ភ្នំពេញ៖ អង្គភាពប្រឆាំងអំពើពុករលួយ (ACU) បានបង្ហាញអំពីមូលហេតុសំខាន់ៗចំនួន២ចំណុច ដែលជាដើមហេតុចម្បង នាំឲ្យសេវាកែតម្រូវអត្រានុកូលដ្ឋាន មានការយឺតយ៉ាវ និងមិនអាចសម្រេចបានតាមការកំណត់ មិនទាន់ចិត្តនៃអ្នកស្នើសុំ។
អង្គភាពប្រឆាំងអំពើពុករលួយ បានបញ្ជាក់ថា អស់រយៈពេល៤ខែមកនេះ អង្គភាពប្រឆាំងអំពើពុករលួយ បានស្រាវជ្រាវតាមពាក្យបណ្តឹងមួយចំនួនដែលបានដាក់ចូលក្នុងប្រអប់សំបុត្រស របស់ អ.ប.ព ដែលបានរៀបរាប់ថា ការកែរតម្រូវអត្រានុកូលដ្ឋាន របស់នាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្ម មានការយឺតយ៉ាវ និងមិនទាន់ចិត្តនៃអ្នកស្នើសុំ ។
ការស្រាវជ្រាវបានបង្ហាញថា ឫសគល់ដែលនាំឲ្យសេវាកែតម្រូវអត្រានុកូលដ្ឋានមានការយឺតយ៉ាវ និងមិនអាចសម្រេចបាន តាមការកំណត់ គឺមានកត្តាពីរ កត្តាទី១៖ ក្រសួងមហាផ្ទៃ និងក្រសួងយុត្តិធម៌ ទើបបានបញ្ចប់ការពិភាក្សាគ្នាហើយ ទើបដាក់ចេញការព្រមព្រៀង អនុញ្ញាតឲ្យនាយកដ្ឋានអត្រានុកូលដ្ឋាន មានសិទ្ធិកែតម្រូវទិន្នន័យ និងមោឃភាពបញ្ជីអត្រានុកូលដ្ឋាន ដែលមុននេះការធ្វើបែបនេះ មានតែកន្លែងមួយគត់ គឺតុលាការ។ បន្ទាប់ពីទទួលបានសិទ្ធិ និងភារកិច្ចនេះមក នាយកដ្ឋានអត្រានុកូលដ្ឋានប្រឹងប្រែងជំនះការលំបាកអំពីមូលដ្ឋានសម្ភារៈ និងការងារដ៏ស្មុគស្មាញ តែជាសត្យានុម័ត នាយកដ្ឋានមិនអាចរែកពន់បានទេ ព្រោះថាការកំណត់មិនឲ្យលើសពី១០ថ្ងៃ ហើយនាយកដ្ឋានចាប់ដំណើរការ កាលពីថ្ងៃទី២០ ខែតុលា ឆ្នាំ២០១៧មក ក៏មាននូវសំណើរជាច្រើនរួចជាស្រេច ដែលនាយកដ្ឋានបានទទួលតាំងតែពីមុនថ្ងៃនោះមក។ ចំនួនការងារដ៏ច្រើនលើសលប់ ពេលវេលាត្រៀមខ្លួនរៀបចំ មូលដ្ឋានសម្ភារៈមិនគ្រប់គ្រាន់ ធនធានមនុស្ស ថវិកា មិនទាន់បានបំពេញបន្ថែម ធ្វើឲ្យសំណូមពរមួយចំនួនប៉ុណ្ណោះ ដែលអាចដោះស្រាយបានឆាប់ក្នុងរង្វង់១០ថ្ងៃ ។ កត្តាទី២៖ ការកែតម្រូវទិន្នន័យ នាយកដ្ឋានអត្រានុកូលដ្ឋាន ត្រូវតែគោរព១០០ភាគរយ នូវភាពហ្មត់ចត់ ក្នុងការកែទិន្នន័យ អ្វីកែបាន អ្វីកែមិនបាន បើមិនដូច្នោះទេអាចមានផលវិបាកគតិយុត្ត ហើយជះឥទ្ធិពលដល់ការអនុវត្តច្បាប់ថែមទៀត។
អ.ប.ព បានពិនិត្យដោយផ្ទាល់ថា “ឯកឧត្តម អគ្គនាយក នៃអគ្គនាយកដ្ឋានអត្តសញ្ញាណកម្ម និងលោកនាយកដ្ឋានអត្រានុកូលដ្ឋាន ព្រមទាំងមន្ត្រីទាំងអស់ ពិតជាមានការខិតខំបំពេញសេវាដ៏ស្មុគស្មាញនេះ យ៉ាងសកម្ម ហើយ អ.ប.ព សំណូមពរដល់ម្ចាស់បណ្តឹង និងសាធារណជនទាំងអស់ យោគយល់ដល់ការលំបាកនេះ ដែលយើងយល់ថាបន្តិចទៀត យើងនឹងជំនះបានទាំងស្រុង”៕ ដោយ៖បញ្ញាស័ក្តិ
