ភ្នំពេញ៖ ការដ្ឋានស្ថាបនាស្ពានបេឡេឫស្សីកែវចំណុចឃ្លាំងសាំងក្រុមហ៊ុនសូគីមិចបានឈានដល់តំណាក់ការតភ្ជាប់តួស្ពានហើយ គម្រោងនឹងបញ្ចប់នៅចុងខែមេសានេះហើយគ្រោងនឹងដាក់អោយប្រជាពលរដ្ឋបានធ្វើដំណើរឆ្លងកាត់នៅពាក់កណ្តាលខែឧសភា២០១៨ ពោលគឺក្រោយពីមន្ត្រីជំនាញធ្វើតេសទម្ងន់រួច។ នេះបើតាមការបញ្ជាក់ពីលោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ កាលពីព្រឹកថ្ងៃទី២៥មេសានេះ។
លោក សាំ ពិសិដ្ឋ បានបញ្ជាក់ថា នៅថ្ងៃទី២៥ខែមេសាឆ្នាំ២០១៨ ការដ្ឋានសាងសង់ស្ពានបេឡេឫស្សីកែវឆ្លងកាត់ទន្លេសាប បានឈានដល់ដំណាក់កាលតភ្ជាប់តួស្ពានចុងក្រោយហើយ ហើយបើតាមផែនការ គម្រោងនេះនឹងបញ្ចប់នៅចុងខែមេសានេះ ជាមួយនឹងការប្រើរយៈពេលធ្វើតេស្តភាពទ្រទម្ងន់ស្ពាន តម្លើងស្លាកសញ្ញាចរាចរ នៅដើមខែឧសភាឆ្នាំ២០១៨។
លោកបន្តថា ការដ្ឋានសាងសង់ស្ពានបេឡេឫស្សីកែវឆ្លងកាត់ទន្លេសាបនេះ គម្រោងនឹងបញ្ចប់នៅចុងខែមេសា២០១៨ តែមិនទាន់អោយប្រជាពលរដ្ឋធ្វើដំណើរឆ្លងកាត់នៅឡើយទេ ពោលគឺទុកអោយមន្ត្រីជំនាញធ្វើតេសទម្ងន់រយៈពេល១សប្តាហ៍សិន ទើបដាក់អោយប្រជាពលរដ្ឋបានធ្វើដំណើរឆ្លងកាត់នៅពាក់កណ្តាលខែឧសភា២០១៨។
គួរបញ្ជាក់ថា ស្ពានបេឡេឫស្សីកែវឆ្លងកាត់ទន្លេសាបនេះ មានប្រវែង ៥០៦ម៉ែត្រ ទទឹង ១២ម៉ែត្រ តភ្ជាប់ពីខណ្ឌឫស្សីកែវ មកខណ្ឌជ្រោយចង្វារ សម្រាប់ជួយបម្រើការការដ្ឋានសាងសង់ស្ពានបេតុងអារមេ និងជួយសម្រួលចរាចរដែលកំពុងកកស្ទះនៅស្ពានជ្រោយចង្វារ ដែលកំពុងដំណើរការជួសជុល។
គួររំលឹកផងដែរថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា កាលពីព្រឹកថ្ងៃទី២៣ ខែតុលា ឆ្នាំ២០១៧កន្លងមកនេះ បានអញ្ជើញបើកការដ្ឋានសាងសង់ ស្ពានបេតុងមួយខ្សែ ស្របជាមួយស្ពានបាឡេនេះផងដែរ។ ចំពោះ ស្ពានបេតុងដែលគ្រោងស្ថាបនា នៅអមជាមួយស្ពានបាឡេនេះ មានប្រវែង៩២២ម៉ែត្រ ទទឹង២០,៥ម៉ែត្រ។ ចិញ្ចើមស្ពានសម្រាប់ថ្មើរជើង មានទទឹង១,២៥ម៉ែត្រសងខាង, កំពស់សរសរស្ពានសំរាបព្យួរខ្សែកាប ធៀបនឹងកំរាលស្ពាន៣៤ម៉ែត្រ សរសរសំរាប់ព្យួរខ្សែកាប មានសរសរចំនួន៤, គន្លងខ្សែយានយន្តទទឹង៣.៧៥ម៉ែត្រ, គន្លងធ្វើចរាចរ២ខ្សែទៅ២ខ្សែមក, កំពស់នាវាចរក្រោមស្ពានអតិបរមា នៅរដូវវស្សា១០.៥ម៉ែត្រ, កំពស់នាវាចរក្រោមស្ពានអប្បរមា នៅរដូវប្រាំង២០.៥ម៉ែត្រ បំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរផងដែរ។
ស្ពាននេះ មានតួនាទីសំខាន់ក្នុងការរួមចំណែករំដោះចរាចរលើផ្លូវជាតិលេខ៦ និងផ្លូវជាតិលេខ៥ ក៏ដូចជាច្រកចេញចូលរាជធានីភ្នំពេញ និងជាសមិទ្ធផលថ្មីមួយទៀត ជាចំណងដៃសម្រាប់រាជធានីភ្នំពេញ និងប្រជាពលរដ្ឋដែលបានឆ្លងកាត់ស្ពាន ក៏ដូចបង្កើនសរសៃឈាមសេដ្ឋកិច្ច តភ្ជាប់ពីបណ្តាខេត្ត មករាជធានីភ្នំពេញ និងពីរាជធានីភ្នំពេញ ទៅតាមបណ្តាខេត្តផងដែរ ៕ ដោយ៖បញ្ញាស័ក្តិ
