែងកើតហេតុ
តាមស្នងការប៉ូលិសក្រុង Kabul លោក Dawood Amin ឲ្យដឹងថា ឧក្រិដ្ឋជនបានចូលលាយឡំជាមួយហ្វូងមនុស្ស កំពុងឈរនៅមុខក្លោងទ្វារនៃមណ្ឌលបោះឆ្នោតមួយភាគខាងលិចក្រុង Kabul ដែលសម្បូរអ្នកកាន់សាសនាអ៊ីស្លាមនិកាយ Shiite រស់នៅ ។
អាហ្វហ្គានីស្ថាននឹងធ្វើការបោះឆ្នោតសកលនៅអំឡុងខែតុលាខាងមុខ ។
Update : តួលេខថ្មីបំផុតប្រកាសនៅយប់ថ្ងៃទី ២២ ខែមេសា មានមនុស្សស្លាប់កើនដល់ ៥៧នាក់ហើយ ហើយ ១១៩នាក់ រងរបួស ។
ពួកអ៊ីស្លាមនិយមជ្រុល IS បានប្រកាសទទួលស្គាល់ថា ជាទង្វើរបស់ពួកគេ ៕ សូយន