ភ្នំពេញ៖ ជាយុទ្ធសាស្ត្ររបស់ក្រសួងសុខាភិបាល ដែលអាចជួយកាត់បន្ថយអត្រាអាំងស៊ីដង់ របស់អ្នកជំងឺរបេងឲ្យបាន៤ភាគរយ និងអត្រាស្លាប់ឲ្យបាន៥ភាគរយ ឆ្នាំ២០២០ខាងមុខនេះ ខណៈឆ្នាំ២០១៧ កម្មវិធីជាតិបានស្រាវជ្រាវរកករណីជំងឺរបេង ជាង៣ម៉ឺនករណី ហើយលោករដ្ឋមន្ដ្រីសុខាភិបាល បានជំរុញឲ្យបង្កើនការស្រាវជ្រាវរុករកករណីជំងឺរបេងថ្មី ដល់ក្រុមដែលប្រឈមខ្ពស់ ស្របទៅតាមគោលដៅអភិវឌ្ឍន៍ប្រកបដោយចីរភាព នៅឆ្នាំ២០៣០ខាងមុខ។
ថ្លែងក្នុងឱកាសបើកសន្និបាតការងារកម្ចាត់រោគជំងឺរបេងទូទាំងប្រទេសលើកទី២៣ នៅភ្នំពេញ ថ្ងៃទី២៣ ខែមេសា លោកសាស្ត្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បានលើកឡើងថា កម្មវិធីជាតិកម្ចាត់រោគរបេង ត្រូវធ្វើការចុះស្រាវជ្រាវរកករណីរបេងថ្មី នៅតាមទីតាំងដែលមានមនុស្សរស់នៅកកកុញច្រើនដូចជា ពន្ធនាគារ វត្តអារ៉ាម អ្នកជំងឺអេដស៍ អ្នកជំងឺទឹកនោមផ្អែម ដល់មនុស្សវ័យចំណាស់ និងកុមារជាដើម ដើម្បីដាក់ការព្យាបាលឲ្យបានទាន់ពេលវេលា និងត្រូវបង្កើនការស្រាវជ្រាវរកករណីជំងឺរបេង ដល់ក្រុមដែលប្រឈមខ្ពស់ ដើម្បីឈានទៅកាត់បន្ថយអត្រាឈឺ និងស្លាប់ដោយសារជំងឺរបេង ស្របទៅតាមគោលដៅអភិវឌ្ឍន៍ប្រកបដោយចីរភាព នៅឆ្នាំ២០៣០ខាងមុខ។។
លោកសាស្ដ្រចារ្យបន្ដថា ក្រសួងសុខាភិបាល មានរូបមន្ដព្យាបាលជំងឺរបេងថ្មី ដែលព្យាបាលត្រឹមតែ៩ខែតែប៉ុណ្ណោះ នឹងជាសះស្បើយ ដែលកាលពីមុន រហូតដល់ទៅ ២៤ខែ ហើយត្រូវខិតខំរួមគ្នា ពង្រីកសេវាទៅតាមមូលដ្ឋាន ដោយយកចិត្តទុកដាក់ខ្ពស់ ដើម្បីព្យាបាលប្រជាពលរដ្ឋឲ្យកាន់តែប្រសើរ។ លោកសាស្ដ្រចារ្យ បានលើកឡើងថា វិស័យឯកជន ត្រូវសហការជាមួយកម្មវិធីជាតិ នៅពេលមានអ្នកជំងឺរបេង ទៅរកសេវាត្រូវណែនាំឲ្យគាត់ទៅរកការព្យាបាល នៅតាមមន្ទីរពេទ្យរដ្ឋ ព្រោះថាការព្យាបាលជំងឺរបេង គឺមិនបង់ថ្លៃទេ ទាំងការធ្វើរោគវិនិច្ឆ័យ និងការផ្តល់ឱសថព្យាបាល ហើយមិនត្រូវធ្វើការព្យាបាលដោយខ្លួនឯងឡើយ។ មន្ទីរពេទ្យគន្ធបុប្ផា ត្រូវរាយការណ៍ មកកម្មវិធីជាតិកម្ចាត់រោគរបេង នៅពេលរកឃើញកុមារ មានផ្ទុកជំងឺរបេង ដើម្បីឲ្យកម្មវិធីជាតិចុះស្រាវជ្រាវ ដល់អាណាព្យាបាល ឬឪពុកម្តាយ និងសាច់ញាតិរបស់ពួកគេបន្តទៀត។
លោកវេជ្ជបណ្ឌិត ម៉ៅ តាន់អ៊ាង ប្រធានមជ្ឈមណ្ឌលជាតិ កម្ចាត់រោគរបេងនិងហង់សិន បានថ្លែងថា ជាយុទ្ធសាស្ត្រមួយ ដែលអាចជួយកាត់បន្ថយអត្រាអាំងស៊ីដង់ របស់អ្នកជំងឺរបេងឲ្យបាន៤ភាគរយ និងអត្រាស្លាប់ឲ្យបាន៥ភាគរយ ឆ្នាំ២០២០ខាងមុខនេះ។ កម្មវិធីជាតិនឹងបង្កើនការស្រាវជ្រាវ តាមបែបសកម្ម និងពាក់កណ្តាលសកម្ម តាមរយៈការបញ្ជួនរថយន្តចល័ត និងបុគ្គលិកដោយបំពាក់នូវឧបករណ៍ទំនើបៗសម្រាប់ថតឆ្លុះ និងធ្វើរោគវិនិច្ឆ័យជំងឺរបេង នៅតាមវត្តអារាម និងតាមសហគមន៍នានា តាមទីជនបទ ដើម្បីស្វែងរកករណីជំងឺរបេងថ្មី ឲ្យបានច្រើនថែមទៀត និងដាក់ព្យាបាលជំងឺឲ្យបានទាន់ពេលវេលា។ កាលពីឆ្នាំ២០១៧ កន្លងទៅនេះ កម្មវិធីជាតិបានស្រាវជ្រាវរកករណីជំងឺរបេង បានចំនួនជាង៣ម៉ឺន៤ពាន់ករណី ហើយតាមផែនការនៅឆ្នាំ២០១៨នេះ គ្រោងនឹងស្រាវជ្រាវករណីជំងឺរបេងឲ្យបានជាង៤ម៉ឺនករណី៕ ដោយ៖បញ្ញាស័ក្តិ
