កំពង់ចាម៖ ស្ដ្រីម្នាក់ជាប្រពន្ធត្រូវបានប្ដីកំណាចទាញយកកាំបិត ចាក់ធ្លាយបំពងក បណ្ដាលឲ្យស្លាប់នៅលើផ្ទះ ហើយឃាតកររូបនេះ បានរត់គេចខ្លួន បានប្រហែល២គីឡូម៉ែត្រពីកន្លែងកើតហេតុ ក៏ខ្យល់គរដួលស្លាប់ភ្លាម។ ហេតុការណ៍នេះ បានកើតឡើង នៅម៉ោង៣ទៀបភ្លឺ ថ្ងៃទី២៣ ខែមេសា ឆ្នាំ២០១៨នេះ ស្ថិតក្នុងភូមិអំពិល ឃុំព្រែកដំបូក ស្រុកស្រីសន្ធរ ខេត្តកំពង់ចាម។
លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានឲ្យដឹងថា ប្រពន្ធឈ្មោះ ស ស្រីនាង អាយុ៣៥ឆ្នាំ និងប្ដីឈ្មោះ ឡាច ធា អាយុ៣៨ឆ្នាំ។ កម្លាំងជំនាញរបស់ផែននគរបាលព្រហ្មទណ្ឌ ដឹកនាំដោយឧត្តមសេនីយ៍ត្រី ហេង វុទ្ធី ស្នងការរង សហការជាមួយកម្លាំងនគរបាលមូលដ្ឋាន បានចុះទៅដល់កន្លែងកើតហេតុ និងបង្កើតគណៈកម្មការត្រួតពិនិត្យសព។ ឆ្លងតាមការពិនិត្យស្រាវជ្រាវ ស្ដ្រីរងគ្រោះត្រូវបានប្ដីជាអ្នកចាក់សម្លាប់ រួចប្ដីរត់គេចខ្លួន បានចំងាយ២គីឡូម៉ែត្រ ក៏ដួលដាច់ខ្យល់ស្លាប់ខ្លួនឯង។
លោកស្នងការបញ្ជាក់ថា បុរសជាប្ដីជាមនុស្សមានជំងឺសរសៃប្រសាទលេបថ្នាំផង ផឹកស្រារាល់ថ្ងៃ អត់ហូបបាយប្រហែល៣ថ្ងៃហើយ ជីវភាពក្រីក្រជំពាក់លុយគេច្រើន ឈ្លោះ ប្រច័ណ្ឌប្រពន្ធស្ទើររាល់ថ្ងៃ ទើបកើតជាកំហឹង កាប់ប្រពន្ធបណ្តាលឲ្យស្លាប់ ៕ ដោយ៖បញ្ញាស័ក្តិ
