ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងកោតសរសើរ និងថ្លែងអំណរគុណ ចំពោះសេវារថយន្តក្រុង របស់សាលារាជធានីភ្នំពេញ ដែលបានដឹកជញ្ជូន បងប្អូនប្រជាពលរដ្ឋ កម្មករ-កម្មការិនី ទៅស្រុកកំណើត ក្នុងអំឡុងពេលបុណ្យចូលឆ្នាំថ្មី ដោយចាប់ពីថ្ងៃទី១២ ដល់ថ្ងៃទី១៨ ខែមេសា ឆ្នាំ២០១៨។
សម្ដេចតេជោ ហ៊ុន សែន ថ្លែងបែបនេះ ក្នុងពិធីជួបសំណេះសំណាលជាមួយ សហជីពកម្មករ ចំនួន៤.៣៥០នាក់ នៅព្រឹកថ្ងៃទី២១ ខែមេសា ឆ្នាំ២០១៨នេះ សាលមហោស្រពកោះពេជ្រ ។
សម្តេចតេជោ ហ៊ុន សែន បានកោតសរសើរ និងថ្លែងអំណរគុណ ចំពោះសេវាឡានក្រុង របស់សាលារាជធានីភ្នំពេញ ដែលបានដឹកជញ្ជូន បងប្អូនប្រជាពលរដ្ឋ កម្មករកម្មការិនី ទៅស្រុកកំណើត ក្នុងអំឡុងពេលបុណ្យចូលឆ្នាំថ្មី ប្រពៃណីជាតិខ្មែរ ក្នុងពេលថ្មីៗនេះ ដែលមានបងប្អូនកូនក្មួយ ធ្វើដំណើរប្រមាណជាង ៨.៨៣៥នាក់ និងពេលត្រឡប់មកវិញ មានអ្នកដំណើរប្រមាណ ៥.២៤២នាក់ ដោយមានអ្នកខ្លះ មិនទាន់ត្រឡប់មកវិញនៅឡើយ។
ជាមួយគ្នានោះផងដែរ សម្តេចតេជោ នាយករដ្ឋមន្ត្រី បានថ្លែងអំណរគុណចំពោះ ក្រុមហ៊ុនឡានដឹកជញ្ជូន របស់ក្រុមហ៊ុនស្រាបៀរ Ganzberg ដែលបានផ្តល់ឡានក្រុង ដឹកជញ្ជូនបងប្អូន ប្រជាពលរដ្ឋ ទៅស្រុកកំណើត ក្នុងឱកាសបុណ្យចូលឆ្នាំថ្មី។ ជាថ្មីម្តងទៀត សម្តេចតេជោ ហ៊ុន សែន ក៏បានប្រកាសផងដែរថា សម្រាប់បុណ្យភ្ជុំបិណ្ឌខាងមុខនេះ គឺសាលារាជធានីភ្នំពេញ នឹងត្រៀមឡានក្រុងប្រមាណ ២០០ ឡាន ដើម្បីផ្តល់ការដឹកជញ្ជូន ដល់បងប្អូនកូនក្មួយកម្ម ដោយមិនយកលុយ ដើម្បីជួយកាត់បន្ថយការចំណាយនានា របស់កូនក្មួយកម្មករ។
សម្តេចតេជោ ហ៊ុន សែន នាយករដ្ឋមន្ត្រីនៅតែបន្តអំពាវនាវឲ្យបងប្អូនប្រជាពលរដ្ឋ ជាពិសេសបងប្អូនកូនក្មួយកម្មករកម្មការិនី សូមចូលរួមរក្សាសន្តិភាពឲ្យខានតែបានដើម្បីរក្សាការពារមុខរបរ អាជីព និងការងារ ដែលកំពុងមានសព្វថ្ងៃ៕ ដោយ ៖ បញ្ញាស័ក្តិ