មនុស្សយ៉ាងហោចណាស់ចំនួន ១៨នាក់បានស្លាប់ និង ៥នាក់រងរបួស បន្ទាប់ពីមានហេតុការណ៏ ភ្លើងឆេះ ខារ៉ាអូខេនៅ ក្នុងទីក្រុង Qingyuan ភាគខាងត្បូងប្រទេសចិន កាលពីព្រឹកថ្ងៃអង្គារនេះ។នេះបើតាមការចេញផ្សាយរបស់សារព៌តមាន Channel News Asia។
បើតាមប៉ូលិសបានឲ្យដឹងថា អគ្គិភ័យបានកើតឡើងនៅពាក់កណ្តាលយប់ឈានចូលថ្ងៃអង្គារ នៅជាន់ទី ៣នៃអាគារមួយខ្នង ស្ថិតក្នុងខេត្ត Guangdong។
បើតាមការស៊ើបអង្កេតជាបឋមរបស់ប៉ូលីសបានឲ្យដឹងថា អគ្គិភ័យនោះកើតឡើងដោយសារតែមានអ្នកដុត ចំណែកជនសង្ស័យកំពុងតែរត់គេចខ្លួន។
ប៉ូលិសបញ្ជាក់ថា មុនពេលកើតហេតុ ជនសង្ស័យមានការឈ្លោះប្រកែកគ្នា បន្ទាប់មកជនរូបនោះបានយកម៉ូតូរបស់ខ្លួនទៅដាក់រាំងមុខទ្វារនៃអាគារនោះ រួចក៏បានដុតភ្លើងតែម្តង។
ប៉ូលិសបញ្ជាក់បែបនេះថា អគ្គិភ័យបានកើតឡើងនៅក្នុងផ្ទះខារ៉ាអូខេដ៏តូចមួយ៕ សុភ័ក្ត្រ