ភ្នំពេញ ៖ សិប្បកម្មផលិត ទឹកម្ទេស ទឹកសៀង និងប្រេងខ្យង ដែលបង្កការប៉ះពាល់សុខភាពដល់ប្រជាពលរដ្ឋ ពាក់ព័ន្ធដល់៦ចំណុចនោះ នៅថ្ងៃទី២៣ ខែមេសា ឆ្នាំ ២០១៨ ត្រូវបានអាជ្ញាធរខណ្ឌមានជ័យ ដឹកនាំកម្លាំងចម្រុះចុះបិទ ហើយការបិទទីតាំងនោះ ក៏មានការឯកភាពពីម្ចាស់ទីតាំងផងដែរ ប៉ុន្តែបិទនោះ គឺជាបណ្តោះអាសន្នដើម្បីឲ្យម្ចាស់ទីតាំងប្តូរទីតាំងថ្មី ដែលមិនប៉ះពាល់ដល់ប្រជាពលរដ្ឋ។
ម្ចាស់អាជីវកម្ម ឈ្មោះ សេង រដ្ឋា បានឯកភាពបិទ និងរុះរើ មិនឲ្យហួសពីថ្ងៃសុក្រ តាមការស្នើសុំរបស់អាជ្ញាធរខណ្ឌ និងមន្ត្រីជំនាញរបស់មន្ទីរពាក់ព័ន្ធ។ ទីតាំងផលិតទឹកម្ទេស ទឹកសៀង និងប្រេងខ្យងនេះ ដែលកន្លងមក គណៈកម្មការចម្រុះ រួមទាំងមន្ត្រីជំនាញ ខណ្ឌមានជ័យ បានចុះត្រួតពិនិត្យ លើផលប៉ះពាល់ តាំងពីថ្ងៃ១៥ ខែធ្នូ ឆ្នាំ២០១៧ ម្តងរួចមកហើយ ដោយទុករយៈពេល៦០ថ្ងៃ ក្នុងការរុះរើ និងប្តូរទីតាំងថ្មី ក្រោយមន្ត្រីជំនាញ និងបច្ចេកទេសបានរកឃើញផលប៉ះពាល់ មាន៦ចំណុច ដូចខាងក្រោម៖ ១. ចំហាយទឹកម្ទេស ចេញពីឡចំហុយ បង្កជាក្លិន ឈួលខ្លាំង ស្ទើរទ្រាំពុំបានដល់អ្នករស់នៅជិតខាង រហូតកន្លងមកធ្លាប់ មានអ្នកឈឺជាបន្តបន្ទាប់ ព្រោះតែសុខភាពខ្សោយ មិនអាចទ្រាំទ្រក្លិនឈួលនេះបាន ។ ២. អម្រែងភ្លើងហ៊ុយចេញពីឡចំហុយ ហុយចូលផ្ទះបងប្អូនប្រជាពលរដ្ឋ ។ ៣. សំឡេងរ៉ឺម៉កម៉ូតូដឹកអីវ៉ាន់ ពុំមានស៊ីមាំងត្រឹមត្រូវ ។ ៤. កម្មករដាក់អីវ៉ាន់ពេលយប់ មានសំឡេងរំខានស្រែកឡូឡាដល់អ្នកជិតខាង។ ៥. មិនមានស្តង់ដារផលិតតាមបទដ្ឋានបច្ចេកទេសបានត្រឹមត្រូវ ៦. យានយន្តចតដឹកផលិតផល ចតលើផ្លូវបង្កការស្ទះចរាចរណ៍៕ ដោយ៖បញ្ញាស័ក្តិ
