ប៉ោយប៉ែត ៖កម្លាំងប៉េអឹមក្រុងប៉ោយប៉ែត បានស្ទាក់ចាប់បុរសម្នាក់ នៅថ្ងៃទី២២ ខែមេសា ឆ្នាំ២០១៨ វេលាម៉ោង៨ យប់ ករណីរំលោភសេពសន្ថវៈលើនារីម្នាក់ដែលមានសតិមិនប្រក្រតី ហើយកម្លាំងកងរាជអាវុធហត្ថ ក្រុងប៉ោយប៉ែត កំពុងធ្វើការសាកសួរបន្ត និងកសាងសំណុំរឿងបញ្ជូនទៅតុលាការ។
មន្ត្រីប៉េអឹមក្រុងប៉ោយប៉ែត បានបញ្ជក់ថា នៅវេលាម៉ោង ១៣ ថ្ងៃទី១៣ ខែមេសា ឆ្នាំ២០១៨ នៅបន្ទប់ ដីទំនេរមួយកន្លែងស្ថិតក្នុងមណ្ឌល៣ ភូមិប្រជាធម្មលិច សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ មានករណីរំលោភសេពសន្ថវៈមានស្ថានទម្ងន់ទោស ដែលបង្កឡើងដោយជនសង្ស័យឈ្មោះ ហុក ចាន់ ភេទប្រុស អាយុ៤០ឆ្នាំ បានធ្វើសកម្មភាពរំលោភសេពសន្ថវៈទៅលើជនរងគ្រោះឈ្មោះ អ ស.ជ អាយុ២៦ឆ្នាំ ដែលស្មារតីមិនប្រក្រតី មានទីលំនៅភូមិប្រជាធម្មលិច សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។ ការចាប់ខ្លួនជនសង្ស័យរូបនេះ យោងតាមពាក្យបណ្តឹងរបស់ម្តាយនារីរងគ្រោះ។ ជនបង្កបានល្បូងលួងលោមបបួលនាងឲ្យផឹកស្រាបណ្តាលឲ្យស្រវឹង រួចចាប់រំលោភនាង តែត្រូវម្តាយទៅទាន់ អូសនាងចេញមកក្រៅ ធ្វើឲ្យជនបង្កភ័យរត់ចោលស្រុកមួយរយៈ ហើយស្មានតែគ្មានអ្វីកើតឡើងដល់ខ្លួន ស្រាប់តែត្រឡប់មកផ្ទះវិញក៏ត្រូវប៉េអឹមចាប់តែម្តង។
ក្នុងពាក្យប្តឹង ម្តាយនារីរងគ្រោះបានឲ្យដឹងថា មុនពេលកើតហេតុជនបង្កនិងកូនស្រីរបស់គាត់ គឺជាអ្នកភូមិជិតគ្នា។ ជនបង្កបានប្រើឲ្យនាងទៅទិញស្រាបៀមកផឹករួមគ្នា ពេលនោះរូបគាត់ជាម្តាយមិនបាននៅមើលគេផឹកនោះទេ គាត់ក៏ចូលក្នុងផ្ទះមុនកូនទៅ។
មួយសន្ទុះក្រោយមកស្រាប់តែមានគេប្រាប់ថា ជនបង្ក នាំនាងទៅបន្ទប់មួយដែលនៅឆ្ងាយពីផ្ទះមួយសន្ទុះ ហើយក្រោយមកស្ត្រីជាម្តាយក៏ទៅតាមរកនាង ក៏ទាន់ឃើញជនល្មើសកំពុងចាប់រំលោភកូនគាត់។ ពេលនោះគាត់ក៏បានអូសដៃនាងរត់មកផ្ទះវិញ ហើយក៏បានទៅប្តឹងប៉េអឹមឲ្យចាត់ការជនបង្ក តែជនបង្កបានរត់គេចខ្លួន ទៅនៅខេត្តសៀមរាបមួយរយៈ ហើយបានមកវិញ ដោយមិននឹងស្មានថាគ្មានរឿងអីកើតឡើង ស្រាប់តែត្រូវប៉េអឹមចាប់ជាប់យកទៅសួរនាំតែម្តង។
មន្ត្រីប៉េអឹមបានបន្តទៀតថា ក្រោយពីធ្វើសកម្មភាពរួចហើយជនសង្ស័យបានរត់គេចខ្លួនបាត់ រហូតដល់ថ្ងៃទី២២ ខែមេសា ឆ្នាំ២០១៨ វេលាម៉ោងប្រហែល ០៨យប់ ទើបកម្លាំងកងរាជអាវុធហត្ថក្រុងប៉ោយប៉ែតចាប់បានតែម្តង ខណៈពេលនេះសមត្ថកិច្ចកំពុងធ្វើការសាកសួរបន្ត ហើយកសាងសំណុំរឿងបញ្ជូនទៅតុលាការតែម្តង៕ ដោយ ៖ បញ្ញាស័ក្តិ
