វីដេអូមួយដែលត្រូវបានបង្ហោះនៅលើហ្វេសប៊ុក ដោយម្ចាស់ភោជនីយដ្ឋានមួយ នៅ Taman Equine, Seri Kembangan (ឥណ្ឌូនេស៊ី) បានបង្ហាញឲ្យឃើញអតិថិជនស្រីម្នាក់របស់ពួកគេ ត្រូវបានចោរឆក់កាបូបយ៉ាងងាយស្រួល ខណៈនាងកំពុងអង្គុយហូបនៅក្បែរបង្កាន់ជាប់ដងផ្លូវ ។
តាមរយៈវីដេអូឃ្លីប ចោរម្នាក់បានបង្ហាញខ្លួនក្នុងកាយវិការកំពុងដាក់ម៉ូ ជាមួយដៃគូរបស់គេដែលកំពុងបើករថយន្តចាំទទួល និងភ្លាមៗនោះ ចោរនេះបានដើរសំដៅទៅកាន់ស្ត្រីរងគ្រោះ និងឆក់យកកាបូបពីដៃនាង រួចរត់ចូលរថយន្តរបស់ពួកខ្លួនដែលចំហរទ្វារួចស្រេច និងបើកចាកចេញដោយសុវត្ថិភាព ។ ភ្លាមៗនោះ ស្ត្រីរងគ្រោះបានត្រឹមទន្ទ្រាំជើង ខណៈមនុស្សម្នាក្នុងហាងភ្ញាក់ផ្អើល ឆោឡោរត់ចេញមើលស្រមោលចោរប៉ុណ្ណោះ ។
ស្ត្រីរងគ្រោះបានបាត់បង់លុយកាក់អស់មួយចំនួន និងរបស់សំខាន់ផ្សេងៗទៀត គឺជាប្រាក់កម្ចីជាប់ទាក់ទងនឹងសមាជិកគ្រួសារ ។
ប៉ូលីសនៅក្នុងប្រទេសឥណ្ឌូនេស៊ី បាននិយាយថា បុរសឥណ្ឌូនេស៊ី២នាក់ ត្រូវបានចាប់ឃាត់ខ្លួន ដើម្បីជាជំនួយក្នុងការស៊ើបអង្កេតករណីខាងលើនេះ ។
ទោះយ៉ាងណា នេះជាមេរៀនថ្មីមួយ សម្រាប់មនុស្សទាំងអស់គ្នាត្រូវប្រុងប្រយ័ត្នរបស់ទ្រព្យខ្លួនជានិច្ច ខណៈចូលអង្គុយញ៉ាំអាហារតាមបណ្តាហាង ឬ ភោជនីយដ្ឋានជាប់ចិញ្ចើមផ្លូវ ៕ ចន្ទី
