ភ្នំពេញ៖ នៅពេលខាងមុខនេះ នាវាធុនធំផ្ទុកទំនិញពី១ម៉ឺនតោន ដល់៣ម៉ឺនតោន អាចចូលចតផ្ទេរ និងផ្ទុកទំនិញ នៅកំពងផែទឹកជ្រៅនៅខេត្តកំពត ។
នៅព្រឹកថ្ងៃទី២៤ ខែមេសា ឆ្នាំ២០១៨នេះ ក្រុមហ៊ុន ទ្រី ភាព គ្រុប និងក្រុមហ៊ុនកំពង់ផែអន្ដរជាតិ នៃខេត្តគ័ងស៊ី ប្រទេសចិន បានចុះហត្ថលេខាលើកិច្ចព្រមព្រៀងសហប្រតិបត្តិការ ជាមួយ ស្ដីពីការសាងសង់កំពង់ផែទឹកជ្រៅ ក្រោមអធិបតីភាពលោកស្រីឧបនាយករដ្ឋមន្ដ្រី ម៉ែន សំអន រដ្ឋមន្ដ្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ។
លោកឧបនាយករដ្ឋមន្ដ្រី ម៉ែន សំអន បានមានប្រសាសន៍ណែនាំឲ្យក្រុមហ៊ុនទាំង២ ត្រូវរៀបចំផែនការមេឲ្យបានច្បាស់លាស់ ស្ដីពីការអនុវត្តគម្រោងនេះ ដើម្បីបំពេញការងារដ៏ធំមួយនេះ បានសម្រេចជោគជ័យ ហើយលោកស្រីជឿជាក់ថា ក្រុមហ៊ុនទាំង២ នឹងអនុវត្តការងារនេះបានយ៉ាងល្អប្រសើរ ដើម្បីផលប្រយោជន៍សម្រាប់ប្រទេសកម្ពុជា-ចិន។
លោកឧកញ៉ា ទ្រី ភាព ប្រធានក្រុមហ៊ុន ទ្រី ភាព គ្រុប បានឲ្យដឹងថា ការសាងសង់កំពង់ផែនេះ នឹងផ្ដល់ប្រយោជន៍ធំណាស់ដល់ប្រទេសកម្ពុជា ហើយដំណាក់កាលដំបូង ក្រុមហ៊ុនទាំង២ នឹងសិក្សាសាងសង់កំពង់ផែទឹកជ្រៅ១ ដែលនឹងផ្ដល់ការងារចំនួន៥០០កន្លែង នៅដំណាក់កាល់ចាប់ផ្ដើម ដែលចំនួននេះនឹងកើនដល់១.៥០០កន្លែង ក្នុងរយៈពេល៣ឆ្នាំបន្ទាប់។
ពាក់ព័ន្ធនឹងការចូលរួមអភិវឌ្ឍន៍កំពង់ផែ នៅខេត្តកំពត គឺមានសារសំខាន់ណាស់ ហើយអាចជារបៀងមួយទៀត ស្របតាមផ្លូវមួយខ្សែក្រវ៉ាត់មួយរបស់ចិន។ នៅពេលខាងមុខនេះ នឹងមានការពង្រីកផ្លូវជាតិលេខ៣ ពីភ្នំពេញទៅកាន់ខេត្តកំពត ហើយផ្លូវនេះនឹងធ្វើឲ្យរយៈពេលនៃការធ្វើដំណើរ ពីខេត្តកំពតមកកាន់ទីក្រុងភ្នំពេញ មានរយៈពេលខ្លី ហើយនៅតាមបណ្តោយនៃដងផ្លូវនេះ ក៏នឹងមានរោងចក្រ មានវារីអគ្គីសនីផងដែរ ដែលអាចធ្វើជារបៀងសេដ្ឋកិច្ចមួយផងដែរ៕ ដោយ៖បញ្ញាស័ក្តិ