ខេត្តព្រះសីហនុ៖ ភ្ញៀវទេសចរជាតិអន្តរជាតិ ដែលចូលមកទស្សនាខេត្តព្រះសីហនុ បង្ហាញការមិនសូវពេញចិត្ត ចំពោះសកម្មភាព របស់រដ្ឋបាលខេត្តព្រះសីហនុ និងអាជីវករឆ្នេរអូរឈើទាល ដែលបាននាំយកតូបលក់ភេសជ្ជ តុ ឆត្រ និងសម្ភារៈផ្សេងៗទៀត យកទៅដាក់ពង្រាយនៅតាមឆ្នេរខ្សាច់ នៃឆ្នេរសមុទ្រអូរឈើទាល ថាបានប៉ះពាល់ដល់សោភ័ណភាពបរិស្ថានឆ្នេរ និងប៉ះពាល់ដល់ការដើរកម្សាន្ត និងចុះងូតទឹកតាមឆ្នេរសមុទ្រមួយនេះ។
ភ្ញៀវទេសចរជាតិ បង្ហាញអារម្មណ៍ហួសចិត្ត កាលបើដឹងថា រដ្ឋបាលខេត្តព្រះសីហនុ បាននាំយក ស្តង់ ឬតូបលក់ភេសជ្ជ តុ និងឆត្រ ទៅដាក់ពង្រាយនៅលើឆ្នេរសមុទ្រមួយចំនួន មានឆ្នេរអូរឈើទាលជាដើម នាំឲ្យបាត់បង់សណ្តាប់ធ្នាប់ និងសោភ័ណភាពឆ្នេរមានដូចជា៖ ឆ្នេរអូរឈើទាល ឆ្នេរអតីតមុខក្រុមហ៊ុនអារីស្តុន និងឆ្នេរឯករាជ្យជាដើម ក្នុងគម្រោងដាក់ជួលឲ្យអាជីវករលក់ដូរ។
បន្ថែមលើនេះ ភ្ញៀវទេសចរជាតិភាគច្រើន ក៏បានរិះគន់អាជ្ញាធរក្រុងខេត្តព្រះសីហនុ ដែលបានអនុញ្ញាតឲ្យអាជីវករលក់ដូរ នៅឆ្នេរអូរឈើទាលនាំយកសម្ភារផ្សេងៗមានតុ និងកៅអីជាដើម យកទៅដាក់ធ្វើអាជីវកម្មនៅលើឆ្នេរខ្សាច់ ថានាំឲ្យប៉ះពាល់ដល់ដល់សណ្តាប់ធ្នាប់ និងសោភ័ណភាពឆ្នេរសមុទ្រ ជាពិសេសប៉ះពាល់ដល់ការធ្វើដំណើរកម្សាន្តតាមឆ្នេរសមុទ្រ និងការចុះងូតទឹកកម្សាន្ត របស់ភ្ញៀវទេសចរចម្រុះជាតិសាសន៍។
ផ្តើមពីបញ្ហានេះ ភ្ញៀវទេសចរ ដែលចូលទៅដល់ឆ្នេរអូរឈើទាលនាពិធីបុណ្យចូលឆ្នាំខ្មែរ ទើបបញ្ចប់ថ្មីៗនេះ បានសំណូមពរដល់ លោក យន្ត មីន អភិបាលខេត្តព្រះសីហនុ ជួយណែនាំដល់ក្រុមអាជីវករឆ្នេរអូរឈើទាលកុំឲ្យនាំយកតុកៅអី និងសម្ភារៈផ្សេងៗ ដើម្បីបំរើសេវាទេសចរណ៍ នៅលើឆ្នេរខ្សាច់ឆ្នេរអូរឈើទាលគ្មានសណ្តាប់ធ្នាប់ដូចរាល់ថ្ងៃទៀតនាថ្ងៃអនាគត។
ពិសេសជាងនេះ ភ្ញៀវទេសចរ ក៏បានស្នើឲ្យ លោកអភិបាលខេត្ត ឲ្យជួយអន្តរាគមន៍ទៅមន្ត្រីក្រោមឱវាទ របស់ខ្លួន ត្រូវនាំយកស្តង់ ឬតូបលក់ភេសជ្ជ តុ និងឆត្រ ដែលពួកគេបានដាក់ពង្រាយនៅលើឆ្នេរសមុទ្រមួយចំនួននាពេលកន្លងមក ចេញពីលើឆ្នេរខ្សាច់ឆ្នេរអូរឈើទាល និងឆ្នេរអារីស្តុនជាដើមឲ្យបានឆាប់ផង។ បន្ថែមលើនេះ ក៏ស្នើឲ្យនាំយកសម្ភារៈទាំងនោះ យកទៅដាក់ពង្រាយនៅតាមតំបន់ឆ្នេរផ្សេងៗ ដែលមិនទាន់មានការអភិវឌ្ឍជំនួសវិញ។
