អ្នកស្រី Suan Thornton ឧបការីរដ្ឋមន្ត្រីការបរទេសអាមេរិកស្តីទី ទទួលបន្ទុកបណ្តាបញ្ហាអាស៊ីបូព៌ា និងអាស៊ីប៉ាស៊ីហ្វិក។
តាមទីភ្នាក់ងារព័ត៌មាន Yonhap ឲ្យដឹងថា ឧបការីរដ្ឋមន្ត្រីស្តីទីរបស់ក្រសួងការបរទេសអាមេរិក នៅថ្ងៃទី ២៤ ខែមេសា បានប្រកាសថា ក្រុងវ៉ាស៊ីនតោន ប្តេជ្ញាដាច់ខាតនឹងមិនជាន់ដានចាស់ ជាហេតុធ្វើឲ្យកិច្ចចរចាអូសបន្លាយជាមួយក្រុងព្យុងយ៉ាង ហើយបង្កលក្ខណៈដល់កូរ៉េខាងជើង គ្មានពេលវេលាជំរុញកម្មវិធីអភិវឌ្ឍន៍អាវុធទៀតទេ។
ថ្លែងទៅកាន់អ្នកសារព័ត៌មាននៅក្រុងសេអ៊ូល អ្នកស្រី Thornton បានអំពាវនាវឲ្យកូរ៉េខាងជើងអនុវត្តបន្ថែមនូវកាយវិការផ្សេងទៀតដើម្បីបញ្ចុះបញ្ចូលពិភពលោកទទួលស្គាល់នូវភាពស្មោះត្រង់របស់ខ្លួន ក្នុងបញ្ហារំសាយអាវុធនុយក្លេអ៊ែរ ។ ថ្វីត្បិតនៅថ្ងៃទី ២១ ខែមេសាកន្លងមក ប្រទេសនេះបានប្រកាសផ្អាកការសាកល្បងនុយក្លេអ៊ែរ និងកាំជ្រួចអន្តរទ្វីបក្តី គឺជា “សញ្ញាល្អមួយ” ប៉ុន្តែវានៅពុំទាន់គ្រប់គ្រាន់សម្រាប់ការបញ្ចុះបញ្ចូលឲ្យអាមេរិកជឿទុកចិត្តបានទេ ។
ថ្វីត្បិតតែឧបការីស្តីទីរូបនេះ បានលើកឡើងអំពីតួនាទីដ៏សំខាន់ពីការចូលរួមរបស់បណ្តាប្រទេសក្នុងជុំចរចា ៦ភាគី អំពីការរំសាយនុយក្លេអ៊ែរនៅឧបទ្វីបកូរ៉េមុននេះក្តី ប៉ុន្តែបានធ្វើការវាយតម្លៃថា បច្ចុប្បន្នពុំមែនជាពេលវេលាសម្រាប់លើកឡើងពីរូបមន្តណាផ្សេងទៀត ដើម្បីដោះស្រាយបញ្ហានុយក្លេអ៊ែររបស់កូរ៉េខាងជើងឡើយ ៕ សូយន