ព្រៃវែង៖ តំណាងរាស្ដ្រមណ្ឌលព្រៃវែង បានបង្ហាញពីគោលបំណងនៃការផលិតទូកង ដោយចាំងឈើទាំងមូលឲ្យក្លាយទៅជាទូកដ៏អស្ចារ្យ ដើម្បីបំបែកឯតទគ្គកម្មពិភពលលោក ក៏ដូចជារំលឹកឡើងវិញ នូវប្រវត្តិដ៏យូរលង់នៃការផលិត និងការប្រើប្រាស់ទូក របស់ខ្មែរតាំងពីសម័យបុរាណ និងស្នាព្រះហស្ត របស់ព្រះមហាក្សត្រខ្មែរគ្រប់ជំនាន់។
លោក ស សុខា តំណាងរាស្ដ្រមណ្ឌលព្រៃវែង និងជាអនុប្រធានសហភាពសហព័ន្ធយុវជនកម្ពុជា កាលពីនៅថ្ងៃទី២៣ ខែមេសា ឆ្នាំ២០១៨ ដែលាបានសរសេរផ្សព្វផ្សាយក្នុងផេកហ្វេសប៊ុកផ្លូវការរបស់លោកថា ក្នុងនាមគណៈកម្មការទូកងវែងជាងគេ ដែលមានប្រវែង ៨៥ម៉ែត្រ និងមានចំណុះទូក ១៧៩នាក់ ដើម្បីបំបែកឯតទគ្គកម្មពិភពលោក។ លោកក៏បានជម្រាបជូននូវគោលបំណងសំខាន់ៗ នៃការផលិតទូកង ដូចខាងក្រោម ៖ ១-រំលឹកឡើងវិញ នូវប្រវត្តិដ៏យូរលង់នៃការផលិត និងការប្រើប្រាស់ទូក របស់ខ្មែរតាំងពីសម័យបុរាណ ជាពិសេសរំលឹកឡើងវិញនូវស្នាព្រះហស្តរបស់ព្រះមហាក្សត្រខ្មែរគ្រប់ជំនាន់ក្នុងការប្រើប្រាស់ទូកជាមធ្យោបាយមួយក្នុងការការពារទឹកដី។ ២-ជួយលើកតម្កើងកិត្យានុភាពជាតិ ដោយបង្ហាញពិភព លោកទាំងមូលឲ្យបានដឹងកាន់តែច្បាស់ថាកម្ពុជាអាចបង្កើតស្នារដៃដ៏អស្ចារ្យមួយ។ ៣-ជំរុញស្មារតីស្នេហាជាតិ និងសាមគ្គីភាពនៃយុវជនជាកូន ចៅជំនាន់ក្រោយ ក្នុងការថែរក្សា និងអភិរក្សកេរដំណែលពីដូនតា។ ៤-ដើម្បីបង្ហាញឱ្យពិភពលោកឃើញថា ខ្មែរយើងខ្លាំង អាចផលិតបានអ្វី ដែលអស្ចារ្យជាងគេលើពិភពលោក ៥-ដើម្បីឱ្យបងប្អូនប្រជាពលរដ្ឋខ្មែរយើង ចេះសាមគ្គីគ្នារួបរួមគ្នា ជាធ្លុងមួយ តាមរយៈការកសាងទូកងវែងជាងគេ ចាប់ផ្តើមតាំងពីឈើមួយដើម រហូតដល់ចេញជារូបរាងទូកឡើង ដោយការនាំគ្នាចាំងឈើបន្តិចម្តងៗ និង៦-ដើម្បីបណ្តុះឆន្ទៈកូនខ្មែរយើង ឱ្យនាំគ្នាបង្កើតនូវអ្វីដែលអស្ចារ្យ សម្រាប់ខ្មែរលើឆាកអន្តរជាតិ ចៀសវាងការយកពេលវេលាមានតម្លៃ ទៅសេពគ្រឿងញៀន គ្រឿងស្រវឹង បង្ហោះម៉ូតូ និងក្មេងទំនើង ជាដើម។
លោកស សុខា បានថ្លែងថា “ខ្ញុំសូមអំពាវនាវដល់ពុកម៉ែ បងប្អូន យុវជន យុវនារីទាំងអស់ សូមអញ្ជើញចូលរួមជួយ សាងសង់ទូកងដោយចាំងឈើទាំងមូលឱ្យក្លាយទៅជាទូកងដ៏អស្ចារ្យ ដែលអាចបំបែកឯតទគ្គកម្មពិភពលោកបាន នៅមុខសាលាខេត្តព្រៃវែង (ចុងប៉ម) ដើម្បីបានជោគជ័យរួម ស្របតាមពាក្យស្លោកថា ” ខ្មែរសាមគ្គី ខ្មែរឈ្នះ ” ៕ ដោយ៖បញ្ញាស័ក្តិ