បញ្ហានេះ កន្លងមក លោក ឈិន សេងងួន អភិបាលរងខេត្តព្រះសីហនុ បានឲ្យប្រព័ន្ធផ្សព្វផ្សាយដឹងថា តូបលក់ភេសជ្ជ តុ និងឆត្រ ដែលសាលាខេត្ត នាំយកទៅពង្រាយនៅតាមឆ្នេរមួយចំនួន ត្រូវបានឧបត្ថមពីក្រុមហ៊ុនខែមបូអែដ ផ្តល់ជូនមកឲ្យសាលាខេត្ត។ លោកថា សម្ភារទាំងនោះ រដ្ឋបាលខេត្តត្រៀមសម្រាប់ជួលឲ្យអាជីវករ ឬប្រជាពលរដ្ឋ ក្នុងតម្លៃសមរម្យ ដើម្បីឲ្យរដ្ឋបាលខេត្តមានខ្ទង់ថវិកាចំណាយលើការងារថែរក្សាសំអាតអនាម័យ បរិស្ថានឆ្នេរសមុទ្រខេត្តនេះ ឲ្យមានសោភ័ណភាពថែមទៀតនាថ្ងៃខាងមុខ។
ករណីនេះ លោក ឈិន សេងងួន បញ្ជាក់ថា រដ្ឋបាលខេត្តព្រះសីហនុ នឹងស្វែងរកទីតាំងសម្រាប់ដាក់សម្ភារទាំងនោះ ឲ្យបានត្រឹមត្រូវជាងនេះ ព្រោះមិនអាចយកទៅដាក់នៅលើឆ្នេរខ្សាច់ ឬឆ្នេរសមុទ្រនាំឲ្យបាត់បង់សោភ័ណភាពឆ្នេរបានទេ។ លោកថា ក្រុមការងារសាលាខេត្ត កន្លងមកបានចុះសិក្សាស្វែងរកទីតាំង នៅតាមតំបន់ឆ្នេរមួយចំនួន ដែលមិនប៉ះពាល់ដល់ការប្រកបរបរចិញ្ចឹមជីវិត របស់ប្រជាពលរដ្ឋ ជាពិសេសកុំឲ្យប៉ះពាល់ដល់សោភ័ណភាពឆ្នេរសមុទ្រ បរិស្ថានឆ្នេរខ្សាច់ និងកុំឲ្យប៉ះពាល់ដល់ភ្ញៀវទេសចរ ដែលចូលមកសំរាកកម្សាន្តនៅតាមឆ្នេរអូរឈើទាល និងអតីតឆ្នេរអារីស្តុនជាដើម។
យ៉ាងនេះក្តី ភ្ញៀវទេសចរជាតិភាគច្រើន បានបន្តរិះគន់ថា មិនគួររដ្ឋបាលខេត្តព្រះសីហនុ នាំយកតូបលក់ភេសជ្ជ តុ និងឆត្រ មកដាក់ពង្រាយនៅលើឆ្នេរខ្សាច់ នៃឆ្នេរអូរឈើទាល និងឆ្នេរអតីតមុខក្រុមហ៊ុនអារីស្តុនដូចរាល់ថ្ងៃនេះទៀតទេ។
បញ្ហានេះ ភ្ញៀវទេសចរជាតិ បានសំណូមពរដល់ លោក យន្ត មីន អភិបាលខេត្តព្រះសីហនុ ឲ្យជួយនាំយកតូបលក់ភេសជ្ជ តុ និងឆត្រទាំងអស់ ចេញពីឆ្នេរអូរឈើទាល និងឆ្នេរអារីស្តុនជាដើម ដែលរដ្ឋបាលខេត្តនេះបាននាំយកទៅពង្រាយលើឆ្នេរសមុទ្រនាពេលកន្លងទៅ ត្រូវនាំយកចេញពីលើឆ្នេរខ្សាច់ឲ្យបានឆាប់ ដើម្បីរក្សាសោភ័ណភាពឆ្នេរសមុទ្រ ពិសេសឆ្នេរអូរឈើទាល មានទីតាំងនៅទល់មុខវិមានលំហែកាយ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ បន្ថែមលើនេះ ភ្ញៀវទេសចរជាតិ ក៏បានស្នើដល់រដ្ឋបាលខេត្តព្រះសីហនុ ត្រូវនាំយកសម្ភារទាំងនោះ ប្តូរទៅដាក់ពង្រាយនៅតាមឆ្នេរសមុទ្រ ដែលមិនទាន់មានការអភិវឌ្ឍ ឬមិនទាន់មានអាជីវករលក់ដូរ ប្រសើរជាជាង នាំយកទៅដាក់ពង្រាយនៅតាមឆ្នេរ ដែលមានការអភិវឌ្ឍរួចហើយនោះ៕ ដែន សីមា
