ភ្នំពេញ ៖ ជនសង្ស័យម្នាក់ ជាអគ្គនាយកក្រុមហ៊ុន យិន ត្រាង ដែលជាប់ពាក់ព័ន្ធសំណុំរឿងទទួលផលចោរកម្ម ឆបោករថយន្ដ ៤២គ្រឿង នៅថ្ងៃទី២៣ ខែមេសា ឆ្នាំ២០១៨នេះ លោក រស់ ពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចេញដីកាបង្គាប់ឲ្យឃុំខ្លួន ដាក់ពន្ធនាគារជាបណ្តោះអាសន្ន។
ជនត្រូវចោទមានឈ្មោះ ឈិន ចាន់ថុល ភេទប្រុស អាយុ៤២ឆ្នាំ មុខរបរ អគ្គនាយកក្រុមហ៊ុន យិន ត្រាង ឌីវេឡុបម៉ិន មានអាស័យដ្ឋានផ្ទះលេខ៨០៦ ផ្លូវ NTZ ក្រុមទី៤ ភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ និងមានស្រុកកំណើតភូមិក្បាលជួរ ឃុំសំបុក ក្រុងក្រចេះ ខេត្តក្រចេះ ។
សូមបញ្ជាក់ថា អគ្គនាយកក្រុមហ៊ុន យិន ត្រាង ឌីវេឡុបម៉ិន ត្រូវបានកម្លាំងកងរាជអាវុធហត្ថខេត្តស្ទឹងត្រែង ឃាត់ខ្លួននៅថ្ងៃទី២០ ខែមេសា ឆ្នាំ២០១៨នេះ ដោយជាប់ពាក់ព័ន្ធករណីបោករថយន្ដ៤២គ្រឿង នៅរាជធានីភ្នំពេញ ខណៈដែលបក្ខពួក២នាក់ផ្សេងទៀត ត្រូវបានតុលាការ បង្គាប់ឲ្យឃុំខ្លួនកាលពីថ្ងៃទី១៨ ខែមេសា ឆ្នាំ២០១៨កន្លងទៅ។
ប្រតិបត្តិការបង្ក្រាបអគ្គនាយកក្រុមហ៊ុននេះ ត្រូវបានធ្វើឡើងដោយយោងតាម ដីកាបង្គាប់ឲ្យចាប់ខ្លួន របស់លោក កូយ សៅ ចៅក្រមស៊ើបសួរសាលាដំបូងរាជធានីភ្នំពេញ និងពាក្យបណ្តឹងផ្ទាល់របស់ជនរងគ្រោះ ឈ្មោះ សុវណ្ណ ឈុនវិបុល ភេទប្រុស អាយុ២៧ឆ្នាំ និងឈ្មោះ ពិន អ៊ីន ភេទប្រុស អាយុ៤០ឆ្នាំ។ ក្រោយទទួលបានដីកានេះភ្លាម កម្លាំងអាវុធហត្ថខេត្តស្ទឹងត្រែង សហការជាមួយកងរាជអាវុធហត្ថរាជធានីភ្នំពេញ អនុវត្តដីកាបង្ក្រាបករណីពាក់ព័ន្ធ បទល្មើសសមគំនិត ក្នុងអំពើរំលោភលើទំនុកចិត្ត ឃាត់ខ្លួនចំនួន២នាក់ ឈ្មោះ ឈិន ចាន់ថុល ភេទប្រុស អាយុ៤២ឆ្នាំ មុខរបរ អគ្គនាយកក្រុមហ៊ុន យិន ត្រាង ឌីវេឡុបម៉ិន ឯ.ក អាស័យដ្ឋានផ្ទះលេខ៨០៦ ផ្លូវ NTZ ក្រុមទី៤ ភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ និងមានស្រុកកំណើតភូមិក្បាលជួរ ឃុំសំបុក ក្រុងក្រចេះ ខេត្តក្រចេះ។
ដោយឡែកឈ្មោះ យ៉ាន វិន ភេទស្រី អាយុ៣០ឆ្នាំ ស្រុកកំណើតភូមិត្រពាំភ្លូ ឃុំអូរសារាយ ស្រុកត្រាំកក់ ខេត្តតាកែវ មិនមានឈ្មោះក្នុងដីកាចាប់ខ្លួន ហើយព្រះរាជអាជ្ញាមិនអនុញ្ញាតឲ្យឃាត់ខ្លួនទេកម្លាំងជំនាញបានឲ្យវិលត្រឡប់ទៅលំនៅឋានវិញ។ ក្រោយចាប់ខ្លួនអគ្គនាយកក្រុមហ៊ុន យិន ត្រាង សមត្ថកិច្ចបានដកហូត រថយន្តចំនួន៤គ្រឿង៖ ទី១ ៖ រថយន្តម៉ាក HAWTAI ពណ៌ស ពាក់ស្លាកលេខភ្នំពេញ 2AS-1787 ទី២ ៖ រថយន្តម៉ាក LEXUS 300 ពណ៌ប្រផេះគ្មានស្លាកលេខ ទី៣ ៖ រថយន្តម៉ាកកាមរី បាឡែន ពណ៌ប្រផេះ ពាក់ស្លាកលេខកំពង់ចាម 2A-2410 និងទី៤ ៖ រថយន្តម៉ាក HIGHLANDER ពណ៌ទឹកប៊ិច គ្មានស្លាកលេខ៕ ដោយ ៖ បញ្ញាស័ក្តិ
