ភ្នំពេញ ៖ ករណីគ្រោះថ្នាក់ចរាចរណ៍បង្កឡើង ដោយរថយន្តស្ទូចបើកបរជាន់ហ្វ្រាំងមិនស៊ី ជ្រុលបុ.ករះរថយន្ត កង់បីណ្ឌានិងម៉ូតូជាច្រើនគ្រឿង ទាន់អស់ល្បឿនទៅបុ.កផ្ទប់នឹងរបងផ្ទះប្រជាពលរដ្ឋ រងការខូចខាតយ៉ាងដំណំ បង្កឲ្យមនុស្ស៣នាក់របួសស្រាល។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៣និង៣០ នាទីរសៀលថ្ងៃទី០៩ ខែធ្នូឆ្នាំ ២០២១ស្ថិតនៅតាមបណ្ដោយផ្លូវ២៧១ សង្កាត់ទំនប់ទឹកខណ្ឌបឹងកេងកង រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តស្ទូចមួយគ្រឿង ម៉ាកហ៊ីយ៉ាន់ដាយពណ៌សពាក់ផ្លាកលេខភ្នំពេញ3E-8168 បើកបរដោយបុរសម្នាក់ រួមដំណើរជាមួយនឹងព្រូម្នាក់ទៀត ធ្វើដំណើរតាមបណ្ដោយផ្លូវ ២៧១ ក្នុងទិសដៅពីត្បូងទៅជើង ខណៈមកដល់ត្រង់ចំណុចកើតហេតុស្រាប់ តែជាន់ហ្វ្រាំងមិនស៊ីក៏បួងចង្កូតទៅបុ.ករះរថយន្តឃ្លប់ដឹកទំនិញមួយគ្រឿង បន្តបុ.កកង់បីឥណ្ឌាមួយគ្រឿងនិងម៉ូតូ៣គ្រឿងទៀត រថយន្តមិនទាន់អស់ល្បឿនជ្រុលទៅបុ.កផ្ទប់ នឹងរបងផ្ទះប្រជាពលរដ្ឋកល់ជាប់ទៅមុខលែងរួច សំណាងណាស់ ក្នុងហេតុការណ៍គ្រោះថ្នាក់ចរាចរណ៍ខាងលើនេះ គ្រាន់តែបណ្ដាលឲ្យមនុស្ស៣នាក់ រងរបួសរលាត់ដៃជើងបន្តិចបន្តួច។
ក្រោយមកកម្លាំងសមត្ថកិច្ចមូលដ្ឋាន បានចុះមកកន្លែងកើតហេតុ សហការជាមួយសមត្ថកិច្ចជំនាញ វាស់វែងយករថយន្តបង្កទៅរក្សាទុក នៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ រងចាំធ្វើការដោះស្រាយគ្នានៅពេលក្រោយបន្តទៀត៕ រក្សាសិទ្ធិដោយ ៖ សួង សាម