ខេត្តកណ្តាល៖ ប្រជាពលរដ្ឋដែលរស់នៅតាមតំបន់ព្រំដែនក្នុងឃុំចំនួនបី គឺឃុំ សំពៅពូន ឃុំ ព្រែកជ្រៃ ស្រុកកោះធំ និង ឃុំ ក្អមសំណ ស្រុកលើកដែក ស្ថិតក្នុងខេត្តកណ្តាលបានសម្តែងការកោតសរសើនិងកាន់តែជឿងទុកចិត្តលើអាជ្ញាធរ និង កងកម្លាំងដែលបាននឹងកំពុងឈរជើងការពារសន្តិសុខ សណ្តាប់ធ្នាប់តាមខ្សែបន្ទាត់ព្រំដែនប្រទេសកម្ពុជា និង ប្រទេសវៀតណាម ។
ការកោតសរសើនិងជឿទុកចិត្តនេះ ក្រោយពេលដែលប្រជាពលរដ្ឋបានកត់សំគាល់ឃើញថា កន្លងមកក៏ដូចបច្ចុប្បន្នអាជ្ញាធរ និង កងកម្លាំងតែងតែបានយកចិត្តទុកដាក់ចុះល្បាតជាប្រចាំ តាមខ្សែបន្ទាត់ព្រំដែនដើម្បីការពារសន្តិសុខ សុវត្ថភាព សណ្តាប់ធ្នាប់ជូនប្រជាពលរដ្ឋកម្ពុជារស់នៅជាប់ព្រំប្រទល់ប្រទេសវៀតណាម ។
ប្រជាពលរដ្ឋបានលើកឡើងថា បច្ចុប្បន្ននេះ ការរស់នៅរបស់ពួកគាត់មិនមានការបារម្ភទេ ចំពោះសន្តិសុខ សុវត្ថភាព សូម្បីបញ្ហាគ្រឿងញៀន ចោរលួច ចោរប្លន់ក៏គ្មាន ។ ពីព្រោះទាំងយប់ ទាំងថ្ងៃអាជ្ញាធរ និង កងកម្លាំងសមត្ថកិច្ចតែងតែចុះល្បាតជាប្រចាំ ។
ពលរដ្ឋថា ដំណាំហូបផ្លែ និង ដំណាំរួមផ្សំផ្សេងៗទៀតមិនដែលបានបាត់បង់ដោយត្រូវចោរលួចឬកាប់បំផ្លាញឡើយ ជាពិសេសដីស្រែចំការកុំថាឡើយច្រើន សូម្បីតែមួយចំអាមក៏មិនបាត់ផង ។ ជាក់ស្តែងកាលពីថ្ងៃទី ២២ ខែ មេសា ឆ្នាំ ២០១៨ អាជ្ញាធរ សហការជាមួយកងកម្លាំងនគរបាលវរៈការពារព្រំដែន ៦០៥ សរុបប្រមាណ ៣០ នាក់ដឹកនាំដោយលោកវរសេនីយ៍ឯកគឹម ស្រៀង មេបញ្ជាការវរសេនាតូចនគរបាលកាពារជើងគោក605 បានចុះដើរល្បាតតាមខ្សែបន្ទាត់ព្រំដែនចាប់ពីចំណុចប្រសពទន្លេបាសាក់ ប៊ិនយីរហូតដល់ពាក់កណ្តាលព្រែកបាក់ដៃព្រំប្រទល់ខេត្តតាកែវដែលមានប្រវែងប្រមាណជាងដប់គីឡូម៉ែត្រ ។
លោក អៀ សេង នាយប៉ុស្តិ៍នគរបាលវរៈការពារព្រំដែនម្នាក់ក្នុងចំណោមនាយប៉ុស្តិ៍ទាំងប្រាំមួយដែលឈរជើងដឹកនាំកម្លាំងការពារតាមខ្សែបន្ទាត់ព្រំដែនបានប្រាប់ឲ្យដឹងថា ការចុះល្បាតនេះ មិនមែនធ្វើតែពេលថ្ងៃ ហើយយូរៗធ្វើម្តងនោះទេ គឺចុះល្បាតជាប្រចាំ ។ ពេលថ្ងៃចុះល្បាតតាមខ្សែបន្ទាត់ផ្លូវគោក ហើយពេលយប់ចុះល្បាតតាមផ្លូវទឹក ។
លោកថា ការល្បាតពេលនេះ កម្លាំងបានយកសសរឈើទៅជីកដាំចំណុចបង្គោលព្រំដែនលេខ ៩៥ តាំងពីជំនាន់បារាំងមកត្រូវបានកប់ដីល្បាប់ជាសញ្ញាសម្គាល់ព្រំពីជំនាន់បារាំងមក ។
លោកបន្តថា កម្លាំងនគរបាលវរៈការពារព្រំដែនមិនត្រឹមតែការពារសុវត្ថភាពសន្តិសុខ សណ្តាប់ធ្នាប់ប៉ុណ្ណោះទេ គឺថែមទាំងបានចាប់ដៃគ្នាជាមួយភាគីខាងវៀតណាមដើម្បីតាមខ្សែបន្ទាត់ព្រំដែនឲ្យមានសន្តិសុខសណ្តាប់ធ្នាប់ល្អទាក់ទិននិងការចេញចូលមិនស្របច្បាប់ទាក់ទិននិងការទំនាក់ទំនងរវាងប្រជាជនកម្ពុជាវៀតណាមទាក់ទិននិងការផ្លាស់ប្តូរទំនិញជាលក្ខណៈគ្រួសាររវាងប្រជាជនប្រទេសទាំងពីរទៀតផង៕ ដោយ ៖ បញ្ញាស័ក្តិ
