Joy Archilla មកពីហ្វីលីពីន គឺជាក្មេងស្រីមានសុខភាពធម្មតា និងរីករាយម្នាក់ កាលនៅពីក្មេង ។ ទោះយ៉ាងណា ជីវិតរបស់នាងបានចាប់ផ្តើមប្រែប្រួលទៅជាអាក្រក់បំផុត នៅពេលដែលនាងកត់សម្គាល់ឃើញស្នាមពកតូចមួយ នៅលើដៃរបស់នាង ក្នុងឆ្នាំ២០១៣ ។ វាបានចាប់ផ្តើមចេញជាស្នាមជាំតូច មានសណ្ឋានដូចមូសខាំ ដែលជាហេតុធ្វើឲ្យនាងព្យាយាមកម្ចាត់វាចោល ។ ប៉ុន្តែ ប៉ុន្មានសប្តាហ៍ និងច្រើនខែកន្លងផុតទៅ នាងបានកត់សម្គាល់ឃើញថា វាមិនបានបាត់ទេ ប៉ុន្តែ វាបានវិវត្តន៍ធំឡើងៗជំនួសទៅវិញ ។
Joy ក្រោយមក ត្រូវបានវិនិច្ច័យរកឃើញកើតជំងឺមហារីកឆ្អឹងដ៏កម្រ Ewings Sarcoma ។ វាជាប្រភេទមហារីកដែលកើតមានលើកុមារ និងមនុស្សវ័យជំទង់ ហើយ Joy នៅពេលនោះមានអាយុ ១៦ ឆ្នាំ ។ នាងត្រូវបានវះកាត់លើកដំបូងនៅក្នុងខែមេសា ឆ្នាំ២០១៣ ដោយវេជ្ជបណ្ឌិតបានធានាថា មហារីកឆ្អឹង ឬសរសៃសាច់ដុំនេះរបស់នាង នឹងជាសះស្បើយទាំងស្រុង ។
ទោះយ៉ាងណា ចូលឆ្នាំ២០១៤ Joy បានកត់សម្គាល់ថា ដុំពកមហារីកនោះបានវិលត្រឡប់មកវិញ និងបានវិវត្តន៍កាន់ធំទៅៗ ហើយធ្វើឲ្យឈឺចុកចាប់តិចតួច ។ នាងត្រូវបានវះកាត់ជាលើកទី២នៅខែកុម្ភៈ ឆ្នាំ២០១៤ ហើយដុំពក់ធំនោះ ក៏ត្រូវបានវះកាត់យកចេញផងដែរ ។ ទោះយ៉ាងណា ដោយសារវាជាជំងឺមហារីក នាងត្រូវឆ្លងកាត់ការព្យាបាលដោយប្រើគីមីចំនួន ១៧ ដំណាក់កាល ។ ប៉ុន្តែ នាងបានស្នើសុំគ្រួសារឈប់ព្យាបាលដោយគីមីនៅត្រឹមដំណាក់កាលទី៥ ឬ ទី៦ ព្រោះនាងមិនអាចដោះស្រាយបញ្ហាផ្លូវចិត្ត និងការឈឺចាប់ដែលនាងទទួលបាននោះទេ ។
ប៉ុន្តែ នៅពេលគ្រួសាររបស់នាង ព្យាយាមរកការព្យាបាលពីគ្រូពេទ្យដទៃ តែចម្លើយគឺត្រូវប្រើគីមីដូចគ្នា ។ នៅពេលនោះ នាងបានសម្រេចចិត្តព្យាយាមរកវិធីផ្សេងជំនួស ។ នាងបានផ្លាស់ប្តូរជីវិតរស់នៅ និងញ៉ាំអាហារដែលមានជីវជាតិច្រើន ។ នាងញ៉ាំបន្លែ និងផ្លែឈើច្រើន ហើយសឹងតែកាត់បន្ថយអ្វីៗផ្សេងទៀតទាំងអស់ ។ ទោះយ៉ាងណា នាងបានកត់សម្គាល់ថា ដុំពកថ្មីមួយបានចាប់ផ្តើមរីកលូតលាស់ម្តងទៀតនៅឆ្នាំ២០១៥ ហើយដុំសាច់នោះកាន់តែធំ និងកាន់តែកាចសាហាវជាងមុន ។
វេជ្ជបណ្ឌិតបានប្រាប់នាងថា នាងគួរតែទទួលការព្យាបលាដោយសារធាតុគីមី ដើម្បីធ្វើឲ្យជំងឺរបស់នាងល្អប្រើសើរ ។ ទីបំផុត នាងយល់ព្រម បន្ទាប់ពីបានឃើញកុមារតូចៗជាងនាង ដែលពួកគេសុទ្ធតែញញឹម ទោះបីត្រូវព្យាបាលដោយគីមីដូចគ្នាក៏ដោយ ។ ហើយនៅដំណាក់កាលទី១២ នៃការព្យាបាលដោយគីមីនៅក្នុងខែតុលា ឆ្នាំ២០១៥ ដុំសច់នោះត្រូវបានយកចេញម្តងទៀត ។ នៅខែកុម្ភៈ ឆ្នាំ ២០១៦ នាងបានបញ្ចប់វដ្តជីវសាស្ត្រលើកទី១៧របស់នាង ។
ប៉ុន្តែ ការប្រយុទ្ធប្រឆាំងរបស់ Joy ជាមួយជំងឺមហារីកនេះ មិនបានបញ្ចប់នោះទេ ។ ទោះបីអាចទៅសាលាបានម្តងទៀតក៏ដោយ ប៉ុន្តែ នាងបានកត់សម្គាល់ថា ដុំសាច់ផ្សេងទៀតបានចាប់ផ្តើមលូតលាស់នៅក្នុងឆ្នាំដដែលនេះ ។ ដោយគ្រាន់នឹកឃើញដល់ការវះកាត់ និងព្យាបាលគីមី ដោយនាងបានសម្រេចសាកល្បងអ្វីផ្សេងទៀត ។ នាងបានអនុវត្តតាមរបបអាហារដ៏តឹងរ៉ឹងជំនួសវិញ ហើយវាជារបបអាហារកាន់តែតឹងរ៉ឹងជាមុនផងដែរ ។
ទោះបីនាងបានខិតខំប្រឹងប្រែងយ៉ាងណាក៏ដោយ ក៏ដុំពក់នេះចាប់ផ្តើមលូតលាស់យ៉ាងធំ ដែលវាឲ្យនាងពិបាកក្នុងការចលនាដៃយ៉ាងខ្លាំង ។ ប៉ុន្តែ ដំណោះស្រាយចុងក្រោយរបស់វេជ្ជបណ្ឌិត ពិតជាធ្វើឲ្យ Joy ស្លុតរន្ធត់យ៉ាងខ្លាំង នៅពេលគ្រូពេទ្យណែនាំថាដៃរបស់នាងត្រូវតែកាត់ចោល ដើម្បីទប់ស្កាត់មហារីករាលដាលទៅកាន់ផ្នែកផ្សេងៗទៀតនៃរាងកាយរបស់នាង ។
ការវះកាត់លើកទី៤របស់នាងត្រូវបានធ្វើនៅក្នុងខែកុម្ភៈ ឆ្នាំ២០១៧ ។ បច្ចុប្បន្ន សុខភាពរបស់នាងល្អប្រសើរធម្មតា ប៉ុន្តែ នាងក្លាយជាជនពិការដៃម្ខាងគួរឲ្យសោកស្តាយ ៕ ចន្ទី
