ភ្នំពេញ៖ ដើម្បីបង្ការ និងធានាសន្តិសុខ និងសុវត្ថិភាពភ្ញៀវទេសចរ ក្រសួងទេសចរណ៍ បានជូនដំណឹង ដល់គ្រប់សមាគមទេសចរណ៍ ដែលបម្រើឲ្យវិស័យទេសចរណ៍ទាំងអស់ ចូលរួមផ្សព្វផ្សាយដល់ភ្ញៀវទេសចរជាតិ-អន្តរជាតិ និងសាធារណជន ដែលមកទស្សនាកម្សាន្តសប្បាយ ក្នុងព្រះរាជពិធីបុណ្យអុំទូក ខាងមុខនេះ ត្រូវយកចិត្តទុកដាក់ខ្ពស់ ចំពោះបញ្ហាសន្តិសុខ និងសុវត្ថិភាពភ្ញៀវទេសចរ និងសម្ភារៈ មានតម្លៃផ្ទាល់ខ្លួន។
កាលពីថ្ងៃទី៣០ ខែតុលា ឆ្នាំ២០១៧ ក្រសួងទេសចរណ៍បានចេញសូមជូនដំណឹងដល់ភ្ញៀវទេសចរជាតិ និង អន្តរជាតិថា ឆ្នាំ២០១៧នេះ គណៈកម្មាធិការជាតិរៀបចំបុណ្យជាតិ-អន្តរជាតិ នឹងរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ចាប់ពីថ្ងៃទី២ ដល់ថ្ងៃទី៤ ខែវិច្ឆិកា ឆ្នាំ២០១៧។
ព្រឹត្តិការណ៍បុណ្យប្រពៃណីជាតិនេះ ជាឱកាសដ៏ល្អ ដើម្បីឲ្យភ្ញៀវទេសចរជាតិ និងអន្តរជាតិ បានស្វែងយល់កាន់តែច្បាស់អំពី វប្បធម៌ ប្រពៃណី ទំនៀមទំលាប់របស់ខ្មែរ ដែលមានតាំងពីបូរាណកាលមក ពិសេសព្រះរាជពិធីបុណ្យអុំទូក បណ្តែតប្រទីប និងសំពះ ព្រះខែ អកអំបុក ដែលជាពិធីដ៏មានប្រជាប្រិយបំផុត សម្រាប់ប្រជាជនកម្ពុជា តែងតែប្រារព្វធ្វើឡើងជារៀងរាល់ឆ្នាំ នៅតាមបណ្តារាជធានី-ខេត្តទូទាំងប្រទេស។
“ដើម្បីបង្ការ និងធានាសន្តិសុខ និងសុវត្ថិភាពភ្ញៀវទេសចរ ក្រសួងទេសចរណ៍ បានជូនដំណឹង ដល់គ្រប់សមាគមទេសចរណ៍ ដែលបម្រើឲ្យវិស័យទេសចរណ៍ រួមមាន សមាគមទីភ្នាក់ងារទេសចរណ៍កម្ពុជា ម្ចាស់មូលដ្ឋានអាជីវកម្ម សេវាកម្មទេសចរណ៍ ប្រតិបត្តិករទេសចរណ៍ ម្ចាស់ក្រុមហ៊ុនដឹកជញ្ជូនភ្ញៀវទេសចរ (ផ្លូវគោក និងផ្លវទឹក) ទាំងអស់ ចូលរួមផ្សព្វផ្សាយដល់ភ្ញៀវទេសចរជាតិ-អន្តរជាតិ និងសាធារណជន ដែលមកទស្សនាកម្សាន្តសប្បាយ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ខាងមុខនេះ ត្រូវយកចិត្តទុកដាក់ខ្ពស់ ចំពោះបញ្ហាសន្តិសុខ និងសុវត្ថិភាពភ្ញៀវទេសចរ និងសម្ភារៈ មានតម្លៃផ្ទាល់ខ្លួន ដូចខាងក្រោម៖ ត្រូវពាក់មួកសុវត្ថិភាពជានិច្ច ក្នុងការធ្វើដំណើរតាម ទោចក្រយានយន្ត មិនត្រូវបើកបរលើសល្បឿន កំណត់ជាដាច់ខាត ចំពោះយានយន្តដឹកភ្ញៀវទេសចរ គ្រប់ប្រភេទ ត្រូវពាក់ខ្សែក្រវាត់សុវត្ថិភាពជានិច្ច ក្នុងពេលធ្វើដំណើរតាមរថយន្ត មិនត្រូវបើកបរក្រោមឥទ្ធិពល នៃគ្រឿងស្រវឹង ជាដាច់ខាត ត្រូវពាក់អាវពោងសុវត្ថិភាពជានិច្ច ក្នុងពេលធ្វើដំណើរតាមទូកម៉ាស៊ីន ទៅកម្សាន្តតាមតំបន់កោះនានា ត្រូវរក្សាសម្ភារៈមានតំលៃផ្ទាល់ខ្លួន ពេលធ្វើដំណើរជៀសវាង ចោរលួច ឆក់ ប្លន់ជាដើម មិនត្រូវធ្វើដំណើកម្សាន្ត ទៅតំបន់ដាច់ស្រយាល នៅពេលយប់ ឬកន្លែងហាមឃាត់ ដែលអាចបង្កគ្រោះថ្នាក់បាន ជៀសវាងចូលទៅកន្លែង ដែលមានហ្វូងមនុស្សច្រើនកុះករ និងមានបរិយាកាសមិនល្អ”។ នេះបើតាមសេចក្តីជូនដំណឹងរបស់ក្រសួងទេសចរណ៍៕ ដោយ៖ជាលី