ភ្នំពេញ ៖ មហាជននាំគ្នាដាក់សំណួរសួរថាហេតុអ្វីបានជាមេធាវីលោក កឹម សុខា ចំនួន៤នាក់ នៅថ្ងៃទី២៤ ខែមេសា ឆ្នាំ២០១៨នេះ បានដាក់ពាក្យស្នើសុំទៅតុលាការ ដើម្បីលាឈប់ការពារក្តីឱ្យ លោក កឹម សុខា អតីតប្រធានគណបក្សសង្គ្រោះជាតិ តទៅទៀត?
គួរបញ្ជាក់ថា៖មេធាវីទាំង៤នាក់នោះ រួមមាន លោក សំ សុគង់ លោក ហែម សុជាតិ លោក កែត ឃី និង លោក ជូង ជូងី ដែលពួកគាត់កន្លងទៅ គឺជាអ្នកការពារក្តីដ៏សកម្មជូន លោក សម រង្ស៊ី និងអតីតសកម្មជនផ្សេងទៀតរបស់អតីតបក្សប្រឆាំង។
លោក ហែម សុជាតិ មេធាវីម្នាក់ ក្នុងចំណោមមេធាវីទាំង៤នាក់ ដែលបានដាក់ពាក្យលាឈប់ពីការការពារក្តីជូន លោក កឹម សុខានេះ បានឱ្យដឹងថា ការលាឈប់របស់មេធាវីទាំង៤នាក់ គឺធ្វើឡើងតាមការស្នើសុំ និងសេចក្តីចង់បានរបស់លោក កឹម សុខា កាលពីប៉ុន្មានថ្ងៃមុន។ ប៉ុន្តែទោះជាយ៉ាងណា លោកមិនដឹងអំពីមូលហេតុ ដែលនាំឱ្យលោក កឹម សុខា សម្រេចចិត្តបែបនេះទេ។
លោកបានអះអាងទៀតថា បន្ទាប់ពីលោកទាំង៤នាក់ លាឈប់ហើយនោះ លោក កឹម សុខា ក៏នៅមានមេធាវីការពារក្តីជូនចំនួន៤នាក់ផ្សេងទៀត ក្នុងនោះមាន លោក ផែង ហេង លោកស្រី ម៉េង សុភារី និងលោក ចាន់ ចេងជាដើម។
ការសម្រេច ឱ្យមេធាវីទាំង៤នាក់ដែលធ្លាប់ស្និទ្ធនឹងសម រង្ស៊ី លាឈប់ពីការការពារក្តីឱ្យលោក កឹម សុខា ពេលនេះ ក៏ធ្វើឡើងបន្ទាប់ពីក្រុមមេធាវីទាំងនោះ បង្ហាញអំពីការអស់លទ្ធភាព ក្នុងការតតាំងផ្លូវច្បាប់ ៕ ដោយ ៖ បញ្ញាស័ក្តិ
