កំពង់ធំ ៖ មានករណីគ្រោះថ្នាក់ចរាចរ បង្កដោយរថយន្តខ្លួនឯង បណ្តាលឲ្យស្លាប់ម្នាក់ របួសស្រាល២នាក់ នៅថ្ងៃទី២៣ ខែមេសា ឆ្នាំ២០១៨ វេលាម៉ោង២១៖៣០នាទី លើកំណាត់ផ្លូវ ជាតិលេខ៦ ចន្លោះគីឡូម៉ែត្រលេខ១៨១-១៨២ ភូមិប្រសាទ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ។
សមត្ថកិច្ចមូលដ្ឋាន បានឲ្យដឹងថា រថយន្តម៉ាកឡិចស៊ិស ពណ៌ទឹកមាស ស្លាកលេខគ្មាន បើកបរ ដោយឈ្មោះ លឹម ចាន់រឹទ្ធី ភេទប្រុស អាយុ៣៦ឆ្នាំ នៅភូមិទី៧ សង្កាត់កំពង់រទេះ ក្រុងស្ទឹងសែន ខេត្តកំពង់ធំ ស្លាប់នៅមន្ទីរពេទ្យភ្នំពេញ និងអ្នករួមដំណើរ២នាក់ របួសស្រាល ។ ជនរងគ្រោះឈ្មោះ ១- ឈ្មោះ ហ៊ា រឹទ្ធី ភេទប្រុស អាយុ៣៧ឆ្នាំ នៅភូមិឃុំជាមួយអ្នកបើកបររថយន្ត ខាងលើ របួសស្រាល ២-ឈ្មោះ ផល្លា ភេទប្រុស អាយុ៣៥ឆ្នាំ នៅភូមិ ថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ របួសស្រាល ។ វត្ថុតាងរក្សាទុក នៅអធិការដ្ឋាននគរបាលស្រុកកំពង់ស្វាយ។ មូលហេតុជាបឋមបង្កដោយរថយន្តបែកកង់ហើយរេចង្កូតធ្លាក់ផ្លូវក្រឡាប់ ៕ ដោយ ៖ កូឡាប
