ប៉ូលិសអាល្លឺម៉ង់បានកែនប្រមូលកងកម្លាំងយ៉ាងច្រើនសន្ធឹកសន្ធាប់ ដោយមានការចូលរួមបន្ថែមពីទាហានពន្លត់អគ្គិភ័យ ២០នាក់ ព្រមទាំងរថយន្តដឹកជញ្ជូនពិសេស ៤គ្រឿង ដើម្បីទៅប្រមូលវត្ថុតាងទាំងឡាយ ព្រមទាំងសាកសពមួយដែលគ្មានក្បាលជោគជាំដោយឈាម ។
តាម Daily Mail ប៉ូលិសអាល្លឺម៉ង់និយាយថា ពួកគេទទួលបានទូរស័ព្ទផ្តល់ព័ត៌មានពីអ្នកដំណើរម្នាក់ដោយគេប្រាប់ថា មានអ្វីមួយនោះស្រដៀងនឹងសាកសពដែលគេកាត់បាត់ក្បាល នៅជ្រោះមួយនៃជ្រលងភ្នំ Remstal ជិតតំបន់ Weinstadt, Stuttgart ។
ភ្លាមៗនោះប៉ូលិសសង្ស័យថា នេះជាករណីឧក្រិដ្ឋ ហើយទាហានពន្លត់អគ្គិភ័យត្រូវចាត់ឲ្យទៅប្រមូលយកសាកសពឡើងមក ។
ទាហានពន្លត់អគ្គិភ័យ ២០រូប បានប្រើប្រាស់រថយន្តជំនាញ ៤គ្រឿងឆ្ពោះទៅកន្លែងកើតហេតុ ដែលជាជ្រោះជ្រៅមួយំ ។ ពួកគេចំណាយពេលអស់ជាច្រើនម៉ោងដើម្បីចូលទៅកៀកសាកសព ហើយពេលនោះទើបដឹងថា វាគ្រាន់តែជាតុក្កតាមួយដែលគ្មានក្បាល ហើយត្រូវបានគេស្លៀកពាក់ ព្រមទាំងប្រើប្រាស់ឈាមក្លែងក្លាយ ។
អ្នកនាំពាក្យប៉ូលិស Baden-Württemberg ប្រសិនបើយើងមើលពីចម្ងាយវាពិតជាស្រដៀងនឹងសាកសពមនុស្សមែន ។ ឥឡូវនេះប៉ូលិសងាកស៊ើបអង្កេតរកអ្នកដែលបង្កើត “ស្នាដៃ” មួយនេះ ដើម្បីផ្តន្ទាទោស ៕ ចន្ទ្រា