តាកែវ៖ ថ្លែងនៅក្នុងពិធីបើកតាំងពិព័រណ៍ កម្ពុជា ថៃ នៅបរិវេណអតីតសណ្ឋាគារខេត្តតាកែវ នាព្រឹកថ្ងៃទី ២៣ ខែមេសា ២០១៨ នេះ ឯកឧត្តម អ៊ូច ភា អភិបាលខេត្តតាកែវ បានធ្វើការជំរុញឲ្យមន្ត្រីជំនាញសាខាកាំកុងត្រូលខេត្ត បន្តសកម្មភាព លើការចុះត្រួតពិនិត្យគ្រឿងឧបភោគ បរិភោគ និងផលិតផលក្លែងបន្លំ ដែលដាក់លក់នៅតាមទីផ្សារ ក៏ដូចជាការដាក់លក់នៅតាមស្តង់ពិព័រណ៍នេះអោយបានច្រើន ដើម្បីជាការធានានូវសុវត្ថិភាព និងសុខភាពរបស់ប្រជាពលរដ្ឋ ។
លោកអភិបាលខេត្តតាកែវបានបន្តថា ការបង្កើតឲ្យមានការដាក់លក់ផលិតផលនានា ដែលជាពិព័រណ៍ពាណិជ្ជកម្មរវាងកម្ពុជា-ថៃនេះ គឺជាតម្រូវការរបស់បងប្អូនប្រជាពលរដ្ឋរបស់យើង ដូច្នេះមន្ត្រីជំនាញពាក់ព័ន្ធ ត្រូវតែពិនិត្យអោយបានម៉ត់ចត់ ទៅលើគុណភាព និងតម្លៃ បើទោះបីជាយើងឋិតនៅក្នុងការប្រកួតប្រជែងទីផ្សារសេរីក៏ពិតមែន តែក៏ត្រូវរកតម្លៃមួយអោយសមរម្យផងដែរ ដែលអាចទទួលយកបាន ចៀសវៀងមានការលក់ថ្លៃពេក ឬថោកពេក ដែលធ្វើអោយអាជីវករដែលលក់ដូរនៅក្នុងស្រុកមួយចំនួនលក់ដូរមិនដាច់ បង្កអោយមានការមិនសប្បាយចិត្ត ចំពោះការបង្កើតនូវការដាក់តាំងពិព័រណ៍នេះ។
បន្ទាប់ពីធ្វើការប្រកាសអោយបើកដំណើរការនូវការដាក់លក់ផលិតផលនានា របស់កម្ពុជា-ថៃ នោះមន្ត្រីជំនាញកាំកុងត្រូលខេត្តតាកែវ ដែលដឹកនាំដោយលោក ប៉ោ លាងគង់ ប្រធានសាខា រួមជាមួយនិងក្រុមការងារបានធ្វើសកម្មភាព ចុះពិនិត្យនិងធ្វើការណែនាំទៅលើទីតាំងលក់ដូរនំចំណីមួយចំនួននៅក្នុងពិព័រណ៍ ដែលយកមកលក់វេចខ្ចប់ជាកញ្ចប់តូចៗ ដោយមិនមានបិទស្ទិកកឺ ផលិតផល និងកាលបរិច្ឆេកច្បាស់លាស់នោះ អោយរៀបចំឡើងវិញ ដោយត្រូវបិទស្ទិកកឺអោយបានត្រឹមត្រូវទៅលើនំចំនីដែលវេចជាកញ្ចប់តូចៗនោះ អោយបានត្រឹមត្រូវ និងត្រូវមានការបរិច្ឆេទអោយបានច្បាស់លាស់ផងដែរ ដើម្បីចៀសវៀងការលក់ដូរនូវសល់របស់ពួកគាត់ ហើយយកទៅលក់បន្ត ធ្វើអោយប៉ះពាល់សុខភាពដល់អ្នកបរិភោគ ដែលមិនបានដឹង ។
លោក ប៉ោ លាងគង់ ប្រធានសាខាកាំកុងត្រូលខេត្តតាកែវ បានអោយដឹងថា ការចុះត្រួតពិនិត្យនៅក្នុងរោងតាំងពិព័រណ៍នេះ គឺមន្ត្រីជំនាញរបស់យើង បានធ្វើការពិនិត្យទៅលើសរសៃគុយទាវ គ្រឿងសមុទ្រ បង្គារ មឹក និងនំចំណីមួចំនួន ដែលក្រុមអាជីវករថៃបានយកមកលក់គុយទាវនៅក្នុងពិព័រណ៍ ហើយឆ្លងកាត់ទៅលើការធ្វើតេសបឋមរកសារធាតុគីមី ទៅលើមុខម្ហូបខាងលើទាំងអស់នោះ គឺមន្ត្រីជំនាញបញ្ជាក់ថា មិនមានសារធាតុគីមីអ្វីនោះទេ ៕ តាកែវ
